10
O Mose lell newe barra o Debleskre deesh labentsa
1 An ko tsiro penas o baro Dewel ap mande: “De dui barra win, har kol dui glanstune, un ab pre pash mande ap i berga, un kre i kashteno mochton. 2 Un me tchinau ap kol barra kol laba hoi ap kol glanstune dren tchinlo his, kolen tu paash phagal. Un tu tchiwess kol barra an kau mochton!”
3 Un me krom i mochton dran akatstikro kasht, un dom dui barra win, hoi jaake har kol glanstune his, un djom pre ap i berga. Un kol dui barra his an mire wasta. 4 Un har o glanstuno kopo tchinas job kol deesh laba, kolen o baro Dewel ap i berga dran i jag win ap tumende penas, har tumer halauter koi khetne wan. Un o baro Dewel das kol barra mande. 5 Un me rissrom man un djom i berga pale tele. Un me tchiwom kol barra an ko mochton, hoi me krom. Un kote hi le, jaake har o baro Dewel mange penas.
O Aron merell
6 Un i Israelitarja mukan Beeroth-Bene-Jaakan pal pende un djan dureder an Mosera. Kote meras o Aron un was paskedo. Un leskro tchawo, o Eleasar was rashai pal leste. 7 Fun kotar djan le dureder an Gudgoda un kotar dureder bis pash Jotbata. Kote das bud pani.
I budi, hoi i Levitarja hunte krenn
8 Ko tsireske rodas peske o baro Dewel kol murshen dran o kheer Levi win, te hidjrenn jon o mochton, kai o Debleskre deesh laba dren hi, un te wenn jon rashaja un budrenn leske, un rakrenn an leskro lab bacht win pral i menshende. Un kowa krenn le ninna kau diwes. 9 Doleske well i Levitarjen kek them har lengre phralen. Kowa hoi jon lenna, well dran lengri budi o baro Debleske. Kowa penas lenge tumaro baro Dewel.
O baro Dewel shunell o Moseskro mangepen
10 Me atchom ap i berga star-deesh diwessa un star-deesh ratsja har ko ersto kopo. Un o baro Dewel shunas ninna kau kopo miro mangepen un das tumen gar mulo. 11 Un o baro Dewel penas ap mande: “Ste pre! Un dja glan i menshende win, te wenn le an ko them un lenn les penge dren, ko them, kolestar man glan lengre phurende sowel dom, te dap les lende.”
Kowa hi, hoi o Dewel tumendar kamella
12 Un kanna Israel, shun, hoi tumaro baro Dewel kamell, te kress! Tu mangess les an, djas ap leskro drom an halauter hoi tu kreh. Tu kamess les o tselo djijestar, un wess leske koi tiri tseli sorjah. 13 Djib pal leskro lab, un rike leskre tchatchepaskre laba, hoi tuke kau diwes penau. Palle djal tuke mishto. 14 O baro Debleske hi o bolepen, lauter hoi an o pralstunepen hi. Un ninna i phub un lauter hoi dren hi, hi leskro. 15 Tumare phuren kamas lo o djijestar. Un tumer, kai lendar wan, rodas lo peske win mank i menshende dran an i tsele wawar themma. Un ninna kau diwes han tumer leskre wi-rodede menshe.
16 Doleske shunenn kanna ap o baro Debleste, un djan gar buder pal tumaro shero! 17 Tumaro baro Dewel hi o Dewel pral hako dewel un o rai pral hako rai. Job hi o baro un o sorelo, kolestar halauter darenn. Job dikell gar koi pre, koon jek hi. Un job lell tchi an, hoi kamell jek les te dell, te rissrell lo o tchatchepen trujel. 18 Job dikell koi pre, te lenn pengro tchatchepen kol tchawe, kolen kek dad buder hi, ninna kol djuwja, kolengro rom meras. Un i wi-themarjen kamell job o djijeha un dell len chapen un koola an-ripaske. 19 Tumer hans ninna wi-themarja an o them Egiptia. Doleske hunte kamenn tumer i wi-themarjen ninna o tselo djijestar. 20 Un hunte shunenn ap tumaro baro Debleste un mangenn les kokres an. Rikrenn tumen ap leste kokres. Te denn tumen sowel, denn tumaro sowel pash leskro lab. 21 Job hi kowa, koleske sharenn tumen i wawar menshe. Job hi tumaro Dewel, kai kras sawo baro un sorelo koowa pash tumende. Kowa dikan tumer tumare jakentsa. 22 70 (efta-deesh) menshe his tumare phure, har le an o them Egiptia tele djan. Un kanna kras tumaro baro Dewel tumendar jaake bud har i bolepangre momlia.