2
O Dewel dell haki familja peskri platsa
1 Un o baro Dewel rakras o Moseha un o Aroneha un penas lenge, 2 har i Israelitarja hunte tchiwenn pengre plachtene khera pre. Un job penas: Hakeno hunte tchiwell peskro kheer pre pash koi pre-tchiddo kotar than, hoi sikrella, hawe menshendar job hi. I tsele khera wenn pre-tchiddo trul o Debleskro plachteno kheer.
3-4 I platsa kol menshenge dran o kheer Juda hi glan o Debleskro kheer ap koi rig, kai o kham pre-djala, pash pengri pre-tchiddi plachta. Pash lende hi ninna lengre lurde, 74.600 (efta-deesh-te-star-serja-shob-sheel) mursha. Lengro pralstuno hi o Nachshon, koleskro dad o Amminadab hi. 5-6 Langs lende hunte tchiwenn kol menshe pengre plachtene khera pre, kai wenna dran o kheer Issachar, ninna lengre lurde, 54.400 (pantch-deesh-te-star-serja-star-sheel) mursha pengro pralstuneha, o Netanel. Leskro dad hi o Zuar. 7-8 Koi pashel wenna kol menshe, kai wenna dran o kheer Sebulon, ninna lengre lurde, 57.400 (pantch-deesh-te-efta-serja-star-sheel) mursha pengro pralstuneha, o Eliab, koleskro dad o Helon hi. 9 Kol tsele lurde, kai dran kal triin bare familje wenn, hi halauter khetne 186.400 (sheel-ochta-deesh-te-shob-serja-star-sheel) mursha. Un kolla hunte djan glan kol wawarende.
10-11 Un kote, kai o kham tato hi, hunte tchiwenn kolla pengre plachtene khera pre pash pengri pre-tchiddi plachta, kai wenna dran o kheer Ruben. Pash lende hi ninna lengre lurde, 46.500 (star-deesh-shob-serja-pantch-sheel) mursha pengro pralstuneha, o Elizur, leskro dad hi o Shedehur. 12-13 Langs lende hunte tchiwenn kol menshe pengre plachtene khera pre, kai wenna dran o kheer Simeon, ninna lengre lurde, 59.300 (pantch-deesh-te-enja-serja-triin-sheel) mursha. Lengro pralstuno hi o Shelumijel, leskro dad hi o Zurishaddai. 14-15 Koi pashel wenna kol menshe, kai wenna dran o kheer Gad, ninna lengre lurde, 45.650 (star-deesh-te-pantch-serja-shob-sheel-te-pantch-deesh) mursha pengro pralstuneha o Eljasaf, leskro dad hi o Deguel. 16 Kol tsele lurde, kai wenn dran kal triin bare familje, hi halauter khetne 151.450 (sheel-pantch-deesh-te-jek-serja-star-sheel-te-pantch-deesh) mursha. Un kolla hunte wenn kol duite, kai djan glan kol wawarende.
17 Pal lende djan i Levitarja. Jon hunte lenn o Debleskro plachteno kheer lentsa, kai o Debleskre deesh laba dren hi, un djan mashkral kol wawar menshende. Un jaake har jon pengre plachtene khera pre tchiwenn, jaake hunte djan jon ninna dureder: hakeno ap koi platsa, kai lengre pre-tchiddi plachta hi.
18-19 Ap koi rig, kai o kham tele djala, hunte tchiwenn kolla pengre plachtene khera pre pash pengri pre-tchiddi plachta, kai wenna dran o kheer Efrajim. Pash lende hi ninna lengre lurde 40.500 (star-deesh-serja-pantch-sheel) mursha. Lengro pralstuno hi o Elishama, leskro dad hi o Ammihud. 20-21 Langs lende hunte tchiwenn kol menshe pengre plachtene khera pre, kai wenna dran o kheer Manasse, ninna lengre lurde, 32.200 (trijanda-te-dui serja-dui-sheel) mursha. Lengro pralstuno hi o Gamalijel, leskro dad hi o Pedazur. 22-23 Koi pashel wenna kol menshe, kai wenna dran o kheer Benjamin, ninna lengre lurde, 35.400 (trijanda-te-pantch-serja-star-sheel) mursha. Lengro pralstuno hi o Abidan, leskro dad hi o Gidoni. 24 Kol tsele lurde, kai wenn dran kal triin bare familje, hi halauter khetne 108.100 (sheel-te-ochta-serja-jek-sheel) mursha. Un kolla hunte wenn kol triinte, kai djan glan kol wawarende.
25-26 Ap koi rig, kai o kham gar wella, hunte tchiwenn kolla pengre plachtene khera pre pash pengri pre-tchiddi plachta, kai wenna dran o kheer Dan. Pash lende hi lengre lurde 62.700 (shob-deesh-te-dui-serja-efta-sheel) mursha. Lengro pralstuno hi o Ahijeser, leskro dad hi o Ammishaddai. 27-28 Langs lende hunte tchiwenn kol menshe pengre plachtene khera pre, kai wenna dran kheer Asser, pengre lurdentsa, 41.500 (star-deesh-te-jek-serja-pantch-sheel) mursha. Lengro pralstuno hi o Pagijel, koleskro dad o Ochran hi. 29-30 Koi pashel wenna kol menshe, kai wenna dran o kheer Naftali, pengre lurdentsa, 53.400 (pantch-deesh-te-triin-serja-star-sheel) mursha. Lengro pralstuno hi o Ahira, koleskro dad o Enan hi. 31 Kol tsele lurde, kai dran kal triin bare familje wenn, hi halauter khetne: 157.600 (sheel-pantch-deesh-te-efta-serja-shob-sheel) mursha. Jon djan pal kol wawarende.
32 Har i tsele mursha, kai nai wenn lurde, dran haki familja an lila dre-tchinlo his, his le khetne 603.550 (shob-sheel-triin-serja-pantch-sheel-pantch-deesh) mursha. 33 Kokres i Levitarja wan gar pre-tchinlo. Jaake penas kowa o baro Dewel ap o Moseste.
34 Un i Israelitarja kran halauter jaake, har o baro Dewel kowa o Moseske penas. Jon tchiwan pengre plachtene khera pre, hakeno pash koi pre-tchiddi plachta, hoi sikras, hawe menshendar job hi. Un jaake djan le ninna dureder, hakeno peskre menshentsa un peskri familjah.