1TH 1

Kyaamz Thessalonika Kaai Hawkz

Mony Paul tak ihz yum yam weng Thessalonika

Ohz Paul, Silas boh Timothi, ehz taemz lik an ni aez cumz caoh tuhz weng Thessalonika, an naeh ihz Paz Phraz boh Tahz Yesuhz Khris.

Aez Kez cuz boh reung dengz nimz an truz thaz Phraz keui aez naeh kaai pehz se kamz.

Reung dengz yum ihz yum yam weng Thessalonika

2 Ehz lupz phrawz se se kez cuz Phraz Pen Caoh kawp pehz, suz tawngz se se ta pehz. 3 Ehz tang se se aacz ngaai Phraz Pen Caoh an naeh Paz ehz an pehz yum rae cih tawiz, pehz rak ihz rae khatz phawmz cih kaanz ta keuh, pehz mok phawmz hanz hanz rae mang klakz khreumz Tahz ehz Yesuhz Khris keu ni. 4 Kuanz mai keui aez, ehz mas Phraz Pen Caoh rak pehz rae ras mok pehz. 5 Kawp daz reu oiz rak Phraz Pen Caoh an ehz krai pehz nahz ne nam anz taw mony reu ma maat maat, pa tang taanz khoz boh Khuanz Seu Ngamz, tang tam phawmz yum mawn keui. Pehz mas boh ehz naeh ihz ceun nae meuz naeh kawmz pehz ne ehz penz a keoz ta pehz. 6 Sangz daz pehz talz reung dengz peur teuk heungz baaiz kaw pehz naeh ihz cih yeung tawiz ehz boh Caoh Phraz, pehz yum saanyz rap mony reu ma Phraz Pen Caoh tawiz reung dengz seuz phawmz an truz thaz Khuanz Seu Ngamz. 7 Pehz penz truz pung taek ihz yum yam prih Makedoni boh prih Akhaia keui nahz hacz aamz. 8 Kawp daz mony reu ma Tahz an lae thaz pehz ne phraeoz lan prih Makedoni boh prih Akhaia se nam kaz an pehz yum Phraz Pen Caoh kaw sirz lan klawhz ti rae ehz thanz paw nam maang ti lao lawng pehz yum. 9 Ihz keui krai daz lawng meuz ehz lan cu pehz ne pehz rak ehz thanz teur nae boh pehz wiar thengz pung raang saangz thuhz rae waaiz truz cu waiz Phraz an maan an mawn, an phawmz imz. 10 Keuh krai tang aez pehz ngawm Kuanz Phraz an naeh Yesuhz an ngaz truz thaz kaang raaoz. Yesuhz an Phraz Pen Caoh cih aez meu rae imz thaz reung dengz yam ne ngaz khyawt ehz thaz tawz sahz Phraz Pen Caoh.