31
O Mose tchiwell o murshes Josua an peskri budi dren
1 O Mose rakras pale i Israelentsa un penas kal laba: 2 120 (jek-sheel-te-biish) bersha hom me kau diwes. Me nai djau buder gar glan tumende win un dren. Un o baro Dewel penas ap mande: ‘Tu djas gar pral kau pani Jordan wergel.’ 3 Tumaro baro Dewel hi kowa, kai djal glan tumende. Job hi kowa, kai marell kol menshen an kau them glan tumende, te nai lenn lengro them tumenge dren. Un o Josua well tumaro pralstuno, jaake har o baro Dewel kowa penas. 4 O baro Dewel krell kol wawar menshentsa jaake, har job kowa kras i rajentsa pral i Amorarja, o Sihon un o Og, kolen job das un lengro them paash kras. 5 Ap ko tsiro, kai dell o baro Dewel kol menshen an tumaro wast, krenn lentsa jaake har penom me tumenge. 6 Awenn soreles un ma trashenn! Ma darenn tchi un trashenn kekestar! Tumaro baro Dewel hi kowa, kai djal tumentsa. Job atchell pash tumende un mukell tumen gar kokres.
7 O Mose das o Josua gole un penas ap leste glan i tsele Israelitarjen: “Ab sorelo un ma traash! Tu aneh kal menshen an ko them, kowa o baro Dewel pes sowel das glan lengre phurende, te dell lo les lende. Un tu deh halauterenge pengro kotar them. 8 O baro Dewel hi kowa, kai djal glan tute, job hi tuha! Job atchell pash tute un mukell tut gar kokres. Ma dare tchi un ma traash kekestar!”
Hake efta bersha wenn o tchatchepaskre laba win gole dino
9 O Mose tchinas kal tchatchepaskre laba an i liil, un das les kol phureden pral Israel un kol rashajende dran o kheer Levi, kai o Debleskro mochton hidjran, kai o Debleskre deesh laba dren hi.
10-11 O Mose penas ap lende: “Hake efta bersha, an ko bersh, kai well i sijaan muklo, hunte denn i laba an kau liil win gole glan i tsele Israelitarja. Kowa krenn ap ko tsiro, kai wenn le khetne glan tumaro baro Debleste ap koi platsa, hoi job peske win rodell, an kol bare diwessa, kai djiwenn le an patjengre khera. 12 Kote an i tsele menshen khetne, i murshen, i djuwjen un i tchawen, ninna kol wi-themarjen, kai an tumare forja djiwenn. Jon lauter hunte shunenn kal laba, jaake te djinenn le, har te djiwenn le o baro Debleha, kai tumaro Dewel hi, un rikrenn pen mishto ap kal tsele tchatchepaskre laba. 13 Ninna lengre tchawe, kai djinenn les gomme gar, hunte shunenn kowa, te dikenn le, har te djiwenn le o baro Debleha, kai tumaro Dewel hi. Kowa te well o tselo tsiro, har djiwenn tumer an ko them, an koleste tumer pral o Jordan wergel dren djan, te lenn les tumenge dren.”
14 O baro Dewel penas ap o Mose: “Tire diwessa wan, te hunte meress: De o Josua gole, un ab khetne leha pash o Debleskro plachteno kheer, te tchiwap les dren an leskri budi.”
Un o Mose un o Josua djan dren an o Debleskro plachteno kheer, 15 un o baro Dewel sikras pes an i wolka an o plachteno kheer. Un koi wolka his tardo pral o khereskro wudar.
O Mose tchinell i gili pre
16 O baro Dewel penas ap o Mose: “Sik well o diwes, kai mereh. Un pal tiro merepen mukenn i Israelitarja miro drom, un nashenn kol deblenge palla ko themestar, an koleste wenna. Un jon djan penge mandar, un krenn buder gar, hoi lentsa win krom. 17 Palle chatchell miri choli pre pral lende, un me mukau len, un wau lenge buder gar ap i rig. Bud djungelo pharo koowa pherdo duka un daar well pral lende. Un jon penenn palle ap ko diwes: ‘Kowa lauter well pral mende doleske, kai maro Dewel buder gar pash mende hi.’ 18 Ap ko diwes khatrau miro mui glan lende dran ko tselo tchilatcho koowa, hoi le kran, har mangan le wawar deblen an.
19 Un kanna, tchin an i liil kai gili, hoi tuke penau, un anenn lat lenge pashel, te nai giwenn le lat. Jaake te nai penau me, te dom len trad kai giljah. 20 Me anau len an ko them, jaake har man sowel dom glan lengre phurende, te krap kowa. Kowa hi i them, an koleste bud thud un gwin hi. Un jon chan un wenn tchalo un thullo. Un kote nashenn le wawar deblenge palla, un mangenn kolen an. Un ap mande dikenn le tele, un phagenn koi sowel, hoi le mantsa dren djan. 21 Palle well bud bibacht un djungelo koowa pral lende. Un jon giwenn koi gili. un koja well gar bistedo lengre tchawendar, un sikrell lende, kai dom len trad, hoi wella, te mukenn le miro drom. Glan te anom len an ko them, koleske me man sowel dom, te anau len koi, prindjrau ko koowa, hoi lenge an o shero trujel djal.”
22 Ko emligo diwes tchinas o Mose kai gili pre, un anas lat i Israelenge pashel.
23 Un o baro Dewel penas ap o Josua, koleskro dad o Nun his: “Ab sorelo un ma traash! Tu aness i Israelitarjen an ko them, koleske me man sowel dom, te anau len koi. Un me kamau tuha te well.”
O tchatchepaskro liil well tchiddo an o Debleskro kheer
24 O Mose tchinas an i liil kol tsele laba, hoi sikrenn, har te djan le o Debleskro drom. 25 Pal kowa penas lo ap i Levitarja, ap kolende, kai hidjran o mochton, kai o baro Debleskre deesh laba dren hi: 26 “Lenn kau tchatchepaskro liil, un tchiwenn les ap i rig pash o mochton, kai o baro Debleskre deesh laba dren hi, te sikrell lo len, hoi wella, te rikrenn le pen gar ap kol laba.
27 Me djinau, har djan tumer pal tumaro shero un kamenn gar te shunell. Ninna kanna, kai gomme pash tumende djiwau, mukenn tumenge tchi o baro Deblestar te penell. Har well kowa, te hom mulo?”
O tselo Israel hunte shunell koi gili
28 O Mose penas dureder: “Penenn, te wenn i phureder dran tumare familje un tumare pralstune kate pash mande khetne, te penap kai gili glan lengre kanda. Un ap o bolepen un ap i phub dau me gole, te shunenn jon, hoi wella pral tumende, te mukenn tumer man.
29 Me djinau, pal miro merepen dukrenn tumer o baro Debles, un djan ko dromestar tele, hoi tumende sikrom. Tumer krenn, hoi tchilatcho hi glan o baro Debleskre jaka, un mangenn wawar deblen an, un choirenn les koleha. Doleske well bari bibacht pral tumende.”
30 O Mose penas kai tseli gili glan i kanda i tsele Israelendar, kai kote khetne wan.