15
O Absalom kamell baro rai te well
1 Un koi pal was kowa jaake, kai o Absalom peske i wurdin las, un graja, un paash-sheel murshen, kai nashan glan leste. 2 Ninna djas o Absalom taissarlake ap o drom, un was pash o foreskro wudar. Un te his jekes tchingepen i wawareha un doleske pash o baro rajeste djas, te rakrell job o tchatchepen pral lende win, palle das o Absalom les pash peste gole, un putchas: “Dran hawo foro hal tu?” Un te penas kowa: “Tiro budepaskro hi kalla un kolla menshendar dran Israel”, 3 koi penas o Absalom ap leste: “Dikau, tu hal an o tchatchepen an kau koowa. Un kek hi pash o baro rajeste, kai shunell tut. 4 Har kamoms, te woms me tchatchepaskro rai an o them! Me doms hakenes peskro tchatchepen, kai wals pash mande, te hi lo an o tchingepen i wawareha.”
5 Un te was jek pash o Absalomeste, un kamas pes glan leste tele witsrell, tapras les lo trujel un tchumras les. 6 Jaake kras o Absalom hakeneha an Israel, kai kamas pash o baro rajeste te djal, te krell lo o tchatchepen pral leste win. Jaake tchoras o Absalom kol djia kol murshendar an Israel.
7 Pal star bersha penas o Absalom ap o baro rajeste: “Me kamau an o foro Hebron te djal, te dap o baro Debleste kowa, hoi dom man sowel, te dap les. 8 Har homs an o foro Geshur an o them Syria dom man sowel un penom: ‘Te anell man o baro Dewel pale pale an o foro Jerusalem, kamau man pash o Debleste te parkrell un les an-mangell.’”
9 Un o baro rai penas ap leste: “Dja o Debleha!”
Un o Absalom djas an o foro Hebron. 10 Tchorchanes bitchras job murshen an o tselo them Israel trujel, un mukas lenge te penell: “Tumer te shunenn, te phurdell jek ap i bari phurdepaskria, palle denn gole: ‘O Absalom was baro rai pral o foro Hebron!’”
11 Dui-sheel mursha djan o Absalomeha dran o foro Jerusalem. Kolenge was penlo, te djan le pash o chapen, hoi o Absalom kamas te krell. Un jon djan kek tchilatchepah leha, un djinan tchi kolestar, hoi o Absalom tchorchanes kras.
O David hunte nashell peske dran o foro Jerusalem
12 Un o Absalom anas viechen, te wenn le chatchedo o Debleske. An o foro Gilo djiwas o Davideskro rakepaskro, o Ahitofel. Koles mukas o Absalom ninna pash peste te anell. Un kol mursha, kai djan o Absalomeha, wan bud un budeder. Jaake wan kolla bud, kai tchiwan pen tchorchanes leha khetne.
13 Koi was jek un penas o Davideske: “Hakeneskro dji an o tselo Israel djal pal o Absalomeste.”
14 O David penas ap peskre an-dikle murshende, kai pash leste an o foro Jerusalem his: “Nashas menge! Mer nai tserdah men gar kokres dran o Absalomeskre wasta. Krenn sik, te ham krik, te well lo! Te taprell lo men, anell lo bibacht pral mende, un dell kol menshen an o foro o chareha mulo!”
15 Koi penan o baro rajeskre an-dikle mursha ap leste: “Tu hal maro rai, un mer ham tire budepangre. Mer krah jaake har tu, baro rai, kameh.”
16 Un o baro rai djas win dran o foro Jerusalem, un leskre romja, tchawe un budepangre djan leske palla. Kokres deesh peskre djuwjendar mukas o baro rai an o kheer, te denn jon garda koi pre.
17 Un har o baro rai un kol tsele menshe, kai leske palla djan, win wan, atchan jon i kotar dureder tardo. 18 Un leskre tsele lurde djan ap leskre dui rigja, ninna i tsele Kretarja un i tsele Pletarja. Kolla dran o foro Gat djan glan leste. Kolla his shob-sheel mursha, kai leske dran o foro Gat palla djan.
19 Un o baro rai penas ap o Itai, ko mursh dran o foro Gat: “Hoske djah tu mentsa? Risse trujel un atch pash ko newo baro rajeste. Tu hal i wi-themari, un dran tiro them wal tu pash mende anlo. 20 Taissar wal tu, un kai diwes nashals tuke mentsa kai un koi? Me djinau gar, kai te djap. Risse trujel un le kol wawaren dran Gat tuha. Latchepen un tchatchepen mu well ap tiro drom!”
21 O Itai penas ap o baro rajeste: “Me dau man sowel pash o djido Debleste: Jaake har tchatcho hi, kai tu, miro baro rai, djiweh, me, tiro budepaskro, djau tuha, kai tu ninna djah. Hi mange jek, te merau oder te atchau djido.”
22 “Mishto”, penas o David. “Palle am un dja glan mande wergel!”
Koi djas o Itai, ko mursh dran Gat, glan leste wergel, ninna leskre tsele mursha un kol tsele djuwja un tchawe, kai pash lende his. 23 Un lauter, kai pale atchan, rowan soreles, har kol tsele lurde glan leste wergel djan. Un o baro rai djas wergel ko tikno pani Kidron. Un khetne leha djan kol tsele lurde dureder ap ko drom, kai djal an ko mulo them.
24 Un ninna o rashai, o Zadok, his koi pashel, khetne kol tsele Levitarja. Un jon hidjran o mochton, kai o Debleskre deesh laba dren hi. Un pal o pani Kidron tchiwan le ko mochton tele ap i phub un hadan les pale pre har i tsele lurde dran o foro wergel o pani wan. Un o rashai Abjatar his ninna koi. 25 Palle penas o baro rai ap o Zadok: “An ko mochton an o foro pale pale. Te kamell o baro Dewel mange latches te well, anell job man pale pale, te dikap ko mochton pale un o kheer, kai lo tardo hi. 26 Te penell job ‘Tu hal gar latcho an mire jaka’, palle nai krell lo mantsa, hoi leske mishto hi.”
27 Un o baro rai penas ap o rashajeste Zadok: “Tu un o Abjatar, djan pale an o foro an o latchepen, tu un tiro tchawo, o Ahimaaz, un o Abjatar un leskro tchawo, o Jonatan. 28 Shun, me kamau te atchell an o mulo them pash o pani Jordan, bis te shunau tumendar.”
29 Jaake anan o Zadok un o Abjatar o mochton, kai o Debleskre deesh laba dren hi, pale an o foro Jerusalem, un atchan koi.
30 O David djas ap o djeteskri berga un rowas. Un leskro shero his tchakedo. Un job djas pirkenes. Ninna kol tsele menshe, kai hi pash leste, kolengro shero his tchakedo. Jon djan pre un rowan. 31 Un har o Davideske penlo was, kai o Ahitofel ap o Absalomeste rikrell, penas job: “Baro Dewel, kre te patsell hakeno, kai kowa, hoi o Ahitofel penell, dinlepen hi!”
32 Un o David was pral ap i berga, kote, kai o Dewel an-mangedo wella. Kote tapras lo peskro males, o Hushai, i menshendar Arki. Les his i paashno ripen ap leste un tchik ap leskro shero. 33 Un o David penas ap leste: “Ma dja mantsa! Te djah tu mantsa, nai wals tu har i bar ap miri heri. 34 Dja pale an o foro, un pen ap o Absalomeste: ‘Me kamau tiro budepaskro te well, jaake har homs tiro dadeskro budepaskro.’ Hal tu jaake pash o Absalomeste tardo, nai peneh tu, kai kowa gar mishto hi, hoi o Ahitofel penell. 35 Ninna kol rashaja, o Zadok un o Abjatar, hi tuha an o foro. Lauter, hoi tu dran o baro rajeskro kheer shuneh, peness tu kolende. 36 Pash lende hi lengre dui tchawe, o Ahimaaz, un o Jonatan. Kolla nai phukrenn mange lauter, hoi tumer shunenna.”
37 Jaake was o Hushai, o Davideskro maal, an o foro, har djas o Absalom an o foro Jerusalem dren.