11
Ko baro koowa, hoi o baro Dewel i Israelenge kras
1 O Mose penas dureder ap i Israelitarjen: Tumer hunte kamenn tumaro baro Debles o tselo djijestar! Krenn lauter, hoi lo tumendar kamell. Rikrenn tumen ap leskre tchatchepaskre laba, un djiwenn pal leskre laba jaake rah har djiwenn. 2 Un lenn kau diwes an o dji, hoi sikras o baro Dewel tumende, un gar tumare tchawende. Kolla djinenn kowa gar. Jon dikan les gar. Tumer han, kai dikan leskro railepen un hoi lo tumenge kras peskri sorelo wasteha un pre-hadedi mussjah. 3 Sawo baro koowa, hoi kek wawar nai krella, kras job ap i Egiptarjen, ap o Faraeste, ko rajeste pral o them Egiptia, un ap leskro tselo them, 4 ninna ap leskre lurdende, kai tumenge palla lan. Pral lengre graja un wurdja mukas job o pani khetne te phagell. Un jon lauter tassan an o Baro Lolo Pani. Jaake hi kowa bis kau diwes. 5 Tumer djinenn, hoi lo an o mulo tato them tumenge kras, bis te wan kate ap kai platsa, 6 un hoi lo kras ap o Datan un ap o Abiram, kolengro dad o Eliab his dran o kheer Ruben: Har i phub peskro mui pre kras un len mashkral i tsele menshende Israel pre chas, len un lengre tsele menshen un lengre plachtene khera, ninna lengre budepangre un vieche, hoi pash lende his. 7 Tumer dikan tumare jakentsa ko tselo baro kowa, hoi o baro Dewel kras.
Ko latchepen, hoi lenn tumer an tumaro them
8 Doleske rikrenn tumen ap i tsele laba, hoi tumenge kau diwes penau. Palle han soreles doha, te lenn ko them tumenge dren, an koleste kanna djan. 9 Un tumer djiwenn i rah tsiro an ko latcho un brawelo them, hoi o baro Dewel pes glan tumare phurende sowel das, te dell lo les lende un lengre tchawende pal lende.
10 Kau them an kowa tumer wenna, te lenn les tumenge dren, hi gar har ko them Egiptia, dran koleste tumer win djan. Kote hunte budran phares te anenn o pani ap tumari hachetikri phub. 11 Kau them, kai kanna djan, hi i them, kai dell brishin, hoi perell dran o bolepen ap i berge un ap o telstuno them, 12 hi i them, ap koleste tumaro baro Dewel jak dell. Leskre jaka dikenn o tselo bersh latches ap leste.
13 Jaake shunenn ap kol laba, hoi tumenge kau diwes penau, te kamenn tumaro baro Debles o tselo djijestar un wenn leske koi tumari tseli sorjah. 14 Palle dell job o brishin ap tumaro them an peskro tsiro, an o nijal un an o wend, te nai anenn tumaro djob dren, ninna tumari mool un djet. 15 Un me mukau o senlepen ap tiri phub pre te djal tire viechenge. Tumen hi hako tsiro doha te chal.
16 Denn tumen jak, te mukenn tumen gar krik te anell o baro Debleskro dromestar, un perenn lestar tele un mangenn wawar deblen an, un witsrenn tumen glan lende tele. 17 Te krenn sawo koowa, nashte well i choli o baro Deblestar pral tumende, un job pandell o bolepen tele, te dell buder gar brishin, un i phub nai mukell tchi pre te djal. Palle merenn tumer sik win an kau latcho them, hoi o baro Dewel tumen das.
18 Ma bistrenn kal laba! Tchiwenn len ap tumare djia, un pandenn len trul tumare mussja un trul tumaro shero, te bistrenn len gar! 19 Un penenn len tumare tchawenge. Rakrenn kol labendar, te han khere, un ninna te djan ap o drom, te tchiwenn tumen tele, un ninna te stenn pre. 20 Un tchinenn len ap i pesse kashta tchatches un serwes pash tumaro khereskro wudar un ap i foreskre wudja. 21 Palle atchenn tumer an kau them, kolestar tumaro baro Dewel glan tumare phurende pes sowel das, te dell lo les tumende, un djiwenn kote jaake rah har o bolepen pral i phub hi.
22 Te krenn tumer kowa lauter, hoi me penom, te hunte krenn, un kamenn tumaro baro Debles tumaro tselo djijestar, un djan ap leskre tsele dromma, un rikrenn tumen ap leste, 23 palle tradell o baro Dewel i menshen dran kal tsele themma glan tumende win. Un tumer lenn i themma sawe menshendar tumenge dren, kai hi budeder un sorleder har tumer. 24 Hako kotar phub ap koleste tumare pire stakrenn, hi tumenge, o tselo them mank o mulo tato them un i berge Libanon, un mank o lengsto pani Eufrat un o Mashkralstuno Baro Pani. 25 Kek nai atchell glan tumende tardo, Traash un daar mukell tumaro baro Dewel ap i menshende an o tselo them te well glan tumende, jaake har job les tumenge penas.
26 Kau diwes mukau tumen win rodell: Kamenn tumer o Debleskri bacht? Kamenn tumer i bibacht o Deblestar? 27 I bacht well ap tumende, te shunenn ap i laba tumaro baro Deblestar, kol laba, hoi me tumenge kau diwes penau. 28 I bibacht well ap tumende, te shunenn tumer gar ap i laba tumaro baro Deblestar, un djan leskro dromestar tele, un djan wawar deblenge palla, kolen tumer gar prindjrenn.
29 Te anell tumen tumaro baro Dewel an ko them, an koleste tumer wenn, te lenn les tumenge dren, palle denn koi bacht win gole ap i berga Garizim, un i bibacht ap i berga Ebal. 30 Kolla hi kol dui berge ap i wawar rig o panjestar Jordan pash ko drom, hoi djal kote, kai o kham tele djal, an o telstuno them, kai o Jordan nashell un kai i Kanaanitarja djiwenn. Kol berge hi gar dur kol bare rukendar pash Gilgal. 31 Tumer djan tchatchepah pral o Jordan, un wenn an ko them dren, te lenn les tumenge dren. Kau them das tumen tumaro baro Dewel, te lenn les tumenge dren un djiwenn koi. 32 Jaake denn jak ap halauter, hoi o baro Dewel tumendar kamell, un ap leskre tsele tchatchepaskre laba, hoi me tumenge kau diwes penau. Un djiwenn koi pal!