9
Kowa hi, hoske o baro Dewel i Israelenge ap i rig was
1 Shunenn, tumer menshe Israel! Tumer djan kau diwes pral o pani Jordan, te lenn themma tumenge dren kol menshendar, kai hi bareder un sorleder har tumer. Lengre forja hi bares, un bare massurja djan trul lende pre an o bolepen. 2 I menshe kote hi baro un wenn kharedo ‘riese’. Tumer shunan, har lendar penlo was: Kek nai well sorleder har jon. 3 Doleske djinenn kau diwes, te djal tumaro baro Dewel glan tumende har i jag, hoi halauter pre chatchrell. Job dell len, te hunte nashenn le penge tumendar. Un tumer tradenn len win un denn len sik mulo. Jaake penas o baro Dewel kowa tumenge.
4 Pal kowa, kai tradas len tumaro baro Dewel glan tumende win, ma penenn: Dran maro tchatcho djipen anas men o baro Dewel an kau them, te las le menge dren. Na-a, dran o tchilatcho djipen kol menshendar tradas len o baro Dewel win glan tumende. 5 Hi gar doleske, te wans latche menshe un tumen wals i djudjo dji, te wenn tumer an ko them, te lenn les tumenge dren.
Na-a, tumaro baro Dewel tradell kol menshen win ko tchilatchepaske, hoi le kran, te rikrell job koi sowel dren, hoi lo tumare phurende, o Abrahames un o Isaakes un o Jakobes, das. 6 Jaake djinenn kanna, hi gar dran tumaro tchatcho djipen, te dell tumen tumaro baro Dewel kau latcho them, te lenn les tumenge dren. Tumer han menshe i djijentsa har bar.
I Israelitarja krenn i sonakaskri terni grumni
7 Ma bistrenn, har choiran tumaro baro Debles an o mulo them, Ko diwesseha har djan tumer win dran o them Egiptia bis te wan kate, kai kanna han, kaman gar ap leste te shunell. 8 Un pash i berga Horeb kran tumer o baro Debles jaake chojedo, te kamas lo tumen te marell. 9 Me homs pre ap i berga, te lap lestar kol barra, an koleste job i deesh laba tchinas, hoi hunte rikrenn, te wenn leskre menshe. Kote atchom me 40 (star-deesh) diwessa un ratsja. Maro chom me kek, un pani pijom me witar gar. 10 Un o baro Dewel das man dui barra, an kolende job peskro gushteha kol laba tchinas. Glan kowa penas lo kol laba ap tumende, har khetne wan pash i berga, un i berga pherdi jag his. Dran i jag win rakras lo tumentsa.
11 Har kol 40 (star-deesh) diwessa un ratsja trujel his, das man o baro Dewel kol dui barra, kai kol deesh laba dren tchinlo hi, 12 un penas ap mande: “Naash, dja sik kai berga tele! Kol menshe, kai tu dran o them Egiptia win anal, kran i tchilatcho koowa. Sik djan le ko dromestar tele, kai me sikrom lende. Jon kran penge i dewel dran sonakai.”
13 Un o baro Dewel rakras pale mantsa un penas: “Me dikau, kai djiwenn kol menshe pal pengro shero un kamenn gar te shunell. 14 Ma rike man pale, te anap miri bari choli pral lende, un dap len mulo, te well lengro lab bistedo. Tire tchawendar krau me i natsjona, hoi hi sorleder un bareder har kaja.”
15 Me rissrom man un djom koi berga tele. Un koi berga chatchas an i jag. Un kol dui barra kol deesh labentsa his an mire wasta. 16 Un me dikom, tumer kran baro tchilatchepen ap tumaro baro Debleste. Tumer kran tumenge i sonakaskro terno guruma un djan sik tele ko dromestar, hoi o baro Dewel sikras tumende, te hunte djan.
17 Kote taprom me kol dui barra un witsrom len dran mire wasta win, un phagom len an kotja glan tumare jaka.
O Mose mangell o Debles i Israelenge
18 Un me witsrom man tele glan o baro Debleste, un homs tchiddo glan leste har koi ersto kopo 40 (star-deesh) diwessa un ratsja. Maro chom kek, un pani pijom gar. Un mangom les tumenge, te dikell lo gar ap tumari bari doosh, hoi tumer ap tumende lan, har sawo djungelo koowa kran, un les jaake chojedo kran. 19 Leskri choli ap tumende his jaake baro, te darom, te marals job tumen. Un o baro Dewel shunas ninna kau kopo ap mande.
20 Ninna ap o Aron his o baro Debles i bari choli, un job kamas les te marell. Un me mangom an ko tsiro ninna o Aroneske. 21 Un ko terno gurum, hoi kran tumenge un jaake o Deblestar tele peran, kai figura lom me un witsrom lat an i jag, dom lat paash un dom lat an sawe tikne kotja, te atchas tchi har stauba pral. Un koi stauba witsrom an ko pani, hoi kote i berga tele nashell.
22 Ninna kran tumer tumaro baro Debles chojedo, har hans an Tabera un Massa un Kibrot-Taawa. 23 Un har bitchras o baro Dewel tumen dran o foro Kadesh-Barnea win un penas: “Djan pre un lenn o them tumenge dren, hoi me tumen dom”, koi shunan gar ap leste, un patsan les gar un kran gar, hoi lo tumenge penas. 24 Jaake rah har prindjrau tumen, hi tumen sherja har barra un krenn gar, hoi o baro Dewel tumenge penell.
25 Un har kamas o baro Dewel tumen te marell, homs tchiddo glan leste 40 (star-deesh) diwessa un 40 (star-deesh) ratsja. 26 Un me mangom o baro Debles un penom: “Baro Dewel miro rai, ma mare tire menshen, kol menshen, kai tu win lal dran o them Egiptia tiri bari sorjah un tiro sorelo wasteha, te wenn le tire menshe! 27 Ma biste tire budepangre, o Abraham un o Isaak un o Jakob! Ma dik koi pre, te hi kal menshen kai djia har barra. Ma dik ap lengro tchilatchepen, un ap koi doosh hoi le ap pende anan. 28 Muk i Egiptarjen gar te penell: ‘O baro Dewel nai anell len gar an ko them, kolestar job penas, te dell lo les lenge.’ Muk len gar te penell, te anal len win an o mulo tato them dran tiri choli, te merenn le kote. 29 Jon hi tire menshe, kolen tu win lal dran o them Egiptia tiri bari sorjah un tiro sorelo wasteha, te wenn le tire menshe!”