Peter le Johan ruirilna
alian matona anding u
4
1 Hatuka Peter le Johanin mi ngāi kōma chong aril u lāi tak,
chāizūng ngāi,
Pathian biak in arung ulian le Sadduki ngāi chu amāni kōma ahong u na.
2 Kuitīr ngāiin mipui ei manchū u na le hanūk chu Isua zāra athi āta anthui rētna ruia chong ei ril u sika achān atak amansi u na.
3 Peter le Johan asūr u na,
zān tiang ei ni sika nangtūka nikhua rang tenpeia lung ina akhum u na.
4 Tenchu chong anngāi ngāi bila ātampān a iam u na.
Hantin han pānchang korong asāng rangā akāi u zeia.
5 Nangtūk nikhua han ruiril ngāi,
pātar ngāi le dān mīnchū ngāi chu Jerusalema anchun u na.
6 Chāizūng ulian Annas le Kaiapha,
hanūk Johan le Aleksandria hanūk atei atei chāizūng ulian chi ngāi dōra anchel u na.
7 Peter le Johan chu alāi u na amanding u na:
‘Hong zāt sin thōtheina le mo hanūk tu raminga mo hiva hi nei thō u?’
ati na arakel u na.
8 Hankēng Peter chu Ratha Ānthianga abita akōm u na:
“Mipui ruirilna ansāng le Israel pātar ngāi,
na kōm u na chong kei ril ani zei.
9 Mi dam lui khat koinīn hontin mo nei mandam ati na hava ruia avian nei na rakel u aniten,
na masang inti.
10 Nangni ngāi dōra le Israel mi ngāi dōrān hiva hi riat ngēt rase.
Nazaret Isua Krista,
nangnīn krosa nei hēm u ha Pathianin āthi ngāi bil āta ei mathui rēt raminga adam vanga ei manding ani na.
11 Hiva hi ani zei Isua.
‘Nangni in asin ngāiin nei
khāia nei pei u.
Hava ngēt ha Pathianin akila
lung anāng khīta ei man
chang.’
(Sām 118:22 )
12 Sandamna tutē kōma om mak.
Asik chu anvān thuaia miring kāra Pathianin raming atei ei pēk om mak.
Ama ronga kēng sandama nei om theina,”
ati na.
13 Hatuka Peter le Johan ei rāng zia amu u na,
lekha thei lui anchū lui ani u ti ariat u na aboi amandong u na.
Hanūk chu Isua kōma a om babang u ti ariat u na.
14 Peter le Johanin ei man dam miring chu amāni bila andinga amu u nām itē tithei u mak.
15 Hatuka amāni chu ruirilna ansāng āta ansuak ranga chong apēk u na.
Hankēng amāni le amāni achong u na.
16 “Hiva mi ngāi hi imo nei lōt rang ani zei?
Asik chu raming anthang sinsiana khat ei thō hi Jerusalem khopuia mi dōrān ariat zit zei.
Koinīn hava ha riat mak me ti thei nō mani.
17 Tenchu mi kōma hiva rui hi tāng ei hāi riam u nōkna ranga anchina man mu u rei.
Atun āta tutē kōma hiva mi raminga chong ril u lāi nō ro tīnti,”
ati u na.
18 Nukhōna amānīn hava mi ngāi rang ina akuia chong ei pēk u chu:
“Isua raminga chong ril pial u lāi nō ro.
Hanūk chu mi ngāi kōmām manchū u lāi nō ro.”
19 Tenchu Peter le Johanin amasang u na:
“Pathian matona hova mo adik,
nangni na chong anngāi mo ole Pathian chong anngāi mo?
Nangnīn ruiril u ta.
20 Asik chu,
koinīn nei mu le nei riat ngāi ril luia om thei mak me,”
ati u na.
21 Nūka amānīn anchina aman mu riam u le chu ama zōk u na.
Mipui sika ansinsakna lampui man u mak.
Asik chu ei thō u ngāi dōra sika mipuiin Pathian aman pak u na.
22 Asik chu sinsiana lehan mi ei mandam u akum ha kum sōm manli nēka tam ani na.
Aiam ngāiin bōr azong u
23 Hatuka Peter le Johan azōk sua u le alōm ngāi kōma asē u na.
Chāizūng u lian ngāi le pātar ngāiin akōm u na ei ril dōra avaril zit u na.
24 Hava ha ariat u na malung khat achōia anring sabaka Pathian kōma ankhēka ei ti u:
“O Puma chungansāng khīt,
nang anvān,
ramual le tipuiliana le asūnga om dōra asinpu na ni.
25 Nangin Ratha Ānthiang le na suak David,
koini na khūk,
amūra hiva chong hi nei ril ani na:
‘Isik mo nam atei ngāiin atak
ei man si u?
Mipui ngāiin akoronga ei
andon u?
26 Ramual rēng ngāi anthui
u na,
Rui aril ngāi anchun u na,
Puma le ami Krista adui
ranga,’
(Sām 2:1,2 )
ati u na.
27 Ani,
hiva khopuia na suak ānthiang Isua sariak nei manthi chunga Herod le Pontia Pilat chu Jentail ngāi le na mi Israel ngāi lehan mun khata anbum u na.
28 Asik chu aphamān āta nangin nei mandona le na kutin ei man sūk zēt ha ei thō u.
29 Atun hin Puma,
ei maphut u na hi enta,
na suak ngāi hi alom peia ngamna le na chong ei ril thei u na ranga san ro.
30 Na suak ānthiang Isua raminga mīn dam theina,
sinsiana ngāi le tichang abui sin ngāi athōthei ranga na kut alāng ta ro,”
ati u na.
31 Hatuka bōr azong u le ei ankhōm u na mun chu annīka.
Alom u na Ratha Ānthianga abita angam chunga Pathian chong a ril u na.
Aiam ngāiin anruala
ei dōn ngāi ansem u
32 Hatuka mipui aiam ngāi chu malung mun khat le mandon mun khata ei om u na abil u na tutēn ka theia ka ta ati om u mak.
Tenchu ei dōn u dōra chu lokō ta siakna muna āsiak u chachaka.
33 Hatuka kuitīr ngāi chu thōtheina lian sabaka Puma Isua ei anthui rētna rui chu ariatpui achangtir u na.
Aloma achung u chipa Pathian lungkhamna lian tak a om.
34 Akār u na tute ansam om u mak.
Asik chu ram le in adōn ngāiin ei zuar u na hava ei zuar u na aman ha ei hong chōi u ani na.
35 Hatuka kuitīr ngāi ke kunga ei hong siak u na,
amāni ei nāng anga kuitīr ngāiin ei sem u chachak.