Keum rang kawp kez cuz
2
Kuanz ohz aez, leh keum rang tawiz kez cuz an naeh tuhz Khris Yesuhz raez, 2 an mih ngarz tawz ohz aacz ngaai ihz heungz ne aapz aez ihz an rak seum yum rae an caang sawnz aez ihz keui nahz. 3 Ceun siukz rak Khris Yesuhz ne nyeun reung dengz kreuk kawmz ohz lah. 4 Ihz cih siukz an cih aez maen lomz khunz siukz an khaanz daehz ne nam sukz tawiz kaanz ihz prih. 5 Ihz an kut pawiz khrehz khrehz kaw beuk nam cih tawiz lawkz laai ne nam bawnz a suz pae. 6 Ihz khatz phawmz cih kaanz sraakz kaw trohz bawnz aacz bucz an teur baengz. 7 Ceu kuz an ohz lao raez, Tahz ngaz aez mih nahz nyaan aez loz phawmz klawhz meoz. 8 Tang tang Yesuhz Khris, kheuz khunz Dawit an meu rae imz thaz reung dengz yam, tawiz traz reu oiz rak an ohz rawz raez. 9 Kawp reu oiz rak an ni ohz talz peur teuk thanz paw ihz leh nuarz hirz mat naeh ceun ihz raai. Keuiz daz mony reu ma Phraz Pen Caoh samz nam caang mat mok. 10 Kawp ceun diz ihz an Phraz Pen Caoh ras mok keui thanz paw bawnz reung dengz khyawt tawiz Khris Yesuhz rae aez bawnz bunz sre cen cen ne ohz bawnz nyeun klawhz ceu klawhz meoz. 11 Mony reu ma an ni naeh mony rak seum leh tawiz, “Beuk ehz yam tawiz Hnhz ne ehz kaw ngaz imz tawiz Hnhz, 12 beuk ehz nyeun kaw bawnz upz peung tawiz Hnhz, beuk ehz thiangz Hnhz kaw Hnhz ngaz thiangz ehz, 13 beuk ehz nam maang saet ca kaw saet ca Hnhz tae se se. Kawp daz Hnhz nam caang thengz mony reu ma Daehz.”Ihz cih kaanz Phraz an Hnhz trohz phawmz
14 Mih aez seu tih ihz daehz nahz lawng an ni. Lao seumz mawn mawn keuh aacz ngaai Phraz Pen Caoh aez keuh wiar an teur thiangz kaai mony reu ma. An ni nam maang a keoz naehz, namz taw seuk ya ihz teuk ngarz pan. 15 Khatz phawmz aez daehz naeh ihz cih kaanz an tam phawmz bawnz aacz ngaai Phraz Pen Caoh, ihz cih kaanz nam lo keu sehz kaanz daehz cih rae leh traz an anz sawnz aez ihz nahz tawz tawz maen maen lah. 16 Lo wiar an teur upz an nam ro se Phraz boh an nam laai lawng, kawp daz an keu diz cih aez ihz praasz Phraz. 17 An keuh sawnz ne ngaz prae lan ceun tut an caang suamz maai. Tuhz keuh ne pa Himenaeus kaar Philetus. 18 Keuh a wa pleung thaz reung dengz traz an anz. Keuh daz kraao reung dengz meu rae imz ne a wa peun rae keuh cih teuk luh reung dengz yum ihz teur ka. 19 Sangz daz ceun diz kaw ti tam kaang Phraz Pen Caoh ne klakz khreumz rae tawkz mok lik daz, “Phraz Cen Cen mas an naeh ihz Daehz,” boh “Ihz an daz daehz naeh ihz Hnhz keui, aez wiar meoz nam rak.” 20 Tuhz kaang mawh longz ne maang klohz maang sroz klawhz meoz teur ka leh khamz cih, teur ka leh ron cih, teur ka kaw leh khaehz cih, leh keu tehz cih, kreung tawnz teur ka cao tawiz meuz cih pawiz an maang sre, teur ka kaw cao se se lang kaang. 21 Ihz an cih aez daehz seu ngamz thaz an nam rak ne naeh kreung tawnz an maang sre, hnhz ngaz naeh kreung tawnz an theukz rae tawz ti ta tahz kaang cao rae hnhz ngaz naeh kreung tawnz an peun tan mok tawiz kaanz an rak klawhz meoz. 22 Wiar meoz an nam rak ihz plung keui song rae luam treupz treupz reung dengz keu sangz, reung dengz yum, reung dengz rak boh reung dengz nimz keui tawiz ihz koz kwaai Caoh Phraz tang phawmz keu sangz raez. 23 Yak cawnz tawiz ihz nam taap, ihz klukz keui teur thiangz daehz, mih mas an diz cih aez ihz teur kawi daehz. 24 Peur cao Tahz ne nam bawnz teur kawi. Hnhz lo keu ceum cu klawhz ihz rae naeh ihz mawz sawnz aez ihz nahz, naeh ihz caang nyeun, 25 kaai ihz cih khatz hnhz kaw mok phawmz keu ceum rae mawz sawnz sungz mahz aez keuh nahz. Beuk cih ceun diz doz Phraz Pen Caoh caang aez keuh nahz reung dengz caanz an daehz kawi rae aez keuh mas truz traz an anz. 26 Beuk cih ceun diz keuh ngaz mas toz daehz rae lawt thaz dakz Manaat an mat mok keuh boh an cih aez keuh teuk ngarz hnhz.