4
I budi kol murshendar dran o kheer Kohat
1 O baro Dewel rakras o Moseha un o Aroneha un penas: 2 Tchin i laba kol murshendar an i liil, kai wenna o Leviteskro tchawestar, o Kohat. Tchin ninna pre, dran hawi familja hakeno wella un koon leskro dad hi. 3 Le kokres kolen, hoi mank trijanda un paash-sheel bersha phuro hi, halauter kolen, kai nai wenn budepaske ap o Debleskro kheer.
4 Kawa hi koi budi, hoi kol Kohatarja ap o Debleskro kheer hunte krenna: Jon hidjrenna o Debleskro koowa, hoi an o kutch isema hi.
5 Ap ko tsiro, kai stenn i Israelitarja pre, te djan le dureder, djal o Aron peskre tchawentsa an o Debleskro kheer, un jon lenn ko kutch kotar than tele, hoi an o wudar glan o kutch isema hia. Ko kotar than tchiwenn le trul o sonakaskro mochton, kai o Debleskre deesh laba dren hi. 6 Koi pre tchiwenn le i latchi ledertikri plachta un pral pre i blaueti plachta. Palle tchiwenn le kol hidjepaskre kashta an pengre gustria, jaake te hidjrenn nai le kowa.
7 Un pral i chapaskri, kai o Debleskro maro pre tchiddo well, hunte tchiwenn le ninna i blaueti plachta. Un koi pre tchiwenn le kol pirja un roja, kol tchare un khore, kai i mool o Debleske dren wella. Ninna o Debleskro maro hunte well koi pre tchiddo. 8 Pral kowa halauter hunte tchiwenn le i plachta, hoi hi lolo har jag, un koi pral i latchi ledertikri plachta, un tchiwenn i hidjepaskre kashta an pengre gustria.
9 Un jon hunte lenn i blaueti plachta un tchiwenn koja trul koi momelengri un lakre momlia, ninna trul i tchinepangre, kolentsa i dorja an i momlia tele tchinlo wenn, ninna trul i jagakre tchare un i djeteskre khore, hoi koi pashel hi. 10 Trul kowa halauter tchiwenn le i latchi ledertikri plachta, un tchiwenn kowa ap i hidjepaskre kashta.
11 Ninna hunte tchiwenn le i blaueti plachta pral o sonakaskro bob, un koi pral i latchi ledertikri plachta. Palle tchiwenn le i hidjepaskre kashta an i gustria ap o bob. 12 Ko tselo wawar koowa, kai budrenn jon leha an o Debleskro kheer, hunte lenn jon un tchiwenn les an i blaueti plachta, un tchiwenn i latchi ledertikri plachta pral pre un tchiwenn kowa ap hidjepaskre kashta.
13 Jon hunte khossenn ninna koi jagakri tchik ap o Debleskri chatchepaskrib tele, un tchiwenn i loli plachta koi pral. 14 Un ko tselo koowa, kai budrenn jon peha, tchiwenn le koi pral pre:
jagakre tchare,
massengre forshette,
bare roja, kolentsa lenn le i jagakri tchik krik,
tchare, kai o rat dren wella,
un ko tselo koowa, hoi koi pashel hi.
Pral halauter tchiwenn le i latchi ledertikri plachta. Palle tchiwenn le kol hidjepaskre kashta an i gustria ap o bob.
15 Ap ko tsiro, kai djan i Israelitarja dureder, hunte krenn o Aron un leskre tchawe kawa halauter un hunte tchakrenn kol tsele kotja o Debleskro plachteno khereske un halauter, hoi koi pashel hi. Pal kowa wenn kol Kohatarja un hidjrenn kowa. Kaja hi lengre budi. Jon taprenn kokres kol plachte an, hoi trul ko tselo koowa tchiddo hi, un gar ko Debleskro koowa, te merenn jon gar.
16 Un o Eleasar, ko tchawo o rashajestar Aron, job dell garda ap o momelengro djet, un ap ko djet, hoi lenn le te makenn le i rashajen dren, un ap ko sungepaskro koowa, hoi well chatchedo o Debleske. Ninna dell lo garda ap o chapen, hoi hako diwes o Debleske chatchedo wella. Un job dell garda ap o tselo Debleskro kheer un ap ko tselo Debleskro koowa, hoi koi dren hi.
17 Un o baro Dewel rakras o Moseha un o Aroneha, un penas: 18 “Denn jak, te atchenn kol Kohatarja djido mashkral kol Levitarja, 19 un merenna gar ap ko tsiro, kai djan jon pash o Debleskro koowa! Doleske krenn jaake: O Aron un leskre tchawe djan glan lende an o Debleskro kheer dren un sikrenn hakeneste, hoi job hunte hidjrella. 20 I Kohatarja hunte djan gar kokres koi dren, witar gar dikenn jon o Debleskro koowa, te merenn jon gar.”
I budi kol murshendar dran o kheer Gershon
21 Un o baro Dewel rakras o Moseha un penas: 22 Tchin ninna i laba kol murshendar an i liil, kai wenna pal o Gershon! Tchin pre dran hawi familja hakeno wella, un koon leskro dad hi. 23 Le halauter kolen, kai mank trijanda un paash-sheel bersha phuro hi. Un de lauteren, kai wenn budepaske lengre budi ap o Debleskro kheer.
24 Kaja hi koi budi, hoi kol Gershonarja hunte krenna: 25 Jon hidjrenn kol plachte, hoi tchakrenn o Debleskro kheer, koi telstuni laintikri plachta, koi plachta dran bakrengro bal, hoi well koi pre un koi latchi ledertikri plachta, hoi well pral pre tchiddo. Ninna hidjrenn le ko kutch kotar than, hoi an ko wudar hi an o Debleskro kheer, 26 ninna i laintikre kotja trul i glanstuni platsa, un koi bari plachta an o wudar glan i platsa, hoi trul o kheer un i sasterni chatchepaskric hi, ninna i shelle un ko tselo koowa, hoi koi pashel hi.
27 O Aron un leskre tchawe hunte penenn lenge, hoi te hidjrenn le. Un tumer hunte denn garda, te krenn jon pengri budi mishto. 28 Kaja hi koi budi, hoi krenna i Gershonarja ap o Debleskro kheer. Un o Itamar, ko tchawo o rashajestar Aron hi o pralstuno pral lende.
I budi kol murshenge dran o kheer Merari
29 Tchin ninna i laba kol murshendar an i liil, kai wenna pal o Merari! Un tchin pre dran hawi familja hakeno wella, un koon leskro dad hi. 30 Le halauter kolen, kai hi mank trijanda un paash-sheel bersha phuro, kai wenn budepaske. Un de len lengre budi ap o Debleskro kheer!
31 Kaja hi lengre budi ap o Debleskro kheer: Jon hidjrenna kol tchinle kashta, hoi wenn pre tardo, te krenn le o kheer, lengre pandepangre kashta, un kol pesse kashta, hoi wenn pre tardo, te hidjrenn le o kheer, ninna lengre pire, 32 ninna kol pesse kashta, hoi wenn pre tardo trul koi glanstuni platsa, lengre pire un kol tikne sasterne kotja, kai deh an i phub, kol shelle un ko tselo wawar koowa, jaake har kowa lengre budi hi. Un tumer hunte sikrenn lende hako kotar, hoi hidjrenn le.
33 Kaja hi koi budi, hoi i Merarja hunte krenna ap o Debleskro kheer. Un o Itamar, ko tchawo o rashajestar Aron, hi o pralstuno pral lende.
I laba kol murshendar dran i khera Kohat, Gershon un Merari wenn pre tchinlo
34 Un o Mose un o Aron khetne kol pralstunentsa tchinan i laba kol murshendar an i liil, kai wan pal o Kohat. Hakenestar tchinan le pre dran hawi familja job was un koon leskro dad his. 35 Jon lan halauter kolen, kai mank trijanda un paash-sheel bersh phuro his, un nai wan budepaske, te krenn jon pengri budi ap o Debleskro kheer. 36 Khetne his jon 2.750 (dui-serja-efta-sheel-te-pantch-deesh) mursha. 37 Jaake bud mursha his kol Kohatarja, kai nai budran ap o Debleskro kheer, un kai o Mose un o Aron an i liil tchinan, jaake har o baro Dewel kowa o Moseske penas, te krenn le.
38 Un i laba kol murshendar, kai wan pal o Gershon, wan ninna pre tchinlo. Hakenestar tchinan le pre dran hawi familja job was un koon leskro dad his. 39 Jon lan halauter kolen, kai mank trijanda un paash-sheel bersh phuro his un nai wan budepaske, te krenn jon pengri budi ap o Debleskro kheer. 40 Khetne his jon 2.630 (dui-serja-shob-sheel-trijanda) mursha. 41 Jaake bud mursha his kol Gershonarja, kai nai budran ap o Debleskro kheer, un kai o Mose un o Aron an i liil tchinan, jaake har o baro Dewel kowa penas.
42 Un i laba kol murshendar, kai wan pal o Merari wan ninna pre tchinlo. Hakenestar tchinan le pre dran hawi familja job was un koon leskro dad his. 43 Jon lan halauter kolen, kai mank trijanda un paash-sheel bersh phuro his, un nai wan budepaske, te krenn jon pengri budi ap o Debleskro kheer. 44 Khetne his jon 3.200 (triin-serja-dui-sheel) mursha. 45 Jaake bud mursha his kol Merarja, kolengre laba o Mose un o Aron an i liil tchinan, jaake har o baro Dewel kowa o Moseske penas, te krenn le.
46-48 Khetne his kol tsele Levitarja 8.580 (ochta-serja-pantch-sheel-ochta-deesh) mursha. O Mose un o Aron khetne kol pralstunentsa an Israel tchinan lengre laba an i liil, un tchinan ninna pre, dran hawi familja hakeno was un koon leskro dad his. Kolla halauter his mank trijanda un paash-sheel bersh phuro, un nai wan budepaske ap o Debleskro kheer un hidjran pharo koowa. 49 Hakeno las peskri budi un leske was penlo, hawo koowa job hunte hidjrell. Kowa halauter was jaake har o baro Dewel kowa o Moseske penas, te krenn jon.