3
O Aroneskre tchawe
1 Kolla hi i laba o Aroneskre un o Moseskre menshendar, kai djiwan ap ko tsiro, har rakras o baro Dewel o Moseha ap i berga Sinai. 2 O Arones his star tchawe: Ko phureder kharell Nadab, koi pal well o Abihu, palle o Eleasar, un o Itamar. 3 Kal star wan o djeteha dre-maklo, te wenn jon rashaja, un budran an o Debleskro kheer. 4 Dui lendar, o Nadab un o Abihu meran an o mulo tato them Sinai glan o baro Debleste, har chatchran jon glan leste wawar koowa, hoi job gar penas. Un len his kek tchawe. O Eleasar un o Itamar kran pengri rashajeskri budi, khetne pengro dadeha, o Aroneha.
I Levitarja lenn pengri budi
5 Un o baro Dewel penas ap o Moseste: 6 “An kol menshen dran o kheer Levi kai! An len glan o rashajeste Aron, te wenn le leske koi. 7 Jon budrenna leske un i tsele Israelenge glan o Debleskro kheer, un hakeno lendar krell koi budi pash o Debleskro kheer, hoi leste dino well. 8 Un jon hunte denn jak ap o tselo koowa an o Debleskro kheer. Un jaake krenn jon koi budi, hoi i tsele Israelitarja hunte krans mange. 9 Un tu aness kol Levitarjen pash o Aron un leskre tchawende. Kowa hi jaake, har te anans len i Israelitarja pash lende, te krans le kolengri budi.
10 Ap o Aroneste un ap leskre tchawende hunte peness tu, te denn jon jak, te krell kek wawar lengre rashajeskri budi. Te well i wawar, te krell lo kai budi, hunte merell job.”
11 Un o baro Dewel penas ap o Moseste: 12-13 “Djiness, me rodom kol Levitarjen win dran kol Israelitarja, te wenn jon mire. Ap ko diwes, har marom i tsele phureder mursh tchawen an o them Egiptia, tchiwom i tsele phureder mursh tchawen an o Israel mange ap i rig, te wenn jon mire: kolla, kai i menshestar bolde wan har ninna kolla, kai i viechestar bolde wan. I tsele phureder mursh tchawe hi mange, o baro Debleske. Kanna lau gar kolen, kanna lau i Levitarja mange.”
I laba i murshendar dran o kheer Levi
14 Un o baro Dewel rakras o Moseha an o mulo tato them Sinai un penas: 15 “Tchin i laba kol murshendar dran o kheer Levi an i liil! Tchin ninna pre dran hawi familja jon wenna un koon lengro dad hi! Tchin kolen pre, kai hi jek tchon phuro un phureder!”
16 Un o Mose kras jaake har o baro Dewel leske penas.
17 O Levi, les his triin tchawe: o Gershon, o Kohat, un o Merari.
18 O Gershon: les his dui tchawe: o Libni un o Shimi.
19 O Kohat: leskre tchawe his: o Amram, Jizhar, Hebron un Usijel.
20 O Merari: leskre tchawe his o Machli un o Mushi.
Kowa hi i menshe, kai wenna pal o Levi peskre familjentsa.
21 I menshe, kai wenna o Leviteskro tchawestar Gershon hi i Libnarja un i Shimarja: 22 Khetne his le 7.500 (efta-serja-pantch-sheel) mursha, halauter, kai hi jek tchon phuro un phureder. 23 Un len hi pengri platsa pal o Debleskro kheer, ap koi rig, kai o kham tele djala. 24 Un lengro pralstuno hi o Eljasaf, leskro dad hi o Lael. 25 Lengri budi pash o Debleskro kheer hi, te denn le garda ap kowa, hoi win ap o kheer hi: kol plachte, hoi tchakrenn o kheer, koi plachta an o khereskro wudar, 26 ninna kol plachte, kai hi trul i platsa, hoi glan o kheer hi, kai ninna i sasterni chatchepaskria hi, kai vieche o Debleske chatchedo wenna. Ninna denn le jak ap koi plachta an o wudar glan koi platsa un ap i shelle un ko wawar koowa, hoi koi pashel hi.
27 I menshe, hoi wenna o Leviteskro tchawestar Kohat hi i Amramarja, i Jizhararja, i Hebronarja, un i Usijelarja. 28 Khetne his le 8.600 (ochta-serja-shob-sheel) mursha, halauter, hoi hi jek tchon phuro un phureder. Lengri budi hi, te budrenn le ap ko koowa an o Debleskro kheer. 29 Lengri platsa hi pash o Debleskro kheer, ap koi rig, kai o kham tato hi. 30 Lengro pralstuno hi o Elizafan, koleskro dad o Usijel hi. 31 Un jon hunte denn garda ap ko sonakaskro mochton, koi chapaskri, koi momelengri, o Debleskro sonakaskro bob un o Debleskri sasterni chatchepaskri, kai vieche chatchede wenna. Ninna denn le garda ap i tselo Debleskro koowa an leskro kheer, koleha jon budrenna, ninna ap koi plachta mank kol dui iseme un ap halauter, hoi koi pashel hi.
32 O rai pral i tsele pralstunende mank i Levitarja well o Eleasar, ko tchawo o rashajestar Aron, te dell job jak ap kolende, kai budrenn an o Debleskro kheer.
33 I menshe, hoi wenna o Leviteskro tchawestar Merari hi i Machlarja un i Musharja. 34 Khetne his le 6.200 (shob-serja-dui-sheel) mursha, halauter, hoi hi jek tchon phuro un phureder. 35 Lengro pralstuno hi o Zurijel, koleskro dad o Abichajil hi. Lengri platsa hi pash o Debleskro kheer ap koi rig, kai o kham gar wella. 36 Un lengre budi hi, te denn le garda ap kol kotja, dran kolende o kheer kerdo well: i tchinle kashta, i pandepaskre kashta, i pesse kashta un lengre pire, ap kolende jon tardo wenna, ninna o tselo wawar koowa, hoi koi pashel hi. 37 Ninna hunte denn le garda ap kol kotja, hoi trul o glanstuni platsa hi: kol pesse kashta un lengre pire, ap kolende jon tardo wenna, kol tikne sasterne kotja, hoi denn le an i phub, un i shelle.
38 Glan o Debleskro kheer, ap koi rig, kai o kham pre djala, hunte well koi platsa o Moseske un o Aroneske peskre tchawentsa, te denn jon garda, te well o Debleskri budi mishto kerdo i tsele Israelenge. Un te well i wawar pash o Debleskro kheer, te krell lo kai budi, hunte merell lo.
39 I tsele mursha, kai wenna o Leviteskre mursh tchawendar, his khetne 22.000 (biish-te-dui-serja). Kowa hatsas o Mose un o Aron win, har tchinan le i laba kolendar an i liil, kai hi jek tchon phuro un phureder. Kowa kran le jaake, har o baro Dewel les lenge penas.
I phureder mursh tchawe hi o Debleske
40 Un o baro Dewel penas ap o Moseste: “Hatse win har bud mursha mank i Israelitarja hi, kai hi i phureder tchawe pengre dajendar. Tchin i laba kolendar an i liil, kai hi jek tchon un phureder. 41 Hako phureder mursh tchawo mank i Israelitarja hi miro. Me hom o baro Dewel. Hako phureder mursh tchaweske dess tu mande jek Levitari. Ninna hako phureder mursh viecho, hoi i Israelitarjen hi, hi miro. Hakeneske lendar dess tu mande jek viecho, hoi i Levitares hi.”
42 Un o Mose kras, hoi o baro Dewel leske penas, un tchinas i laba kol tsele murshendar an i liil, hoi i phureder tchawe pengre dajendar hi. 43 Un halauter, hoi jek tchon hi un phureder, his khetne 22.273 (biish-te-dui-serja-dui-sheel-efta-deesh-te-triin).
44 Un o baro Dewel rakras o Moseha un penas: 45 “Hako phureder mursh tchaweske mank i Israelitarja le i Levitari, te well lo mange, o baro Debleske! Un le kol viechen, hoi i Levitarjen hi, un gar kolen, hoi i Israelitarjen hi! 46 Kanna hi 273 (dui-sheel-efta-deesh-te-triin) mursha budeder, kai phureder tchawe hi, har dell Levitarja. Kolen hunte ginenn tumer mandar pale. 47 Hakeneske lendar less tu pantch kotja rup. Jek kotar rup hunte well jaake pharo har kol kotja rup an o Debleskro kheer hi: deesh-te-dui gramme pharo. 48 Un tu dess ko rup o Aroneste un leskre tchawende. Ko rup well kol murshenge plaissedo, kai budeder hi har kol Levitarja.”
49 Koi las o Mose ko rup kolendar, kai budeder hi har kol Levitarja. 50 Jaake las lo kol murshendar un tchawendar, hoi i phureder tchawe his, khetne 1.365 kotja rup, hako kotar rup jaake pharo har kol kotja an o Debleskro kheer. 51 Un o Mose das ko rup o Aroneste un leskre tchawende, jaake har o baro Dewel kowa leske penas.