Kyaamz Timothi Kaai Keu Aarz
Mony tak
1
Ohz naeh Paul, an naeh teu maan Khris Yesuhz tawiz reung dawhz Phraz Pen Caoh ceun keu tih an ngaz aez phawmz an naeh tuhz Khris Yesuhz ne, 2 taemz aez kuanz ohz Timothi, an ohz rak nahz. Kez cuz, reung dengz teur yawng boh reung dengz nimz an truz thaz Paz Phraz boh Khris Yesuhz an naeh Tahz ehz ne aez naeh kaai mih se kamz.Mony reu ma aez keum rang
3 Ohz taang kez cuz Phraz Pen Caoh meuz ohz suz tawngz seuk ngih teuk bimz ne ohz tang se se mih, Phraz Pen Caoh an diz naeh Phraz an ohz leh phawmz seu ngamz an mas toz daehz koz kwaai ceun ihz keu daehz keu daepz ehz keui koz kwaai truz. 4 Ohz tang mih omz ngaai, ohz sunz awlz mih baaiz aez ohz thanz paw seuz phawmz teuk. 5 Ohz tang reung dengz mih yum an nam seuk cih. Reung dengz yum an seun teungz tae leh mah thao pehz Lois boh mah pehz Eunice ne ohz tam phawmz daz seu ni a wa naeh tuhz mih. 6 Kawp ceun diz ohz aez mih nahz seu tih, aez mih cao siupz lan reung kyahz an Phraz Pen Caoh aez mih nahz meuz ohz leh tihz daehz taangz kaai mih. 7 Kawp daz Phraz Pen Caoh nam aez ehz nahz phawmz doz doz, keuiz daz aez phawmz an maang taanz khoz, phawmz an mawz rak boh phawmz an mawz leh toz daehz. 8 Kawp ceun diz yak keu sehz khaam saak se ta Tahz ehz, yak keu sehz ohz naeh ihz klaez khawk kawp Hnhz. Khaam tukz khahz kawmz ohz ta reu oiz rak tawiz taanz khoz Phraz Pen Caoh naz. 9 Phraz Pen Caoh khyawt ehz rae raak leh ehz aez seu ngamz ne, nam anz kawp ehz cih rak, keuiz daz kawp reung aanz Hnhz boh kez cuz Hnhz an aez ehz nahz tuhz Khris Yesuhz thaz meuz prih keu tehz maat naeh. 10 Kez cuz an diz a wa plaez ehz nahz seu ni tawiz Tahz Khyawt ehz, Khris Yesuhz paw truz. Hnhz ya thengz reung dengz yam rae leh truz phawmz boh an nam mawz luh. Phawmz an diz plaez ehz nahz tawiz reu oiz rak. 11 Ta reu oiz rak an ni Phraz Pen Caoh khaanz ohz naeh ihz rawz traz, naeh teu maan boh naeh sra an sawnz aez ihz nahz. 12 Kawp ceun diz ohz talz tukz khahz an ni. Keuiz daz ohz nam keu sehz, kawp daz ohz mas daehz yum yaeh. Ohz tam phawmz Yesuhz pao bawnz an ohz aapz Hnhz nahz taw phraeoz seu ngihz Hnhz mial truz. 13 Tawnz mok khreumz khreumz mony reu ma an anz an mih a wa ngarz tawiz reung dengz yum boh reung dengz rak yaw tuhz Khris Yesuhz. 14 Pao yawt traz an aapz mok mih nahz tawiz Khuanz Seu Ngamz an naeh tuhz ehz raez. 15 Mih mas boh ihz prih Asia hacz aamz keui a wa thengz ohz. Tuhz keuh ne pa tang Phikelus kaar Hermokenes. 16 Aez reung dengz teur yawng Tahz naeh kaai ihz kaang keuh Onesiphorus se kamz, kawp daz hnhz kai cih aez ohz sa phawmz. Sangz daz ohz talz nuarz hirz kaw hnhz nam keu sehz kawp ohz, 17 maat kaz seu diz lawh, meuz hnhz phraeoz weng Rom ne khatz phawmz khahz ohz ka nam awlz. 18 Kaai seu ngihz an diz aez hnhz bawnz reung dengz teur yawng tawz Tahz ehz se kamz. Meuz ohz naeh tawz weng Ephesus kaw hnhz kawr ohz thanz teur nae ne mih mas rak baaiz boh.