2
I Israelengro drom an o mulo tato them
1 Koi pre stam pre un rissram men un djam pale an o mulo tato them ap o drom, hoi djal pash o Baro Lolo Pani, jaake har o baro Dewel kowa mange penas. I rah tsiro nasham trul kol berge Seir. 2 Palle penas o baro Dewel ap mande: 3 “Doha tsiro nashan an kal berge trujel. Djan kanna dureder ap koi serwi rig. 4 Un pen i menshenge Israel: Ap tumaro drom wenn tumer kanna an o them tumare phralendar, kol menshendar, kai wenn pal o Esau, un djiwenn ap i berge Seir. Un jon darenn tumendar. Jaake denn jak, 5 te mukenn tumen ap kek tchingepen lentsa dren. Me dau tumen kek piro baro kotar lengro themestar. I berge Seir dom me o Esaeste, te hi le leske. 6 Te wenn an lengro them, ginenn chapen lowentsa lendar, te well tumen tchomone te chal. Un ninna pani ginenn lowentsa lendar, te well tumen tchomone te pijell.”
7 Ma bistrenn, maro baro Dewel das men bacht an halauter, hoi mare wasta kran. Job das jak ap mende ap o drom an kau baro mulo them: Star-deesh (40) bersha his o baro Dewel mentsa, un halauter hoi men hunte was, das lo men.
8 Jaake djam dureder un mukam mare phralen pal mende, kol menshen, kai wan o Esaestar, un djiwenn ap i berge Seir. Un mer mukam o drom, hoi djal dran i forja Elat un i Ezjon-Geber an i tala Jordan bis pash o Mulo Baro Pani, un rissram un lam o drom, hoi djal an o mulo tato them Moab. 9 Un o baro Dewel penas ap mande: “Kre i menshenge an o them Moab kek tchilatchepen, un ma muk tut an i tchingepen lentsa dren! Ma bistrenn, jon hi i menshe, kai wenna pal o Lot. Lenge dom o foro Ar un ko them trujel, te djiwenn le kote. Me kamau tut tchi lengro themestar te dell.”
10 Glan lende djiwan kol Emarja koi. Kolla his bud un bare lengste menshe, jaake baro har kol menshe Anak. 11 Jon un kol Anakarja wan ninna kharedo ‘riese’. I Moabarja penenn Emarja ap lende.
12 Ap i berge Seir djiwan glan kowa i Horarja. Un kol menshe, kai wan pal o Esau, tradan len kotar krik un dan len mulo, un djiwan palle koi, jaake har o Israel les ninna kras ko themeha, hoi les dino was o baro Deblestar.
13 O Mose penas dureder: Palle kram men ap o drom, jaake har o baro Dewel menge penas, un djam wergel ko lengsto pani, hoi kharella Sered. 14 Kowa his 38 (trijanda-te-ochta) bersha pal ko diwes, kai djam o ersto kopo dran Kadesh-Barnea. An ko tsiro bersha meran i tsele kurepangre dran Israel, jaake har o baro Dewel pes sowel das, te well kowa jaake. 15 Leskro wast his phares ap lende, bis te kol tsele kurepangre mulo his, un kek lendar pral atchas. 16 Un har i kurepangre dran Israel halauter mulo his, 17 penas o baro Dewel ap mande: 18 “Tu djah kau diwes an o them, kai i Moabarja djiwenn, pash o foro Ar. 19 Un tu weh pash o them, kai i Ammonarja djiwenn, kol menshe, kai wenna pal o Lot. Kolenge kress kek tchilatchepen! Un muk tut ap kek tchingepen lentsa dren. Me dau tut kek kotar lengro themestar, hoi dom lende.”
20 Ninna an ko them djiwan glan i rah tsiro bare lengste menshe, kai wenn ‘riese’ kharedo. I Ammonarja kharenn len Samsumarja. 21 Kolla his bud un bare lengste menshe, jaake bares har i Anakarja. Un o baro Dewel tradas len krik dran o them glan i Ammonarja, te lenn kolla ko them un djiwenn palle koi dren. 22 Jaake kras o baro Dewel kowa ninna i menshenge, kai wan o Esaestar un djiwenn an i berge Seir. Glan lende tradas job i Horarja win, un das len kolengro them. Kote djiwenn le bis ap kau diwes. 23 Un an i gaba pash o Mashkralstuno Baro Pani djiwan menshe, kai his kharedo Awarja. Pral lende wan Filistarja dran Kreta, un dan len mulo, un lan lengro them bis pash o foro Gaza. Un djiwan palle kote.
24 Har djam win dran o them Moab, penas o baro Dewel ap mende: “Krenn tumen ap o drom, un djan pral ko lengsto pani Arnon! An tiro wast dom o baro rajes pral i Amorarja, o Sihon, kai djiwell an o foro Heshbon. Kurenn tumen leha, un lenn leskro them tumenge dren! 25 Kau diwesseha krau te darenn tumendar i menshe an hake themma. Koon tumendar shunella, trashell un trissell i darjatar.”
I Israelitarja lenn o them o baro rajestar Sihon dren
26 Koi bitchrom murshen dran o mulo them Kedemot pash o Sihon, ko baro rai an o foro Heshbon, te penenn le leske: “Mashkral mende well kek tchingepen un marepen: 27 Muk men ap koi wawar rig tiro themestar te djal. Ap o drom kamah te atchell, gar tchatches un gar serwes lestar kamah te djal. 28 Hoi men hunte well chapaske, ginah mer lowentsa tumendar. Ninna pani denn tumer men lowenge, te well men tchomone te pijell. Mer kamah tchi wawar har te djal ap koi wawar rig tiro themestar, 29 bis te was mer wergel o pani lengsto Jordan an ko them, hoi maro baro Dewel men della. Dik, ninna i Edomarja, kai djiwenn an Seir, un i Moabarja, kai djiwenn an Ar, kolla mukan men wergel lengre themma te djal.”
30 O Sihon, ko baro rai an Heshbon, kamas men gar wergel leskro themestar te djal. Tumaro baro Dewel mukas leskro dji har bar te well, jaake te dikas lo tchi dren. Jaake das o baro Dewel les un leskro them an tumare wasta. Un kowa his gomme kau diwes jaake. 31 Un o baro Dewel penas ap mande: “Shun, me mukau tumen o Sihones un leskre lurden te dell, un leskro them dren te lell. Djan koi un lenn les dren, te well les tumenge.”
32 Un o Sihon djas win dran o foro peskre tsele lurdentsa, te kurenn le pen mentsa pash o foro Jahaz. 33 Un maro baro Dewel das len an mare wasta, jaake te maram les un leskre tchawen un leskre tsele lurden. 34 Palle lam leskre tsele forja dren, un dam hakenes mulo: mursha un djuwja un tchawe, kek lendar atchas djido. 35 Kokres lengre viechen randam lendar, un tchoram lengre forja win, hoi dren lam. 36 Maro baro Dewel das i tsele forja an mare wasta: ko foro Aroer, hoi pash o lengsto pani Arnon tchiddo hi, un ko foro hoi tella an o panjeskri tala tchiddo hi, un i tsele forja bis pash o them Gilead. Kek foro his koi, hoi sorleder his har mer. 37 Pash ko them, hoi i Ammonarja djiwenn, djam gar, gar pash o lengsto pani Jabbok, witar gar pash i forja ap i berge. Jaake kamas kowa maro baro Dewel.