O Samueleskro ersto liil
1
I Hanna mangell o baro Deblestar i tchawes
1 His i mursh i menshendar Efrajim. Kowa djiwas an o foro Ramatajim-Zofim an o pralstuno them Efrajim. Leskro lab his Elkana. Koleskro dad his o Jeroham, koleskro dad his o Elihu, koleskro dad his o Tohu, un koleskro dad his o Zuf. 2 O Elkana, les his dui romja; koi jek kharas Hanna un koi wawar Peninna. Un kolat his tchawe. I Hannat his kek tchawe. 3 Un ko mursh djas hako bersh win dran peskro foro, te mangell lo an o foro Shilo o baro Debles an, ko rajes pral o bolepen un i phub, un te anell lo leske i vieches, hoi well leske maredo. Kote his dui phrala o baro Debleskre rashaja: o Hofni un o Pinhas. Kolengro dad his o Eli.
4 Te was ko diwes, kai anas o Elkana i vieches o Debleske, das job peskri romjat Peninna un lakre mursh tchawen un tchen, hakeneste jek kotar mass. 5 I Hannat das job dui kotja. Job kamas lat o djijestar, ninna te kras o baro Dewel lah jaake, te nai las li kek tchawe. 6 Un i Peninna, koi wawar romni, rodas, har te dukrell li lat, un kras lat i labentsa tele, doleske, kai nashte lell li kek tchawe. 7 Un jaake djas kowa hako bersh: Te djan le pre pash o baro Debleskro kheer, dukras i Peninna lat jaake. Palle rowas i Hanna un chas tchi. 8 O Elkana, lakro rom, penas ap late: “Hanna, hoske roweh tu? Un hoske chah tu tchi? Un hoske hi tiro dji jaake phares? Hom me tuke gar budeder moldo har deesh mursh tchawe?”
9 Har jon an Shilo his, stas i Hanna pre pal o chapen un o pipen, un djas an o baro Debleskro kheer. Kote his o rashai Eli beshdo glan o wudar. 10 Un lakro dji rowas, un joi mangas o baro Debles un rowas soreles ap leste, 11 un das pes sowel un penas: “Tu, baro Dewel un rai pral o bolepen un i phub, tu te dikeh kanna tiri tchorweli budepaskretsa an, un bistreh lat gar, un deh tiri budepaskretsat i mursh tchawes, palle dau me les tute o tselo tsiro, hoi job djiwella. Un kek tchuri well ap leskre balla, hoi tchinals len tele.”
12 Un har joi i rah tsiro o baro Debleha rakras, das o Eli jak ap lakro mui. 13 I Hanna rakras peske kokres an peskro dji. Ninna te djas lakro mui, har te rakrals li, nai shunas kek lakre laba. Kote patsas o Eli, te hi li mati. 14 Un o Eli penas ap late: “Har rah kameh tu gomme mati kate te atchell? Dja khere un sob tiro matepen win, te wess pale pash tute!”
15 I Hanna penas: “Ma rikrenn man mateske, miro rai! Mool pijom me gar un tchi wawar, hoi jekes mato krell. Me hom tchi wawar har i djuwel, kai lat i pharo dji hi. Un kowa tchorom win glan o baro Debleste. 16 Rike tiri budepaskretsat gar i djuwjake, kai tchi moldo hi. Miro dji hi phagedo un phares, doleske rakrom me kate jaake rah.”
17 Kote penas o Eli ap late: “Dja o Debleha! O Israeleskro Dewel dell tut kowa, hoi tu lestar mangal.”
18 Un joi penas: “Mu dikenn tire jaka kamles ap mande!”
Un koi djuwel djas peskro drom, un chas, un dikas buder gar jaake phagedo win har glan kowa.
19 Un sik o wawar diwes stan le pre. Un har sharan le o baro Debles, djan le khere an Rama. Un o Elkana djas rati pash i Hannate dren. Un o baro Dewel bistras i Hannat gar un kras, 20 te was li wawartchandes. Un har lakro tsiro was, las li i mursh tchawes, un das les o lab Samuel. Joi penas: “O baro Deblestar mangom les mange.”
I Hanna dell peskro tchawes o Debleste
21 O wawar bersh, har djas o Elkana pale pre peskri tseli familjah har hako bersh, te anell lo o baro Debleske i vieches, hoi well leske chatchedo, ninna jekes, te rikrell lo peskri sowel, hoi job das, 22 koi djas i Hanna gar lentsa. Joi penas ap peskro romeste: “Te pijell o tchawo buder gar ap o betch, kamau me les pre te anell glan o baro Debleste. Un job atchell palle koi, jaake rah job djiwella.”
23 Un lakro rom Elkana penas ap late: “Kre jaake har tu kameh, atch kai, bis te job phuro doha hi. Mu rikrell o baro Dewel lauter, hoi job pral kau tchaweste penas!”
Jaake atchas koi romni khere un das o tchawes o betch, jaake rah bis te job phuro doha his. 24 Un har job phuro doha his, las li les peha, un djas leha pre an o foro Shilo. Un las koi pashel jek triin-bershengro guruma un deesh kilogramme jarro un jek ledertikro gono pherdi mool, un anas kowa pash o baro Debleskro kheer. O tchawo his gomme terno.
25 Un jon maran o gurum, un anan o tchawes pash o Eli. 26 Un joi penas ap o Eli: “Ach, miro rai, jaake har tchatcho hi, kai tu djiweh: Me hom koi djuwel, kai kate tardo his un o baro Deblestar mangas. 27 Kau tchawes mangom mange o baro Deblestar. Un job shunas man un das les mande. 28 Doleske dau les me kanna ninna o baro Debleste pale, te well lo leskro, jaake rah har job djiwella.”
Un jon mangan kote o baro Debles an.