3
I Israelitarja lenn o them o baro rajestar Og dren
1 Kote rissram un lam o drom, hoi an o them Bashan pre djal. Un o Og, ko baro rai pral Bashan, djas win peskre tsele lurdentsa, te kurenn le pen mentsa pash o foro Edrei. 2 Un o baro Dewel penas ap mande: “Ma dare lestar, me dom les un leskre tsele lurden un leskro them an tiro wast. Kre leha har kowa o Sihoneha kral, ko baro rajeha pral i Amorarja, kai an o foro Heshbon djiwas.”
3 Un o baro Dewel das ninna o Og, ko baro rajes pral Bashan peskre tsele lurdentsa an mare wasta. Un mer dam len jaake rah bis te kek lendar buder pral atchas. 4 An ko tsiro lam ko tselo kotar them Argob dren an o them Bashan, pral kowa o Og o rai his, un leskre tsele forja. Das kek foro lestar, hoi mer gar dren lam. Kolla his 60 (shob-deesh) forja. 5 Hako foro his i sorelo foro, koles bare massurja trul peste his. An lende his bare wudja, hoi sasterentsa pandlo wan. Ninna his kote bud gaba, kolen kek massurja his. 6 Un mer dam hakenes mulo, kai kote djiwell: mursha un djuwja un tchawe, jaake har les ninna o baro rajeha Sihon an Heshbon kram. 7 Lengre vieche un ko kutch koowa, hoi an i forja his, randam menge.
8 Jaake lam menge an ko tsiro ko them dren, hoi his an i wasta kol dui bare rajendar pral i Amorarja, – ko them, hoi ap i wawar rig o lengsto panjestar Jordan tchiddo hi, mank o lengsto pani Arnon un i berga Hermon. 9 [Ap i berga Hermon penenn i menshe dran o foro Sidon ‘berga Sirjon’. Un i Amorarja penenn ‘Senir’ ap late.] 10 Kolla his i tsele forja an o pralstuno them, ninna o tselo them Gilead, un o them Bashan bis pash i forja Salka un Edrei. Kol tsele forja pral kolende o Og dran Bashan o rai his, lam menge dren.
11 Kokres o Og, ko baro rai pral Bashan, atchas djido kol bare menshendar, kai ‘riese’ kharedo wan. Har meras lo, was lo paskedo an i barrengro mochton. Kowa hi jaake star metarja baro un dui metarja buchlo, un hi tardo an o foro Rabbaa an o them Ammon.
O them i familjenge Ruben un Gad un i paash familjake Manasse
12 Kau tselo them lam mer an ko tsiro menge dren. Ko them, hoi hi tchiddo serwes o forestar Aroer un o lengsto panjestar Arnon dom me i familjake Ruben un i familjake Gad. Ninna dom me len o paash them Gilead un kol forja koi dren. 13 Un ko wawar paash o themestar Gilead un o tselo them Bashan, kai o Og o rai his, kowa dom i paash familjake Manasse. Kowa his o tselo kotar them Argob. [Kau tselo them Bashan well kharedo ‘o them fun i riese’. 14 O Jair dran i familja Manasse las ko tselo kotar them Argob bis pash o them, kai i Geshurarja un i Maachatarja djiwenn. O Jair kharas kol gaba an o them Bashan pal peskro lab ‘o Jaireskre gaba’. Un jaake kharenn le gomme kau diwes.] 15 O them Gilead dom me o mursheste Machir dran i familja Manasse. 16 Un i menshenge dran i familja Ruben un dran i familja Gad dom me ko kotar them tchatches o themestar Gilead bis pash o lengsto pani Arnon – bis mashkral an kau pani. Ap koi rig, kai o kham pre djal, djas lengro them bis pash o lengsto pani Jabbok. Ap leskri wawar rig hi o them Ammon. 17 Ap i rig, kai o kham tele djal, djal o them bis pash o lengsto pani Jordan, un kote fun o pani Kinneret bis pash o Londo Baro Pani, un bis tella pash i berga Pisga, kote kai o kham pre djal.
18 An ko tsiro penom i murshenge dran kol familja Ruben, Gad un Manasse: “Tumaro baro Dewel das tumen kawa them, te lenn les tumenge dren. Kanna lenn tumaro kurepaskro koowa un djan tumare phralenge, kol wawar Israelenge glan win. 19 Mukenn tumare djuwjen un tumare tchawen an tumare forja, hoi me dom tumen. Ninna tumare viechen mukenn kote. Djinau, tumen hi bud vieche. 20 Tumer kurepangre, awenn tumare phralenge pash o wast jaake rah bis te lan le ko them dren, hoi o baro Dewel len della ap i wawar rig o panjestar Jordan, un bis te mukell lo len kote te djiwell kek kurepah, jaake har job ninna tumenge kras. Palle nai djan tumer pale an tumaro them, hoi tumende dom.”
21 An ko tsiro penom ap o Josua: “Tire jaka dikan kowa halauter, hoi tumaro baro Dewel kal dui rajentsa kras. Un jaake krell o baro Dewel hako rajeha an hako them, kai tu djah. 22 Ma dare lendar! Tumaro baro Dewel hi kowa, kai kurell pes tumenge.”
O Mose well gar an o them Kanaan
23 An ko tsiro mangom o baro Debles miro tselo djijeha un penom: 24 “Baro Dewel, miro rai, tu sikral man, tiro budepaskres, tiro barepen un tiro sorelo wast. An o bolepen un ap i phub hi kek wawar dewel, kai nai krell sawo baro koowa an sawi bari soor har tu. 25 Mangau tut, muk man pral o pani Jordan wergel te djal un ko latcho them te dikell, hoi kote hi, kol shukar berge un o Libanon.”
26 O baro Dewel his chojedo pral mande dran kowa har tumer hans, un shunas doleske gar ap mande. Un penas: “Muk tele! Kanna hi doha! Rake mange gar buder pral ko koowa! 27 Dja pral pre ap i berga Pisga, un dik tut trujel, dik serwes un tchatches un glan un pal tute! Dik lauter mishto an! Tu djiness, te djas tu gar pral o Jordan wergel. 28 Un pen ap o Josua: ‘Ma traash, ab soreles!’ Job hi kowa, kai djal glan i Israelitarjen wergel o pani Jordan, un anell len dren an ko them, hoi tu dikeh, te lenn le les penge dren.”
29 Un mer atcham an o telstuno them, ap i wawar rig o forestar Bet-Peor.