2
I Hanna sharell o baro Debles
1 Un i Hanna parkras pes pash o Debleste un penas:
Miro dji hi bachtelo an o baro Debleste.
Job hadas man pre un kras man soreles.
Kanna nai sau pral kolende, kai man tiknes kran.
Tu, miro Dewel, wal ap miri rig. Doleske hom bachtelo.
2 Kek hi jaake baro un tchatcho har o baro Dewel.
Dell kek wawar Dewel har job.
Ap kekeste nai rikrah men har ap maro Debleste.
3 Mukenn tele tumaro sharepah! Ma krenn tumen bares!
Mukenn buder kek pre-phurde laba dran tumaro mui win!
O baro Dewel hi i Dewel, kai kowa djinell.
Un kowa, hoi i menshe krenna, lell job an o jak un penell, hoi kowa molella.
4 I sorele lurdenge phagell lo pengre boge, kolentsa jon karje dan.
Kolen, kai len kek soor buder hi, dell lo newi soor.
5 Kolla, kai brawelo his, hunte budrenn kanna, te lenn le maro.
Un kolla, kai bokan, kolen hi kanna doha te chal.
Koja, kai nai las kek tchawe, koja las efta.
Un koja, kolat bud tchawe his, kolake atchell gar jek.
6 O baro Dewel dell temerl,
un job krell djido.
Job anell tele pash i mulende un pale pre.
7 O baro Dewel krell tchorwelo
un job krell brawelo,
ko jekes krell lo tikno,
un ko wawares baro.
8 Koles, kai les tchi hi, hadell lo dran i tchik,
un o tchorweles hidjrell lo pre dran i jagakri tchik,
un beshell les pash i pralstunende,
un krell les an-diklo.
I tseli phub hi o baro Debleske.
Job tchiwas lat soreles tardo.
9 O baro Dewel rikrell kolen ap o tchatcho drom, kai leskre hi.
Un kolla, kai kamenn lestar tchi te djinell, perenn an o tamlepen un merenn.
Kek mensho well pestar sorelo.
10 Kolla, kai tchingrenn ap baro Debleste, wenn mulo dino.
Dran o bolepen bitchrell o Dewel peskri choli pral lende.
O baro Dewel dell i tseli phubjat peskri phagi.
Job rodell koles win, kai baro rai well,
un dell les bari soor.
11 Un o Elkana djas pale khere an Rama. Un o tchawo atchas an Shilo pash o rashajeste, o Eli, un his o baro Debleske koi.
O rashajeskre tchawe krenn tchilatcho koowa
12 O Elijeskre tchawe his tchilatche un kaman o baro Deblestar tchi te djinell. 13 Un lenge his gar doha, hoi i rashajenge hi kol viechendar, hoi i menshe o Debleske anan. Jaake bitchran le pengre budepangren kote, kai i menshe ko mass keran kol viechendar, hoi anan le o Debleske. Un ko budepaskro das i forshetta, hoi lat triin danda his, an i piri tchurje. 14 Un lauter, hoi ap i forshetta pre atchas, las job o rashajeske peha. Un jaake kran le pash hako Israelitari, kai an Shilo was. 15 Ninna glan ko tsiro, kai jek o thulepen ap o Debleskri chatchepaskria chatchras, was o rashajeskro budepaskro un penas ap ko mursheste, kai i vieches anas: “De man mass o rashajeske, te pekap les. Job kamell jalo mass tutar te lell un kek keredo mass.” 16 Te penas ko mursh palle: “Mishto, muk man o thulepen o Debleske te chatchrell, palle le tuke, hoi tu kameh”, palle penas o rashajeskro budepaskro: “Na-a, kanna dess les, un te deh les gar, lau les sorjah tutar.”
17 Un koi doosh, hoi kol terne mursha ap pende anan, his baro glan o baro Debleste. Lenge his kowa tchi moldo, hoi o baro Debleske anlo was.
O terno Samuel budrell o Debleske
18 Un o Samuel his o baro Debleske koi. Kau tchawo his rido an i rashajeskri laintikri damdira. 19 Leskri dai kras leske hako bersh i newo gad un anas les peha, te djas li peskro romeha pre, te anenn le o Debleske i vieches har hako bersh. 20 Un o Eli rakras bacht pral o Elkana un leskri romni win, un penas: “O baro Dewel dell tut wawar tchawe kai romjatar ko tchaweske o Samuel, koles joi peske o baro Deblestar mangas.” Un jon djan penge pale khere.
21 Un o baro Dewel dikas latches ap i Hanna, un joi was wawartchandes, un las gomme triin mursh tchawe, un dui tcha. Un o Samuel atchas pash o baro Debleste un was an leskro kheer bares.
O rashajeskre tchawe shunenn gar ap pengro dadeste
22 Un o Eli his kanna bud phuro. Un job shunas lauter, hoi leskre tchawe ap i Israelitarja kran, ninna te his le pash kol djuwjende tchiddo, kai glan o Debleskro plachteno kheer pengri budi kran. 23 Un o Eli penas ap peskre tchawende: “Hoske krenn tumer sawo koowa? Bud menshendar shunom ko tchilatcho koowa, hoi tumer kran. 24 Kowa, hoi pral tumende penlo well mank o baro Debleskre menshende, hi gar mishto. Kanna mukenn kowa! 25 Te krell jek tchilatchepen ap i wawar mensheste, hi lo an o Debleskro wast. Te krell lo tchilatchepen ap o baro Debleste, koon nai rakrell leske mishto?”
Jon shunan gar ap pengro dadeste. O baro Dewel kras lengre djia pandlo. Job kamas len te marell.
26 Un o terno Samuel was phureder, un kowa, hoi lo kras, his mishto glan o baro Debleskre jaka un ninna glan i menshengre jaka.
O Elijeske well penlo, te well i phagi pral leskro kheer
27 Un i Debleskro mursh djas pash o Eli un penas leske: Kawa penell o baro Dewel: Tu djineh mishto, har krom man prindjedo pash tire phurende, pash o kheer Aron, har i Israelitarja an o them Egiptia his un hunte budran o Faraeske. 28 Dran i tsele familje, kai wenna kol deesh-te-dui Israeleskre tchawendar, rodom me o kheer Aron win, te wenn kol mursha rashaja mange, te chatchrenn le mange viechen ap miri chatchepaskri, ninna te chatchenn le mange sungepaskro koowa. Me dom len i rashajengre damdira, te riwenn le len, te wenn le glan mande. Ninna dom len o tchatchepen, te chan le ko massestar, hoi mange chatchedo wella. 29 Hoske dikenn tumer ap kol viechen un chapen, hoi jaake an miro kheer anlo well, har me penom, har te wals kowa tchi moldo? Tu hadeh tire tchawen pral mande, un mukeh len i feteder kotja mass te lell kol viechendar, hoi mire menshe Israel mange anan. Un tumer chan tumen pesso ap kowa. 30 Doleske penell o baro Dewel, kai o Israeleskro Dewel hi: Tchatchepah, me penom, te wenn i mursha dran tiro kheer un dran tiro dadeskro kheer hako tsireske rashaja glan mande. Kanna penau, kowa kamau buder gar. Me krau kolen baro, kai man bares krenna. Un kowa, kai ap mande tchi della, ap koleste well witar tchi dino.
31 Djiness, ko tsiro wella, koi dau i tsele terne murshen mulo an tiro kheer un an tiro dadeskro kheer, jaake te well kek phuro an tiri familja. 32 O tselo tsiro wenn tire jaka pherdi daarb. Un tu dikeh, har djal lauter mishto i menshenge an Israel. Kokres an tiro dadeskro kheer well buder kek phuro.
33 I budeder mursha mank tumende hunte merenn an pengro feteder phurepen, ninna te mukau gar hakenes tire menshendar te merell, koon mange i rashai hi, te wess tu gar jaake bibachtelo, te nashreh tiri soor, un tiro dji mereh i dukatar. 34 Me dau tut i sikepen: Tire dui tchawe, o Hofni un o Pinhas, merenna ap jek diwes. Te well kowa, dikeh, kai ko wawar koowa ninna tchatcho hi.
35 Me mukau mange i rashajes pre te stell, kai peskri budi mishto krell. Job krell lauter jaake, har me kamau un mange shukar hi. Un me krau leske i kheer, hoi atchella. Un job budrella hako tsiro koleske, koles me wi-rodau, te well lo baro rai.
36 Kowa, kai dran tiro kheer pral atchas, well palle pash leste un witsrell pes tele glan leste, te mangell lo peske i rupeni bema un i kotar maro lestar, un penell ap leste: “Muk man rashajengre budi te krell, te well man i kotar maro te chal.”