19
Forja kolenge, kai hunte nashenn penge
1-2 Ap ko tsiro, kai tradas tumaro baro Dewel kol wawar menshen win dran ko them, hoi lo tumende dell, un tumer lan ko them dren, un djiwenn an lengre forja un an lengre khera, palle hunte rodenn tumenge triin forja win, kai nai djan kolla dren, kai naashepangre hi. 3 Krenn ko tselo themestar triin kotja, an hako kotar jek sawo foro, jaake te hi ko drom koi gar dur koleske, kai jekes mulo das un hunte nashell peske. 4 Sawo foro hi koleske, kai das jekes mulo un kamas kowa gar, un les his kek choli ap leste. Kowa nai nashell koi, te atchell lo djido. 5 Kowa nai was jaake: Dui mursha djan an o weesh, te denn le kasht tele, un ko jek hadell peskro wast, an koja i tower hi, un lell win, te dell an o kasht, un o saster phagell tele un djal an koleste, kai pashel hi, un kowa merella. Sawo nai nashell an sau foro un atchell djido. 6 Te wals an o tselo them kokres jek sau foro, nai wals ko drom dur koleske, kai hunte nashell peske kote. Un kowa, kai kamell o rat o mulestar pale te anell ap o shero kolestar, kai maras lesa, un lell les pherdi choli palla, kowa nai lals les dren un dals les mulo – koles, kai kek doosh ap leste hi, kolake job hunte merals. Job his glan kowa gar chojedo ap o wawareste. 7 Doleske penau me tumenge, te rodenn triin forja win.
8-9 Te krenn tumer halauter, hoi tumenge kau diwes penau, te hunte krenn, te kamenn tumaro baro Debles o tselo djijeha un djan ap leskre dromma, palle krell tumaro baro Dewel tumaro them bareder, jaake har job pes glan tumare phurende sowel das. Ap ko tsiro, kai das lo tumen o tselo them, palle rodenn tumenge triin wawar forja win! 10 Jaake hi tumen doha forja kai nai nashell jek dren. Un jaake krenn tumer, te well an tumaro them, hoi tumaro baro Dewel tumenge dell, kek mensho maredo, ap koleste kek doosh hi. Te wals sawo mensho maredo, anans bari doosh ap tumende.
11 Hi wawartchandes jekeha, kai his chojedo ap jekeste un khatrell pes, un dell jak te taprell lo les, un djal ap leste pre un dell les mulo. Te nashell sawo mensho an sau foro, 12 palle hunte bitchrenn i phureder dran leskro foro murshen koi, te lenn le les khere, un denn les an i wasta kolestar, kai anell o rat ko mulestar pale ap o koleskro shero, kai das les mulo. 13 Job te khaitell tumen gar! Sawo marepaskro hunte merell, te djal tumenge mishto an Israel. Job maras jekes, ap koleste kek doosh his.
Ma le tuke o wawareskro them
14 An ko tsiro, kai djiwenn an ko them, hoi tumaro baro Dewel tumen dell, te lenn les tumenge dren, palle hunte tchiwess gar kol barra ap i rig, hoi sikrenn har baro hi ko kotar them kolestar, kai langs tute djiwell. Kolla his tire phure, kai tchiwan kol barra koi.
Kolla, kai anenn i doosh ap jekeste, hunte penenn o tchatchepen
15 Te well i tchilatcho koowa glan i tchatchepangre anlo, hi gar doha, te dikas kokres jek mursh kowa. Na-a dui te triin hunte penenn, te dikan le koles koi pashel, har lo kau koowa kras. Palle nai denn le les i phagi. 16 Te anell jek chochepah tchomone ap i wawareste pre, 17 palle wenn kol dui, kolen tchingepen pentsa hi, pash o baro Debleskro kheer, glan i rashajende un glan i tchatchepangre murshende, kolla an kol diwessa koi hi. 18 Un kol tchatchepangre mursha hunte rodenn mishto palla, hoi tchatcho hi. Te hatsenn le, te hi kowa i chocheno, hoi chochepen ap peskro phraleste pre anas, 19 palle krenn leha kowa, hoi kamas job peskro phraleha te krell. Jaake lenn tumer o tchilatchepen mashkral tumende krik.