30
O Israel well pale pash peskro baro Debleste!
1 Kanna penom tumenge kal tsele laba, te nai rodenn win: Kamenn tumer, te well o Debleskri bacht pral tumende? Kamenn tumer te well leskro praassepen pral tumende? Te well koi bibacht pral tumende, un tumer djiwenn an i wawar themma, kai tumaro baro Dewel tumen tradas, wenn tumenge kal laba an o dji. 2 Te djan tumer palle pale pash tumaro baro Debleste, tumer un tumare tchawe, un shunenn ap leste tumaro tselo djijestar un tumari tseli sorjah an halauter, hoi me tumenge kau diwes penom, 3 palle krell tumaro baro Dewel peskro dji tumenge pre un lell tumen dran o pandepen win. Un job anell tumen pale khetne un pale pale dran i tsele themma, kai lo tumen tradas. 4 Te wans tumendar jaake dur krik tradedo bis an o palstuno them ap kai phub, ninna kotar anell tumen tumaro baro Dewel khetne un pale pale. 5 Tumaro baro Dewel anell tumen an ko them, koles tumare phurenge his. Un tumer lenn les tumenge dren. Un job dell tumen bud brawlepen, un krell tumendar budeder har tumare phure his.
6 Tumaro baro Dewel dell tumen djia, hoi shunenn un krenn, hoi lo tumendar kamell. Tumen un kolen, kai tumendar wenna, dell lo sawe djia, jaake te kamenn tumer tumaro baro Debles o tselo djijestar un tumari tseli sorjah. Un tumer atchenn djido.
7 Koi tseli bibacht tchiwell tumaro baro Dewel ap kolende, kai rikran tumen tele, un his chojedo ap tumende, un lan tumen palla. 8 Un tumer djan pale ap o baro Debleskro drom un shunenn ap leste un rikrenn tumen ap kol tsele laba, hoi tumenge kau diwes penom. 9 Tumaro baro Dewel dell tumen bacht an halauter, hoi tumer krenn; tumer lenn bud tchawe, bud vieche un bud djob ap tumari hachetikri phub, te djal tumenge latcheder har mishto. Leske hi shukar te krell lo tumenge latchepen, jaake har leske shukar his, te kras lo latchepen ap tumare phurende. 10 Shunenn ap leste, djiwenn pal leskre laba, hoi an kau tchatchepaskro liil tchinlo hi, un krenn, hoi job tumendar kamell! Tumer hunte wenn pale pash leste tumaro tselo djijestar un tumari tseli sorjah.
Tumer nai rodenn win mank o djipen un o merepen
11 Kau tchinlo lab, hoi tumenge kau diwes penom, te rikrenn tumen ap leste, hi gar jaake pharo un jaake dur krik, te nai haiwenn un rikrenn les gar.
12 Kau lab hi gar an o bolepen, jaake te nai penans tumer: “Koon djal menge an o bolepen pre un anell les menge, te nai shunas les un djiwas koi pal?” 13 Kau lab hi gar ap i wawar rig o baro panjestar, jaake te nai penans tumer: “Koon djal menge ap i wawar rig o baro panjestar un anell les menge, jaake te nai shunas mer les un djiwas koi pal?” 14 Na-a, kau lab hi pash tumende, an tumare muja un an tumare djia, te nai djiwenn koi pal.
15 Dikenn, me mukau tumen kau diwes win te rodell mank o latchepen un o tchilatchepen, mank o djipen un o merepen. 16 Te krenn tumer, hoi me tumenge kau diwes penom, un kamenn tumaro baro Debles un djan ap leskre dromma, un djiwenn pal leskre laba un krenn, hoi job tumendar kamell un rikrenn tumen ap leskre tchatchepaskre laba, palle atchenn tumer djido. Un tumendar wenn bud menshe. Un tumaro baro Dewel tchiwell peskri bacht ap tumende an o them, kai dren djan, te lenn les tumenge dren.
17 Te krenn tumer gar, hoi tumaro baro Dewel tumendar kamell, un shunenn gar ap leskre laba, un mukenn tumen tele te anell leskro dromestar, un mangenn wawar deblen an, 18 palle penau me tumenge kau diwes: Tumer djiwenn gar i rah tsiro an ko them wergel o pani Jordan, an koleste tumer djan, te lenn les tumenge dren.
19 Kau diwes dau gole ap o bolepen un ap i phub, te dikenn le: O djipen un o merepen tchiwom me glan tumende, o Debleskri bacht un i bibacht. Jaake rodenn tumenge o djipen win, te atchenn djido, tumer un kolla, kai tumendar wenna. 20 Kamenn tumaro baro Debles! Shunenn ap leste, un rikrenn tumen ap leste! Kowa hi tumaro djipen. Un jaake nai djiwenn bud bersha an ko them, kolestar o baro Dewel pes sowel das glan tumare phurende, glan o Abraham, o Isaak un o Jakob, te dell lo les lende.