O liil pral o Josua
1
O Josua well o pralstuno pral o Israel
1 Un har meras o Mose, koles o baro Debleskro tchatcho wast his, rakras o baro Dewel ap o Moseskro budepaskro, o Josua, koleskro dad o Nun his, un penas:
2 “O Mose, koles miro tchatcho wast his, hi mulo. Kanna dja tu un i tsele Israelitarja pral o pani Jordan an ko them, hoi me len dau! 3 Hako kotar phub, kai tumer tumare herjentsa pre stakrenn, dom me tumende, jaake har kowa ap o Moseste penom. 4 Ko tselo them mank kau mulo tato them un i berge Libanon, un mank o baro lengsto pani Eufrat un o baro pani, hoi kote hi, kai o kham tele djala, kowa well tumaro them. Ninna o them, kai i Hetarja djiwenna, well tumaro.
5 Kek nai well sorleder har tu, jaake rah har tu djiweh. Jaake har me o Moseha homs, jaake wau me tuha. Me mukau tut gar, un me djau gar tutar. 6 Ab soreles un ma traash! Tu dess kal menshen pengro them, kai me man sowel dom glan lengre phurende, te dap len kowa!
7 Tu, ab soreles un ma traash, un rike tut ap mire tsele laba, hoi penas tuke o Mose, koles miro tchatcho wast his. Ma dja kolendar tele, gar ap i tchatchi rig un witar gar ap i serwi rig, te well halauter mishto, kai tu ninna djah. 8 Pen tuke kol laba glan, hoi an ko liil tchinlo hi! Ap o diwes, har an i rat, muk len tuke an tiro shero trujel te djal, te rikress un kress halauter, hoi an ko liil tchinlo hi. Palle djal tuke halauter mishto, un kowa, hoi kreh, well mishto.
9 Penau tuke pale: Ab soreles! Un ma traash gar! Ma dare tchi! Un ma traash kekestar! O baro Dewel hi tiro Dewel un hi tuha, kai tu ninna djah.”
O Josua krell halauter, te nai djan le an pengro them dren
10 Kote penas o Josua ap i pralstunende pral i Israelitarja: 11 “Djan mashkral i plachtene khera un penenn i menshenge: Lenn chapen un pipen pash tumende o dromeske! An triin diwessa djan tumer pral o pani Jordan an ko them dren, hoi dell tumen o baro Dewel, kai tumaro Dewel hi, te well ko them tumaro!”
12 Un o Josua penas ap kol menshende, kai dran o kheer Ruben un dran o kheer Gad his, un ap i paash kolendar, kai dran o kheer Manasse his: 13 “Ma bistrenn ko lab, hoi penas tumenge o Mose, koles o baro Debleskro tchatcho wast his. Job penas: O baro Dewel, kai tumaro Dewel hi, job kras, te wan khere un das tumen kau them. 14-15 Tumare romja un tumare tchawe un tumare vieche atchenn an kau them, hoi o Mose tumen das, ap kai rig o panjestar Jordan. Tumer mursha, halauter kai han tchatche kurepangre, lenn tumare charea tumentsa, un djan glan tumare phralende ap i wawar rig! Jon hi tumare phrala. Doleske hunte wenn lenge ap i rig jaake rah, bis te dell o baro Dewel lende ninna o them, kai jon khere wenn, jaake har tumen. Palle djan tumer pale pale an tumaro them, hoi das tumen o baro Debleskro budepaskro, o Mose: ko them, hoi ap kai rig o panjestar Jordan hi, kai o kham pre djala.”
16 Un jon penan ap o Josua: “Lauter, hoi tu penal te kras, kowa krah mer! Un kai tu men bitchreh, kote djah mer! 17 Jaake har mer ap o Mose shunam, jaake shunah mer ap tute. Mu well o baro Dewel, kai tiro Dewel hi, jaake tuha, har lo o Moseha his! 18 Un hakeno, kai gar ap tute shunell, un witar gar ap kol tsele laba, hoi tu menge peneh, te kras mer, kowa well mulo dino! Tu, ab soreles un ma traash!”