O Moseskro 5. liil
1
I Israelengro drom mank i berga Horeb un o panjengri platsa Kadesh
1 Kalla hi i laba, hoi o Mose ap i tsele Israelitarja penas, har his le an o mulo tato them ap i wawar rig o panjestar Jordan, an ko telstuno kotar them pash Suf mashkral o foro Paran ap jek rig un kol forja Tofel, Laban, Hazerot un Di-Sahab ap i wawar rig. 2 [Deesh-te-jek diwessa hi o drom lengsto mank i berga Horeb un o foro Kadesh-Barnea ap i berge Seir.]
3 An o star-deshto (40) bersh ap o ersto diwes an o deesh-te-jekto tchon penas o Mose ap i tsele Israelitarja halauter, hoi o baro Dewel leske penas, te hunte krenn le. 4 Kowa his pal kowa job kol dui bare rajen das: o Sihon, ko baro rajes pral i Amorarja, kai an o foro Heshbon djiwas, un palle pash Edrei o Og, ko baro rajes pral Bashan, kai an o foro Astarot djiwas. 5 Ap i wawar rig o panjestar Jordan an o them Moab, sikras o Mose i menshende o baro Debleskro drom. Kalla hi leskre laba:
6 Maro baro Dewel rakras mentsa pash i berga Horeb un penas: Doha hans kanna pash kai berga: 7 Stenn kanna pre un djan dureder pash i berge, kai i Amorarja djiwenn, un kote, kai kol Kanaanitarja djiwenn:
an o telstuno them o panjestar Jordan,
un an o pralstuno them,
un an o diwjo them Shefelah
un an o them Negev
pash o baro pani
bis pash i berge Libanon un o baro lengsto pani Eufrat.
8 Kau tselo them tchiwom me glan tumende, djan tumer koi, un lenn les tumenge dren! Kowa hi ko them, kolestar o baro Dewel tumare phurende, o Abrahameste un o Isaakeste un o Jakobeste pes sowel das, te dell lo les lende un lengre tchawende un kolende, kai pal lende wenna.
9 O Mose penas dureder: Kote pash i berga Horeb penom tumenge: “Me kokres nai hidjrau tumen gar. 10 Tumaro baro Dewel kras tumen jaake bud. Tumer han kau diwes jaake bud har kol momlia an o bolepen hi. 11 Mu tchiwell job, ko Dewel tumare phurendar, gomme jek sero (1.000) kope jaake bud pashel. Mu tchiwell lo peskri bacht un soor ap tumende, jaake har job pral tumende win rakras.
12 Djinenn, me nai hidjrau koi budi hoi tumer mange krenn, gar kokres, nai rakrau gar kokres o tchatchepen win an tumaro tselo koowa, un tumaro tselo tchingepen! 13 Lenn tumenge dran tumare bare familjen gosewe un an-dikle murshen, kai haiwenn, hoi mishto un gar mishto hi! Kolen tchiwau pral tumende, te wenn le tumare tchatchepangre mursha.”
14 Tumer penan koi pre: “Mishto hi ko kowa, hoi tu kameh te krell.” 15 Un me lom i pralstune murshen dran tumare bare familjen, gosewe un an-dikle murshen un tchiwom len pral tumende, te wenn le tumare tchatchepangre mursha. Jon wan pralstune pral 1.000 (jek sero), pral 100 (jek sheel) un pral 50 (i paash-sheel) un pral 10 (deesh).
16 Ap kal tchatchepangre murshende penom ko tsireske, hoi te krenn le, un penom: “Shunenn, hoi tumare phralen, kai tchingepen mashkral pende hi, tumenge penenna. Kowa nai well i tchingepen mashkral tumen Israelitarjen, nai well ninna i tchingepen mashkral jekeste tumare menshendar un jekeste dran i wawar them, kai pash tumende djiwell. Denn koles o tchatchepen, kai an o tchatchepen hi. 17 Un dikenn gar koi pre, koon glan tumende tardo hi! Shunenn i tiknen un i baren! Ma darenn kekestar! Krenn jaake o tchatchepen win, har te krals kowa o Dewel! Sawo koowa, hoi tumenge phares hi, kowa anenn pash mande, te shunap me kowa.” 18 Ko tsireske penom me tumenge ninna ko wawar koowa, hoi hunte krenn.
19 Mer kram, hoi maro baro Dewel menge penas, un djam dureder un mukam i berga Horeb pal mende, un kram men ap o drom an o pralstuno them, kai i Amorarja djiwan. Ap maro drom hunte djam an o baro mulo them trujel, hoi jaake dareno hi, har tumer dikan, un wam pash o foro Kadesh-Barnea. 20 Kote penom tumenge: “Kanna ham tardo glan o pralstuno them, kai i Amorarja djiwenn. Kau them dell tumen maro baro Dewel. 21 Job das kau them an tumare wasta. Djan koi un lenn les dren, te well lo tumaro, jaake har penas tumenge o baro Dewel, ko Dewel, kones tumare phure an-mangan. Ma trashenn un mukenn tumenge kek daar te krell!”
22 Un tumer wan halauter pash mande un penan: “Mer kamah murshen glan win te bitchrell, te dikenn le pen trujel an ko them, te penenn la menge ap hawo drom mer dren djas, un hawe forja koi hi.”
23 Un kowa his mishto an mire jaka un me lom deesh-te-dui murshen dran tumende, jek murshes dran haki bari familja. 24 Kolla kran pen ap o drom, un djan pre an o pralstuno them, un wan bis pash i tala Eshkol, un dikan pen kote trujel. 25 Jon lan kolestar, hoi an ko them bares was, un anan les pash mende. Un penan menge hoi le halauter dikan, un penan: ‘Kau them hi mishto, hoi o baro Dewel men dell.’ 26 Tumer kaman gar koi te djal, un shunan gar ap i laba o baro Deblestar, kai tumaro Dewel hi. 27 Un tumen tchingran an tumare plachtene khera un penan: ‘O baro Dewel hi chojedo ap mende. Doleske las lo men dran o them Egiptia win, te dell lo men an i wasta fun o Amorarja, te denn kolla men mulo. 28 Kai djas koi? Mare phrala kran mare djia darenes, har penan le ap mende: Kolla menshe hi sorleder un bareder har mer, lengre forja hi baro un lengre massurja djan pre bis pash o bolepen. Un ninna dikam mer o Anakarja kote!’
29 Kote penom me ap tumende: “Ma mukenn tumenge daar te krell un ma trashenn lendar! 30 Tumaro baro Dewel djal glan tumende win un kurell pes tumenge, jaake har lo glan tumare jaka an o them Egiptia tumenge kras. 31 Un an o mulo tato them hidjras lo tumenge har i dad peskro tchawes ap tumaro tselo drom, hoi djan bis kate, kai kanna han.”
32 Ninna te dikan tumer kowa lauter, kaman tumer tumaro baro Debles gar te patsell, 33 koles, kai o tselo drom glan tumende djas, te sikrell lo tumende i platsa, kai nai tchiwenn tumen tele, Job sikras tumenge o drom rati an i jag, un pral o diwes an i wolka.
34 Har o baro Dewel shunas koi gole hoi dan, was lo chojedo, un das pes sowel, un penas: 35 “Ma patsenn, te dikell jek mursh kal tsele murshendar kau latcho them, hoi me man pash lengre phurende sowel dom, te dap les lenge. 36 Kokres o Kaleb, koleskro dad o Jefunne hi, dikell ko them. Un les un leskre tchawen dau ko them, kai job pre stakras. Job patsas man un kras, hoi penom.”
37 Un dran kowa, hoi tumer kran, was o baro Dewel ninna chojedo ap mande un penas: “Ninna tu, o Mose, wess gar an ko them! 38 O Josua, koleskro dad o Nun hi, kowa, kai glan tumende tardo hi, kowa well an ko them. Koles kre soreles! Job anell i Israelenge an kau them, te lenn le les dren.”
39 Palle penas o baro Dewel ap mende lauterende: “Tumer penan: ‘Mare tchawe perenn kolenge an i wasta, kai hi chojedo ap mende.’ Me penau tumenge: Jon, kai kau diwes gomme gar djinenn, hoi mishto un hoi tchilatcho hi, hi kolla, kai wenn an o them dren, te lenn le les dren. 40 Tumer, rissrenn tumen un djan an o mulo them, ko drom, hoi pash o Baro Lolo Pani djal!”
41 Kote penan tumer ap mande: “Mer kram tchilatchepen glan o baro Debleste. Kanna kamah pre te djal un men lentsa te kurell, jaake har maro baro Dewel penas, te kras kowa.”
Un hakeno tumendar pandas peskre kurepaskre koola trul peste. Un tumer patsan, te hi gar phares pre te djal an o kurepen.
42 Kote penas o baro Dewel ap mande: “Pen lenge: Ma djan pre, te kurenn tumen lentsa! – Me hom gar tumentsa. – Te wenn gar kolendar mulo dino, kai kamenn tumen te marell.”
43 Har penom me kowa ap tumende, kaman gar te shunell, un kran gar, hoi o baro Dewel tumenge penas. Tumer djan pal tumaro shero, un djan pre an o pralstuno them. 44 Un i Amorarja, kai kote djiwan, wan win un djan ap tumende pre, un tradan tumen an o them Seir, har biene jekes palla lenn. Un dan tumen pash o foro Horma. 45 Kote wan tumer pale pale, un rowan glan o baro Debleste; o baro Dewel shunas gar ap tumende, un das gar jak ap tumari gole. 46 Jaake atchan tumer ap i panjengri platsaa Kadesh i rah tsiro.