4
O Mose penell i menshenge, te rikrenn le pen ap o Debleskre laba
1 Kanna shun, Israel, hoi tumaro baro Dewel tumendar kamell. Denn jak ap leskre tchatchepaskre laba, hoi me tumen sikrau. Rikrenn tumen ap kowa, te atchenn djido, un te wenn dren an ko them, te nai lenn les tumenge dren, ko them, ap koleste tumaro baro Dewel tumare phurenge pes sowel das, te dell lo les lende. 2 Tchiwenn kek lab koi pashel, hoi me penom, te hunte krenn! Lenn ninna tchi kolestar krik, te rikrenn les gar. Rikrenn tumen ap i laba tumaro baro Deblestar, hoi me tumenge penau. 3 Tumare jaka dikan, hoi o baro Dewel kras pash i berga Baal-Peor. Hakenes, kai o chocheno debles Baal an-mangas, maras tumaro baro Dewel mashkral tumende. 4 Tumer, kai rikrenn tumen ap tumaro baro Debleste, tumer halauter djiwenn ninna kau diwes.
5 Dikenn, me sikrom tumende, hoi o baro Dewel tumendar kamella, leskre tsele tchatchepaskre laba, jaake har miro baro Dewel mange penas, te krenn tumer an o them, an kowa tumer wenna un les tumenge dren lenna. 6 Jaake denn jak ap kol laba, un rikrenn len! Palle dikenn i menshe an i wawar themma, har gosewe han. Te shunenn le, pal hawe laba tumer djiwenna, palle penenn le: “Hawe gosewe menshe hi kolla, kai prindjrenn pen an halauter win! Hawi bari soreli natsjona!”
7 Kai hi sawi bari natsjona, kolenge lengro dewel ap i rig well, har menge maro baro Dewel ap i rig well hako kopo, kai dah mer les an-gole? 8 Kek wawar bari natsjona della, kai i menshen sawe latche un tchatche laba hi, hoi lende sikrenn har te djiwenn le, har kal laba, hoi me kau diwes glan tumende tchiwau. 9 Denn soreles jak ap tumende, te bistrenn gar – jaake rah har djiwenn, – hoi tumare jakentsa dikan! Un penenn tumare tchawenge un lengre tchawenge, 10 hoi djas ap ko diwes, har tumer glan tumaro baro Debleste tardo hans pash i berga Horeb. Kote penas job ap mande: “An i tsele menshen khetne, te shunenn le, hoi lenge penau, te krenn le hako diwes, hoi lendar kamau, jaake rah har djiwenn le, un te penenn le kowa ninna pengre tchawenge.”
11 Kote wan tumer un hans tella pash i berga tardo, un i berga chatchas bis pre an o bolepen. Trul late his kale wolke un baro tamlepen. 12 Un o baro Dewel rakras ap tumende dran koi jag win. Leskro rakepen shunan tumer, un dikan kekes. 13 Un job kras tumentsa win, te hi lo tumaro Dewel, un tumer han leskre menshe. Un job das tumen kol deesh laba, hoi tchinas lo an dui barra, un penas tumenge, te hunte rikrenn tumen ap kowa, hoi tumer leha win kran un hunte djiwenn pal kol deesh laba.
14 An ko tsiro penas o baro Dewel mange, te sikrap tumen, hoi lo tumendar kamell un leskre tchatchepaskre laba, te djiwenn pal lende an ko them, an kowa tumer dren djan, te lenn les tumenge dren.
Ma mangenn chochene deblen an!
15 Jaake denn jak, te bistrenn gar: Ap ko diwes, har o baro Dewel pash i berga Horeb, dran i jag win tumentsa rakras, dikan tumer les gar. 16 Doleske krenn tumenge kek figura, hoi an-mangenn! Kowa wals i tchilatcho koowa glan o Debleskre jaka, te krans tumer tumenge i dewel, hoi win dikell har i mursh, i djuwel, 17 i viecho ap o them, i tchirklo ap o bolepen, 18 i tikno viecho, hoi djal pral i phub, oder i matcho an o pani. 19 Te hadenn tumare jaka pre pash o bolepen un dikenn o kham un o moonto un i tsele bolepangre momlia, ma mukenn tumen kolendar krik te tserdenn, te tchiwenn tumen tele glan lende un mangenn len an. Tumaro baro Dewel das len i menshenge an i wawar themma ap i phub. 20 Tumen las o baro Dewel dran o them Egiptia win, har dran i sasterno jagakro bob, jaake bud duka hunte lan kote ap tumende. Tumen las lo koi win, te wenn tumer leskre menshe, kai kokres leske koi hi, jaake har kowa ap kau diwes kate ninna hi.
21 Un dran kowa, hoi tumer kran, was o baro Dewel ninna chojedo ap mande, un das pes sowel, te djap me gar wergel o lengsto pani Jordan, un te wap gar an ko latcho them, hoi dell tumen tumaro baro Dewel, te well les tumenge. 22 Me merau an kawa them, me djau gar wergel o pani Jordan. Tumer djan ap i wawar rig, un lenn ko latcho them tumenge dren. 23 Kanna denn tumen jak, te bistrenn gar, hoi tumaro baro Dewel tumentsa win kras! Ma krenn tumenge i figura tchomonestar, hoi mangenn an, har te wals i dewel. Tumaro baro Dewel penas tumenge soreles, te krenn kowa gar. 24 Job hi i soreli jag, hoi halauter pre chatchrell, un kamell, te kamenn tumer les kokres.
25 Te djiwan tumer an o them bud bersha un tumen hi tchawe un tchawengre tchawe kote, ma krenn tumenge i debleskri figura tchomonestar! Kowa wals tchilatcho glan i jaka o baro Deblestar. Te krenn tumer sawo djungelo koowa, krenn tumer les chojedo. 26 Kau diwes dau man sowel glan o bolepen un i phub, te krenn tumer sawo koowa, djiwenn gar rah an o them, hoi tumer dren lenna wergel o pani Jordan. Kokres i tikno tsiro atchenn tumer koi. Palle wenn tumer lauter krik tradedo. 27 O baro Dewel tradell tumen mank i menshende an i tsele themma, jekes kate un ko wawares kote. Gar bud menshe atchenn tumendar djido mank kol menshende an i wawar themma, kai o baro Dewel tumen tradas. 28 Un kote mangenn tumer kol deblen dran kasht un bar an, hoi menshengre wastentsa kerdo wan. Un kol debla nai dikenn un shunenn, nai chan un sungenn gar.
29 An kol themma rodenn tumer palle o baro Debles, kai tumaro Dewel hi. Te putchenn pal leste tumaro tselo djijeha un tumari tseli sorjah, hatsenn tumer les. 30 An ko tsiro, hoi wella, kai ap tumende ko tselo koowa was, hoi tumenge penom, an kol djungele phare diwessa wenn tumer pale pash tumaro baro Debleste, un krenn, hoi job tumenge penell. 31 O baro Dewel hi i Dewel, kai tumenge peskro dji pre krell. Job mukell tumen gar, un mukell tumen gar win te merell, un bistrell gar, hoi lo tumare phurentsa win kras.
Dell kokres jek tchatcho Dewel
32 Rakrenn pral ko phuro tsiro, har tumer gomme gar koi hans, har o Dewel o menshes ap kai phub kras. Rodenn ap i tseli phub: Was sau baro koowa diklo un shunlo, 33 te shunan i menshe lengro Debles dran i jag ap lende te rakrell? Un jon atchan djido, har tumenge djas? 34 Kek wawar dewel djas un las peske menshen win dran i wawar them, har job kras, har las lo tumen win dran o them Egiptia. Job sikras peskri bari soor un kras sau koowa, hoi kek wawar nai krell, un anas bud bibacht ap i Egiptarjen. Job kuras pes tumenge. Peskro sorelo wasteha un peskri pre-hadedi mussjah las lo tumen win, un kras i Egiptarenge bari daar. Kowa lauter dikan tumer. 35 Tumen mukas lo kowa te dikell, te djinenn, te hi o baro Dewel o tchatcho Dewel, un te dell kek wawar debles har les kokres. 36 Dran o bolepen win rakras lo ap tumende, te sikrell lo tumen leskro drom. Un ap i phub mukas lo tumen peskri bari jag te dikell. Un dran koi jag win shunan tumer kol laba, hoi job ap tumende rakras. 37 Job kamas tumare phuren o tselo djijestar, un rodas lengre tchawen win un kolengre tchawen, un halauter kai lendar wenna. Un job djas tumentsa, har anas lo tumen win dran o them Egiptia peskri bari sorjah, 38 un tradas menshen win dran lengre themma glan tumende, natsjone, kai bareder un sorleder hi har tumer, te dell lo tumende lengro them, jaake har kowa kanna hi.
39 Jaake hunte djinenn kau diwes un bistrenn kowa gar: Dell kek wawar Dewel har o baro Dewel kokres. Kek wawar dewel hi an o bolepen un witar gar ap i phub. 40 Denn jak ap kowa, hoi job tumendar kamella, un djiwenn pal leskre laba, hoi tumenge kau diwes penau. Palle djal mishto tumenge un tumare tchawenge pal tumende, un tumer djiwenn i rah tsiro an kau them, hoi tumaro baro Dewel tumenge della, te atchell les tumenge hako tsireske.
Triin forja hi kolenge, kai hunte nashenn penge
41 Palle rodas o Mose triin forja win ap kai rig o panjestar Jordan, kai o kham pre djal, 42 te nai nashell kote hakeno, kai i wawares mulo das un kamas kowa gar, un job glan kowa gar chojedo ap leste his. Job nai nashell kote, te well lo gar maredo. 43 An o them Ruben his kowa o foro Bezer an o pralstuno mulo tato them; an o them Gad his kowa o foro Ramot an o pralstuno them Gilead; un an o them Manasse o foro Golan an o them Bashan.
O Israeleskro them ap i rig o panjestar Jordan, kai o kham pre djal
44 O Mose sikras i Israelenge o Debleskro drom. 45 Har le dran o them Egiptia win djan, penas lo lenge kol tsele laba, hoi lende sikran, har te djiwenn le, un hoi o Dewel lendar kamella, un leskre tsele tchatchepaskre laba. 46 An ko tsiro his le ap koi rig o panjestar Jordan, kai o kham pre djal, wergel o foro Bet-Peor an o them, kai his o Sihon o rai pral i Amorarja. Kowa djiwas an o foro Heshbon. Koles maran o Mose un i Israelitarja, har djan le dran o them Egiptia win. 47 Un jon lan leskro them penge dren, ninna o them, kai o Og o rai his pral o them Bashan. O Sihon un o Og, kol dui his i raja pral i Amorarja ap kai rig o panjestar Jordan, kai o kham pre djala. 48 Kau tselo them djas o forestar Aroer, hoi pash o lengsto pani Arnon tchiddo hi, bis pash i berga Sihon, hoi kharella ninna berga Hermon. 49 An leste his ninna ko tselo telstuno them ap kai rig o panjestar Jordan, kai o kham pre djal, bis pash o Londo Baro Pani un bis pash o piro i bergatar Pisga.