Paul maanyz ihz yum yam Thessalonika keui suz tawngz aez cumz daehz nahz
3
Thaz titz thaz puatz ne kuanz mai keui aez, aez mony reu ma Tahz ehz sirz lan liz liz klawhz ti rae aez ihz keui nap suamz mony reu ma Tahz ceun pehz nap suamz ne suz tawngz aez ehz nahz raez. 2 Suz tawngz aez tang ehz nahz aez ehz lawt thaz ihz meukz boh ihz raai keui. Kawp daz klawhz ihz keui nam maang reung dengz yum.3 Keuiz daz Phraz Pen Caoh maang saet ca. Hnhz ngaz cih aez pehz klakz khreumz rae kan khraez thaz Manaat. 4 Ehz tam phawmz tuhz Tahz an pehz cih tawiz an ehz seumz boh an pehz ngaz siupz cih lan aarz ngaai.
5 Aez Tahz kawr phawmz pehz mas reung dengz rak Phraz Pen Caoh boh aez pehz maang reung dengz nyeun ceun Khris se kamz.
Mony paamz seu tih yak aez laac
6 Kuanz mai keui aez, ehz leh mus Tahz ehz Yesuhz Khris seumz aez pehz wiar kuanz mai an laac an nam teuk ngarz traz an anz an ehz seumz. 7 Kawp daz toz pehz mas boh ngaz trohz cih yeung tawiz ehz ceun nae ne. Meuz ehz naeh kawmz pehz ne ehz nam laac. 8 Ehz nam suamz maat khangz yaeh. Yak aez pehz nyaapz tawiz ehz ne ehz cih kaanz seuk ngih teuk bimz. 9 An ehz cih ceun diz ne kawp daz ehz nam theukz pehz kawr daehz nam anz, aez pehz yeung tawiz an ehz cih. 10 Meuz ehz naeh kawmz pehz ne ehz a wa seumz daz, “Beuk nam cih kaanz kaw yak aez keuh suamz.”
11 Kawp daz ehz ngarz ihz laac teur ka naeh peur lah pehz. Keuh nam sunz cih kaanz, samz cih rop kaanz ihz. 12 Ehz leh mus Tahz Yesuhz Khris lao sawz aez ihz keu diz nahz, cih kaanz daehz rak rak rae damz kokz daehz.
13 Kuanz mai keui aez, yak klaez phawmz tawiz pehz cih an rak. 14 Beuk caang maang seu hawkz hawkz nam teuk ngarz mony reu ma an ehz taemz seumz mok tuhz lik an ni kaw maatz mok hnhz, aez hnhz klez ne yak raen hnhz. 15 Keuiz daz yak mok hnhz naeh ceun raan su, aez seu tih hnhz nahz aez naeh ceun kuanz mai.
Mony tak seumz thaz puatz
16 Aez toz Tahz an nimz ne aez pehz nahz an nimz se se kaai klawhz lawng se kamz. Aez Tahz an diz naeh kawmz pehz hacz aamz se kamz.
17 Ohz naeh Paul leh tihz daehz taemz mok mony seumz an ni. Ti dutz lik ohz klawhz phiunz ne ohz kai taemz ceun ni.
18 Aez kez cuz Tahz ehz Yesuhz Khris naeh kawmz pehz hacz aamz se kamz.
Kyaamz Thessalonika kaai keu aarz a wa dutz.