18
Kowa, hoi i rashaja hunte lenna
1 I rashaja – jon hi lauter dran o kheer Levi, – kolla lenn kek them an Israel. Jon chan kolestar, hoi i wawar Israelitarja o baro Debleske anenn, te well kowa leske chatchedo. 2 Kek them lenn i Levitarja an Israel har lengre phrala lenna. Kowa hoi jon lenna, hi lengri budi o baro Debleske. Job kokres dikell ap lende, te hi len lauter, hoi len hunte well. Jaake penas lo lenge.
3 Kawa hi, hoi i rashajen hunte well: Te anell jek i grumni, oder i bakro o baro Debleske, hunte dell lo kolestar o phik, kol dui tchamja un i buke o rashajeske. 4 Ninna well i rashajen hako bersh o newo djobestar, i newi moljatar un o newo djetestar, hoi tumer dren anan. Ninna o bakrengro bal, hoi o ersto kopo tele tchinlo well, hi lenge. 5 Tumaro baro Dewel rodas peske o kheer Levi win dran i tsele Israelitarjen, te wenn i mursha dran o kheer Levi leskre rashaja hako tsireske.
6 Te kamell i Levitari ko foro te mukell, kai djiwell lo an Israel, un kamell ap koi platsa te djal, hoi o baro Dewel peske wi-rodell, 7 kowa nai well, te krell lo o baro Debleskri budi jaake har kol wawar Levitarja ninna, kai kote i rashaja hi. 8 Palle lell job ninna jaake bud chapen har kol wawar ninna lenn. Un kowa, hoi lo peskro dadestar las, hi les gomme pral pre.
Denn jak, te krenn kek bengeskro koowa!
9 Te wenn tumer an o them, hoi tumaro baro Dewel tumen dell, palle krenn gar ko djungelo pale-tchiddo koowa, hoi krenn i menshe, kai kote djiwenn. 10 Kek mank tumende hunte chatchrell peskro mursh tchawes oder peskri tchat an i jag o Debleske. Kek mank tumende hunte well i durkepaskro, kek i drawepaskro, kek, kai krell wawar bengeskri koowa, 11 kek, kai rakrell bibacht win an o bengeskri soor, kek, kai i mulentsa rakrell oder i mulen putchell. 12 Koon sawo koowa krella, hi pale-tchiddo glan o baro Debleskre jaka. Dran sawo djungelo pale-tchiddo koowa tradell tumaro baro Dewel kol wawar menshen dran o them win glan tumende. 13 Pash tumende hunte well sawo koowa gar hatslo. Tumer han o baro Debleskre menshe.
14 Kol menshe, kolengro them tumer dren lenna, kolla shunenn ap drawepangre un durkepangre. Tumenge penas tumaro baro Dewel, te krenn kowa gar.
O Dewel kamell i murshes te bitchrell, kai hi i Debleskro rakepaskro har o Mose kowa hi
15 I Debleskro rakepaskro, har me jek hom, jek, kai well tumendar, koles bitchrell tumaro baro Dewel pash tumende. Ap koleste shunenn!
16 Ap ko diwes, kai hans khetne pash i berga Horeb, mangan tumer kowa tumaro baro Deblestar, un penan: ‘Mer kamah buder gar o rakepen maro baro Deblestar te shunell, un kai bari jag kamah witar gar buder te dikell, te hunte meras gar!’ 17 Un o baro Dewel penas ap mande: Mishto hi, hoi jon rakran. 18 I Debleskro rakepaskro har tu jek hal, kai well lendar, koles bitchrau me lenge. Un me kamau leske mire laba an leskro mui te tchiwell. Un job rakrell ap lende halauter, hoi me leske penau. 19 Un ko mensho, kai gar ap mire laba shunell, hoi i rakepaskro an miro lab rakras, koleske dau me i phagi. 20 Te phurdell pes i Debleskro rakepaskro pre, un penell i rakepen an miro lab, hoi me leske gar penom, te hunte rakrell lo, sawo rakepaskro hunte merell. Ninna te rakrell job an o lab i wawar deblestar, hunte merell lo.
21 Te putchenn tumenge tumendar: Har djinas mer, hawo lab o baro Dewel gar rakras?
22 Djinenn: Te rakrell ko Debleskro rakepaskro an o lab o baro Deblestar, un kowa hoi job rakras well gar tchatcho, jaake his ko lab hoi job rakras gar o baro Deblestar. Ko rakepaskro kamas pes peskro rakepah bares te krell. Tu daress gar lestar!