Kyaamz Timothi Kaai Hawkz
Mony tak
1
Ohz naeh Paul, an naeh teu maan Khris Yesuhz tawiz mony lao Tahz Khyawt ehz Phraz Pen Caoh boh Khris Yesuhz an ehz mang ne,2 ohz taemz aez kuanz mawn ohz Timothi an naeh tuhz reung dengz yum nahz lik an ni. Aez kez cuz, reung dengz teur yawng boh reung dengz nimz thaz Paz Phraz Pen Caoh boh Tahz ehz Khris Yesuhz ne naeh kaai mih se kamz.
Mony paamz seu tih lawng sra tuh
3 Ceun ohz seumz mih nahz meuz ohz lan prih Makedoni ne aez mih kiutz tuhz weng Ephesus rae kan ihz teur ka nahz yak aez keuh sawnz aez traz an pleung, 4 yak aez kraao keuh hacz maat tawiz a pum an ihz krai, boh craangz ihz keu daehz keu daepz daehz an nam wa bawnz. An keu diz namz taw cih aez ihz keui teur thiangz daehz. An keu diz nam maang a keoz ta a kyaam Phraz Pen Caoh an caang penz tawiz reung dengz yum ehz. 5 Traz an seumz lao ceun ni ne aanz cih aez penz reung dengz rak an truz thaz phawmz keun ra, phawmz an mas toz daehz boh phawmz yum caet. 6 Ihz teur ka pleung thaz an keu diz rae seuk weur lan cu plaakz upz maat maat.
7 Keuh sunz penz sra mawz kyaamz, keuiz daz keuh nam mas daehz daz naehz, samz daz mawn baaiz.
8 Ehz mas sinz traz an diz rak kaai ihz kyaangz tawiz rak rak. 9 Ehz mas tang sinz traz an diz nam anz ta ihz keu sangz keui nahz, keuiz daz naeh ta ihz nam tawiz sinz traz boh ihz cih khatz phraz, naeh ta ihz nam ro se phraz boh ihz moh tuhz reung dengz kawi, ihz nam seu ngamz boh ihz nam maang phraz traz, ihz piamz mah paz boh ihz piamz ihz, 10 ihz kawi kamesuhz boh keur meh teur deuiz boh keun nyah teur deuiz teur kyaangz daehz, ihz ka ihz boh ihz kaoz ihz, ihz an khaam saak se an nam anz boh ihz cih khatz traz tang meoz keui nahz. 11 Traz an diz teur suamz tang reu oiz rak bunz mawh Phraz Pen Caoh an rak rae naeh an Hnhz aapz aez ohz nahz.
Kez cuz Tahz
12 Ohz taang kez cuz Tahz ehz Khris Yesuhz, an aez ohz nahz keum rang, kawp Hnhz mok ohz naeh ihz maang saet ca rae khaanz ohz cih kaanz Daehz. 13 Sangz daz ohz tomz naeh ihz upz pleung Phraz, ohz naeh ihz saehz pae suamz Tahz ehz daz kaw Hnhz teur yawng ohz, kawp daz ohz nam yum nam mas rae cih maen ceun diz. 14 Kez cuz Tahz ehz thawkz aez ohz nahz leung leuz, tawiz reung dengz yum boh reung dengz rak an truz thaz Khris Yesuhz. 15 “Khris Yesuhz truz khyawt ihz maang reung dengz kawi tuhz prih keu tehz,” daz ceun ni ne tawz baaiz. Naeh mony reu ma an rak seum leh tawiz hacz aamz. Tuhz ihz maang reung dengz kawi ne ohz leuz ihz. 16 Keuiz daz an Phraz Pen Caoh teur yawng ohz ceun diz ne aez plaez an Yesuhz Khris phawmz hanz mawn kaai ohz, sangz daz tuhz ihz maang reung dengz kawi ne ohz leuz ihz kaw aez naeh pung taek ta ihz an ngaz yum Hnhz waaiz an ni keui nahz rae aez keuh bawnz phawmz cen cen. 17 Aez Khunz cen cen, an nam mawz luh nam mawz yam, an leh ngaai yawt nam awlz, an naeh Phraz seu su pan ne aez Hnhz maang bunz maang kung cen cen se kamz! Amen.
18 Kuanz ohz Timothi aez, ceun ihz taangz phraz keui tak mok lawng mih ne ohz leh mony lao an diz aapz aez mih nahz, beuk mih leh tawiz mony reu ma an keu ni kaw mih caang tiukz yaak yaak leh an rak boh. 19 Tawnz mok reung dengz yum mih boh mok rak rak phawmz mas toz daehz. Ihz teur ka nam leh phawmz an mas toz daehz rae ceun luang reung dengz yum keuh ne a wa luh. 20 Tuhz keuh ne pa Himenaeus boh Alesander, ohz aapz kaar tuhz tihz Satan ne aez kaar sawnz leh an nam rak seum saehz Phraz.