3
O Dewel rakrell o Samueleha
1 An ko tsiro, har budras o terno Samuel o baro Debleske tel o rashajeste, o Eli, rakras o baro Dewel gar bud kope ap jekeste. His witar gar bud kope, kai dikas jek i Debleskro dikepena.
2 His i rat, kai his o Eli ap peskro tchiben tchiddo. Leskre jaka nashran pengri soor, un job nai dikas buder tchi. 3 Ninna o Samuel sowas un his tchiddo an o baro Debleskro kheer pash ko mochton, kai o Debleskre deesh laba dren hi. Un i Debleskri momeli his gomme gar win.
4 Kote das o baro Dewel o Samueles gole. Un kowa penas: “Ake hom!” 5 Un job nashas pash o Eli un penas: “Ake hom. Tu dal man gole.”
O Eli penas: “Me dom tut gar gole, dja pale pale un tchip tut un sob!” Un job djas pale, un tchiwas pes tele.
6 Kote das les o baro Dewel gomme jek kopo gole: “Samuel!” Un o Samuel stas pre un djas pash o Eli un penas: “Ake hom, tu dal man gole.”
Un o Eli penas: “Me dom tut gar gole miro tchawo. Dja pale pale un tchip tut.” 7 O Samuel prindjras o baro Debles gomme gar, un job shunas les gomme gar, har rakras lo ap leste.
8 Un o baro Dewel das o triinto kopo ap o Samuel gole. Un kowa stas pre un djas pash o Eli un penas: “Ake hom, tu dal man gole.”
Kanna haiwas o Eli, te dell o baro Dewel o tchawes gole. 9 Un o Eli penas ap o Samuel: “Dja un tchip tut pale, un te deh jek tut pale gole, palle pen: Rake baro Dewel, tiro budepaskro shunella.”
Un o Samuel djas pale un tchiwas pes ap peskri platsa. 10 Kote was o baro Dewel un his pash leste tardo, un das les pale jaake gole har kol wawar kope: “Samuel! Samuel!”
Un o Samuel penas: “Rake, tiro budepaskro shunella!”
11 Un o baro Dewel penas ap o Samuel: “Me krau i koowa an Israel. Un koon kolestar shunella, koleske dukenna palle peskre dui kanda. 12 Ap ko diwes kamau me lauter pral o Eli un leskro kheer te anell, hoi me pral leste rakrom, bis te lauter jaake was, har me penom. 13 Job djinas, har peskre tchawe sawo koowa kran, hoi ladj ap mande anas. Un job mukas len kowa te krell. Doleske dau me leskro kheer peskri phagi, hoi atchella hako tsiro ap leste. Kowa penom leske glan i tsiro. 14 Me dom man sowel glan leste, te nai lell tchi koi doosh krik, hoi leskri familja ap peste anas. Kek viecho, witar kek chapen dran jarro, hoi jon mange anenn, nai lell koi doosh krik.”
15 Un o Samuel atchas tchiddo bis taissarlakro. Palle stas lo pre un kras i wudja pre glan o baro Debleskro kheer. Job daras te penell lo o Eljeske, hoi o baro Dewel les sikras.
16 Kote das o Eli les gole un penas: “Samuel, miro tchawo!” Un job penas: “Ake hom!”
17 “Hoi penas o Dewel tuke?” putchas lestar o Eli. “Pen mange lauter, un rike tchi pale! O Dewel te dell tut i phagi, te peneh mange gar i tsele laba, hoi lo ap tute rakras.”
18 Kote penas o Samuel leske lauter un rikras tchi pale.
Koi penas o Eli: “Job hi o baro Dewel un job krell jaake har latcho hi.”
19 Un o Samuel was bareder, un o baro Dewel his pash leste, un kras te was lauter tchatcho, hoi o Samuel i menshenge penas. 20 Un i Israelitarja an o tselo them dran Dan bis Beersheba, haiwan, te hi o Samuel o baro Debleskro rakepaskrob.
21 Un o baro Dewel was pale te pale an peskro kheer an Shilo un rakras ap o Samuel. Un o Samuel penas leskre laba ap i Israelitarja.