O Moseskro 4. liil
1
I laba i murshendar an o Israel wenn pre-tchinlo
1 Un o baro Dewel rakras o Moseha an o mulo tato them Sinai, an o Debleskro plachteno kheera, ap o ersto diwes, an o duito tchon, an o duito bersh, har jon dran ko them Egiptia win djan. Un o baro Dewel penas:
2-3 Tu un o Aron, tchinenn an i liil har bud mursh Israelitarja koi hi, kai hi soreles doha, te wenn le lurde. Tchinenn i laba hake murshendar pre, kai hi biish bersha phuro un phureder! Tchinenn ninna pre dran hawi familja jon wenna un koon lengro dad hi! 4 Lenn deesh-te-dui murshen, jek dran haki bari familja, hoi well kol deesh-te-dui Jakobeskre tchawendar, te wenn le ap tumari rig pash koi budi. Kal mursha hunte wenn i pralstune pral pengre menshende.
5 Kalla hi kol laba kol murshendar, kai ap tumari rig wenn:
Dran o kheer Ruben:
o Elizur, leskro dad hi o Shedehur.
6 Dran o kheer Simeon:
o Shelumijel, leskro dad hi o Zurishaddai.
7 Dran o kheer Juda:
o Nachshon, leskro dad hi o Amminadab.
8 Dran o kheer Issachar:
o Netanel, leskro dad hi o Zuar.
9 Dran o kheer Sebulon:
o Eliab, leskro dad hi o Helon.
10 Dran o kheer Efrajim, kai hi o Josefeskro tchawo:
o Elishama, leskro dad hi o Ammihud.
Dran o kheer Manasse, kai hi ninna o Josefeskro tchawo:
o Gamalijel, leskro dad hi o Pedazur.
11 Dran o kheer Benjamin:
o Abidan, leskro dad hi o Gidoni.
12 Dran o kheer Dan:
o Ahijeser, leskro dad hi o Ammishaddai.
13 Dran o kheer Asser:
o Pagijel, leskro dad hi o Ochran.
14 Dran o kheer Gad:
o Eljasaf, leskro dad hi o Deguel.
15 Dran o kheer Naftali:
o Ahira, leskro dad hi o Enan.
16 Kolla wan wi-rodedo dran i tsele Israelitarja. Hakeno his o pralstuno pral peskre menshende. Un jon wan i pralstune pral kol bud serja menshende an Israel.
17 Un o Mose un o Aron lan kal deesh-te-dui pralstunen pash pende. 18 Un jon anan i tsele Israelitarja khetne ap o ersto diwes an o duito tchon. Un i tsele mursha, hoi his biish bersh un phureder, mukan pengre laba an lila dren te tchinell. Jon wan jaake pre-tchinlo, te was diklo dran hawi familja hakeno was un koon leskro dad his. 19 Kowa kran le an o mulo tato them Sinai jaake har o baro Dewel ap o Moseste penas.
20-43 I laba kol tsele murshendar, kai his biish bersh un phureder un sorelo doha, te nai wenn le lurde, wan an lila dren tchinlo, hakeno pal peskri familja un dadeskro lab. Kolla his:
46.500 mursha dran o kheer Ruben, o Jakobeskro phureder tchawo.
59.300 mursha dran o kheer o Simeon.
45.650 mursha dran o kheer Gad.
74.600 mursha dran o kheer Juda.
54.400 mursha dran o kheer Issachar.
57.400 mursha dran o kheer Sebulon.
40.500 mursha dran o kheer Efrajim.
32.200 mursha dran o kheer Manasse.
35.400 mursha dran o kheer Benjamin.
62.700 mursha dran o kheer Dan.
41.500 mursha dran o kheer Asser
53.400 mursha dran o kheer Naftali.
44 Kalla hi kol mursha, kolengre laba o Mose un o Aron un kol deesh-te-dui pralstune pre-tchinan. Hakeno kol deesh-te-dujendar his i pralstuno pral peskre menshende.
45-46 I tsele mursh Israelitarja dran haki familja, hoi biish bersh un phureder his un sorelo doha, te nai wenn le lurde, his 603.550.
I laba kol murshendar dran o kheer Levi wenn gar pre tchinlo
47 Kolla, kai wan dran o kheer Levi, kolengre laba wan gar kol wawarentsa pre-tchinlo.
48 O baro Dewel penas o Moseske: 49 I Levitarja hunte tchiness gar an o liil dren, kai i wawar Israelitarja dren tchinlo hi, witar gar har bud jon hi. 50 Tu dess len gole, te budrenn jon an o Debleskro plachteno kheer, kai o Debleskre deesh laba dren hi, un ap halauter, hoi an kau kheer hi. Jon hunte hidjrenn o Debleskro kheer un halauter, hoi koi dren hi, un denn garda ap halauter, un tchiwenn pengre plachtene khera trul o Debleskro kheer.
51 Un te djan tumer dureder, tchiwenn kol Levitarja o Debleskro plachteno kheer khetne. Un te tchiwenn tumer tumare plachtene khera pre, palle tchiwenn i Levitarja o Debleskro kheer pale pre. Hako wawar, kai well pash o kheer, hunte merella.
52 Te djan tumer gar dureder, hunte beshenn pen i Israelitarja hakeno pash peskre menshende un pash ko pre-tchiddo kotar than, hoi sikrella, hawe menshendar jon hib. 53 Kol Levitarja hunte tchiwenn pengre plachtene khera trul o Debleskro plachteno kheer, kai o Debleskre deesh laba dren hi, te denn le garda, te well kek pash o kheer, jaake te well gar miri choli pral i Israelitarja. 54 Un i Israelitarja kran halauter jaake, har o baro Dewel ap o Moseste penas.