Paul cih kaanz Phraz tuhz weng Thessalonika
2
Kuanz mai keui aez, pehz mas boh an ehz lan keulz a pehz ne nam thengz maat. 2 Pehz mas boh meuz ehz maat lan cu pehz ne, ehz paw a wa talz peur teuk, talz ihz cih meukz daehz tuhz weng Philippi. Sangz daz ihz cih khatz ehz heungz baaiz kaw Phraz Pen Caoh aez ehz nahz keum rang rae rawz yaak yaak pehz nahz reu oiz rak Phraz Pen Caoh. 3 Ehz leh an pleung, an woi, an upz suamz rae khyawz leh pehz nam anz. 4 Keuiz daz ceun Phraz Pen Caoh mok ehz naeh ihz theukz rae aapz ehz nahz reu oiz rak. Ehz krai aez ihz trohz phawmz nam anz, aez trohz phawmz Phraz Pen Caoh an caet phawmz ehz. 5 Pehz mas boh ehz nam upz khyawz suamz ihz, ehz nam maang phawmz lawz phahz ne Phraz Pen Caoh naeh saak se ehz. 6 Sangz daz ehz naeh teu maan Khris, caang cao suamz boh pehz kaw ehz nam khahz sre an truz thaz ihz an naeh pehz boh ihz. 7 Keuiz daz meuz ehz naeh kawmz pehz ne ehz lum la pehz naeh ceun mah lum la kuanz daehz. 8 Ehz rak yaw pehz baaiz rae sunz aez pehz nahz reu oiz rak Phraz Pen Caoh, nam kaz seu diz sunz aez pa tang phawmz daehz. 9 Kuanz mai keui aez, pehz mas boh an ehz cih kreuk cih nyaapz kaw khatz phawmz cih. Yak aez pehz reu tawiz ehz ne ehz cih kaanz damz kokz daehz seuk ngih teuk bimz rae rawz aez pehz nahz reu oiz rak Phraz Pen Caoh.10 Meuz ehz moh kawmz pehz an yum yam ne an ehz cih kaw naeh an seu ngamz, an keu sangz, an nam maang ti nae ne, pehz naeh ihz mas tawiz, Phraz Pen Caoh kaw mas tawiz. 11 Pehz mas an ehz rak pehz ne naeh ceun paz rak kuanz, ehz aez pehz nahz keum rang rae peuk klakz phawmz pehz, sawz tang pehz nahz klawhz ihz, 12 aez pehz moh trohz phawmz Phraz Pen Caoh, aez kiungz Hnhz raak pehz kut tuhz prih Daehz boh bunz Daehz.
13 Ehz lupz phrawz kez cuz Phraz Pen Caoh se se, kawp daz meuz pehz saanyz rap mony reu ma Phraz Pen Caoh an pehz ngarz tawz ehz ne nam naeh ceun mony reu ma ihz lao, keuiz daz naeh ceun mony reu ma Phraz Pen Caoh naeh an mawn an maan ne meu rae tuhz pehz an yum yam. 14 Kuanz mai keui aez, pehz penz truz ceun cumz caoh tuhz prih Yio an naeh ihz Khris Yesuhz. Ceun pehz talz ihz daehz pae suamz daehz ne keuh kaw talz ihz Yio keui pae suamz daehz. 15 Yio teur ka keui a wa piamz ihz taangz phraz, a wa piamz Tahz Yesuhz, seu ni keuh yeung pae suamz wah thengz tang ehz. Keuh cih nam aez trohz phawmz Phraz Pen Caoh, khatz ihz hacz aamz. 16 Keuh kan ehz yak aez ehz rawz aez ihz an nam anz kheuz Yio keui nahz, yak aez keuh bawnz an khyawt. An keuh cih ne bucz leh daehz nahz reung dengz kawi an daehz pleung. Thaz titz thaz puatz ne tawz sahz Phraz Pen Caoh naeh kaai keuh.
Paul sunz awlz ihz yum yam Thessalonika
17 Kuanz mai keui aez, meuz ehz praasz pehz seu co ne praasz toz pan, phawmz nam praasz, ehz tang pehz baaiz rae ehz baaiz khatz phawmz daehz aez awlz mial pehz. 18 Kawp ceun diz ehz sunz truz cu pehz, ohz Paul kyaam seu naeh laehz kaw Satan kan ehz. 19 Meuz Tahz ehz Yesuhz ngaz mial truz ne reung dengz an ehz mang, reung dengz an ehz seuz phawmz boh paanz kumz maang bunz ehz ne naeh pehz nam anz haz? 20 Pehz naeh bunz ehz boh reung dengz seuz phawmz ehz mawn mawn.