20
Kowa, hoi hunte krenn, glan te djan an o kurepen
1 Te djan tumer win an o kurepen, te kurenn tumen kolentsa, kai kamenn tumen gar an o them, un tumer dikenn lengre graja un kurepaskre wurdja un lengre lurden, kai hi bud budeder har tumer, palle ma darenn lendar! Tumaro baro Dewel hi tumentsa, kowa kai tumen dran o them Egiptia win anas.
2 Glan te stenn tumer pre un djan an o kurepen, stakrell o rashai glan un penell ap tumare kurepangre: 3 “Murshale dran Israel, shunenn! Tumer djan kau diwes an o kurepen, te kurenn tumen kolentsa, kai kamenn tumen gar an o them. Awenn sorelo! Ma darenn lendar! Un ma mukenn tumen traash te krell! 4 Tumaro baro Dewel hi kowa, kai djal tumentsa un kurell pes tumenge lentsa. Job hi ap tumari rig.”
5 Pal kowa hunte rakrenn i pralstune ap i kurepangre un putchenn: Hi mank tumende jek, kai i kheer pre tardo tchiwas un mukas gomme gar o Debleskri bacht pral kowa win te rakrell? Kowa hunte djal pale an peskro kheer, te merell lo gar an o kurepen, un i wawar mursh djiwell an leskro kheer.
6 Hi mank tumende jek, kai drakengre ruka an i phub tchiwas, un las gomme kek drake dren? Kowa hunte djal pale an peskro kheer, te merell lo gar an o kurepen, un i wawar mursh lell kol drake.
7 Hi mank tumende jek, koles i pirni hi un job las lat gomme gar pash peste? Kowa hunte djal pale an peskro kheer, te merell lo gar an o kurepen, un i wawar mursh lell lat peske.
8 Un i pralstune hunte putchenn i murshendar pale: Hi mank tumende jek, koles daar hi, un koleskro dji trissella? Kowa hunte djal pale an peskro kheer, te krell lo gar i djia peskre phralendar darenes. 9 Un pal kau rakepen hunte tchiwenn i pralstune murshen pral i lurdende, te djan jon glan i lurdende an o kurepen.
10 Te djan tumer glan i foro, te kurenn tumen kolentsa, kai kote djiwenn, pale putchenn lendar glanstunes, te kamenn le pre te dell kek kurepah. 11 Un te penenn le, te kamenn le kek kurepen, un krenn tumenge o foreskre wudja pre, palle lenn kol tsele menshen, kai kote dren hi, te hunte budrenn tumenge i silaha. 12 Un te kamenn le gar pre te dell, un kamenn pen te kurell tumentsa, palle djan trul ko foro un pandenn les dren, jaake te nai djal kek buder dren un kek buder win. 13 Un ap ko tsiro, kai dell tumaro baro Dewel les an tumaro wast, denn i tsele murshen mulo o chareha. 14 I djuwja un i tchawe un i tsele vieche un halauter, hoi tumer dran o foro randan, kowa rikrenn tumenge! Un tumer nai chan ko tselo chapen, hoi his kolen, kai kaman tumen gar. Tumaro baro Dewel das les tumenge.
15 Jaake krenn tumer i tsele forjentsa, kai hi dur tumendar krik, un gar kate an o them, hoi lenn tumer dren. 16 An kol forja, hoi hi an ko them, hoi tumaro baro Dewel tumen della, hunte mukenn tumer kekes djido, kek menshes witar kek vieches. 17 Mulo dino hunte wenn le halauter: i Hetarja, i Amorarja, i Kanaanitarja, i Perisarja, i Hiwarja un i Jebusarja. Jaake penas tumenge tumaro baro Dewel, te hunte krenn. 18 Te krenn tumer kowa gar, anenn le tumenge pashel, har te krenn ko tselo djungelo koowa, hoi jon pengre deblenge kran. Un jaake anens tumer doosh ap tumende glan tumaro baro Debleste.
19 Te han bud diwessa trul i foro tardo, koles tumer kamenn te dell un dren te lell, un mukenn kekes dren un kekes win te djal, palle denn gar kol ruka kote tele. Kolendar nai chan. Doleske ma denn len trujel! Jon hi kek menshe, kolentsa hunte kurenn tumen! 20 Sawe ruka, kolendar djinenn, te chal kek lendar, kolen nai denn tumer trujel, un nai krenn dromma lendar, te nai wenn tumer an ko foro, hoi an o kurepen tumentsa hi, un nai lenn les dren.