8
I latcho them i Israelenge!
1 Rikrenn kol tsele laba, hoi tumenge kau diwes penau. Djiwenn pal lende! Jaake atchenn djido un wenn bud menshe, un nai lenn ko them tumenge dren, kolestar o baro Dewel glan tumare phurende pes sowel das, te dell lo les lende.
2 Ma bistrenn, har djas tumaro baro Dewel glan tumende an kol 40 (star-deesh) bersha, har djan an o mulo tato them trujel. Kote sikras lo tumen: Te hi lo gar tumentsa, nai krenn tchi. Ninna kamas lo win te hatsell, hoi an tumare djia hi: Shunenn tumer ap leskre laba oder gar? 3 Un job mukas tumen te bokell, te haiwenn, tumaro chapen well lestar. Un job das tumen o Manna te chal, hoi tumer gar prindjran un tumare phure witar gar. Kowa kras lo, te sikrell lo tumen, te djiwell o mensho gar o chapastar kokres. Na-a, i mensho djiwell hako labestar, hoi dran o mui o baro Deblestar win djal. 4 An kol tsele star-deesh bersha djan tumare koola ap tumende gar paash, un tumare pire wan gar pesso. 5 Jaake haiwenn tumer an tumare djia, tumaro baro Dewel kras tumentsa har i dad peskro tchaweha. 6 Doleske denn jak ap i laba tumaro baro Deblestar, un djan ap leskre drom, un shunenn o tselo djijeha ap leste.
7 Tumaro baro Dewel anell tumen an i latcho them. An kau them nashenna panja, hoi wenn win dran i phub, un nashenn i berge tele an i telstuno them. 8 An kau them well giba un djob bares, ninna drake, faige, granatikre phabja. Djeteskre ruka un gwin dell kote ninna. 9 Kowa hi i them, kai hi bud chapen tumenge. Halauterestar hi doha koi. An kau them hi ninna barra, kai saster dren hi. Un an i berge nai denn lolo saster win. 10 Un te chan un wan tchales, palle sharenn tumaro baro Debles ko latcho themeske, hoi lo tumen das.
Ma bistrenn o baro Debles!
11 Denn tumen jak, te bistrenn gar tumaro baro Debles, jaake te denn gar buder jak ap leskre laba, un ap leskro tchatchepen, un ap halauter, hoi job tumendar kamella, kowa hoi me tumenge kau diwes penau, te hunte krenn. 12 An ko tsiro, kai djal tumenge mishto, un nai chan tumenge tchales, un djiwenn an shukar khera, 13 un tumen wan bud grumja, bakre, rup un sonakai, un halauter hoi tumen hi, was budeder, 14 palle denn jak, te wenn gar pre-phurdo, un bistrenn tumaro baro Debles, koles, kai anas tumen win dran o them Egiptia, kai tumer pandle budepangre hans. 15 Job sikras tumen o drom an ko baro mulo tato them, kai tumen daar his, an koleste tchilatche sapa un skorpione hi. Kote, kai o kham lauter pre chatchras, un kek pani dell, mukas lo tumenge pani dran i baro sorelo bar te nashell, 16 un das tumen Manna te chal an o mulo tato them, ko maro, hoi tumare phure gar prindjran. Kote sikras lo tumen: Te hi lo gar tumentsa, nai krenn tchi. Ninna kamas lo win te hatsell, hoi an tumare djia hi, te nai krell lo les tumenge pal kowa mishto. 17 Un tumer te nai penenn gar an tumare djia: Miri soor un mire wastengri budi anas mange kau tselo brawlepen! 18 Doleske ma bistrenn tumaro baro Debles! Job hi kowa, kai tut i soor das, te nai lenn tumenge brawlepen khetne. Un jaake rikrell job kowa, hoi lo tumare phurentsa win kras. Ninna kau diwes rikrell lo pes ap kowa.
19 Ma bistrenn tumaro baro Debles! Ma nashenn wawar deblen palla! Un ma witsrenn tumen glan lende tele, te mangenn len an! Te krenn kowa, palle dau tumen kau diwes miro lab pre, te wenn tumer jaake mulo dino, 20 har kol wawar menshe, kai o baro Dewel glan tumende marell. Tchatchepah, tumer te shunenn gar ap leskro rakepen, wenn tumer maredo.