Kyaamz Thessalonika Kaai Keu Aarz
Mony Paul tak ihz yum yam weng Thessalonika
1
Ohz Paul, Silas boh Timothi, ehz taemz lik an ni aez cumz caoh tuhz weng Thessalonika, an naeh ihz Phraz Pen Caoh an naeh Paz ehz boh Tahz Yesuhz Khris.2 Aez Phraz Pen Caoh an naeh Paz ehz boh Tahz Yesuhz Khris aez pehz nahz kez cuz boh reung dengz nimz se kamz.
Phraz Pen Caoh tatz traz meuz Yesuhz truz
3 Kuanz mai keui aez, ehz bawnz lupz phrawz se se kez cuz Phraz Pen Caoh kawp pehz ceun ehz trohz cih kawp daz reung dengz yum pehz mawh truz tikz tikz rae pehz kaw baaiz mawz teur rak truz daehz. 4 Kawp ceun diz ehz caang lupz lawng pehz tawiz cumz caoh Phraz Pen Caoh, sangz daz pehz talz peur teuk boh ihz pae suamz daehz kaw pehz yeung yum, pehz yeung nyeun.
5 An keu ni hacz aamz ne sunz daz Phraz Pen Caoh tatz traz tawz ti, an pehz talz peur teuk ceun diz ne aez pehz kiungz prih Phraz Pen Caoh. 6 Phraz Pen Caoh ngaz tawpz aez phrengz phrengz kaai ihz cih peur teuk pehz nahz aez keuh peur teuk. 7 Kaai ihz talz peur teuk kaai pehz boh kaai ehz samz aez sa phawmz. Meuz Tahz Yesuhz boh teu maan kaang raaoz taanz khoz mawh Daehz cur truz thaz kaang raaoz tang mukz ngal ne, 8 Hnhz ngaz aez taam kaai ihz nam mas Phraz Pen Caoh boh kaai ihz nam teuk ngarz reu oiz rak Tahz ehz Yesuhz. 9 Keuh ngaz talz taam luh sumz cen cen rae praasz lan thaz aacz ngaai Caoh Phraz boh thaz bunz taanz khoz Hnhz. 10 Kaai seu ngihz Hnhz truz ne bunz Hnhz thaangz kaai ihz seu ngamz Daehz rae cih aez sangz peur lah ihz yum Daehz. Tuhz ihz keu diz pa tang pehz, kawp daz pehz yum mony reu ma an ehz krai saak se.
11 Kawp ceun diz ehz suz tawngz aez se se pehz nahz, aez pehz naeh ihz kiungz tawiz an Phraz Pen Caoh raak rae cih tawiz. Aez taanz khoz Hnhz cih aez keunyz an pehz sunz cih an rak klawhz meoz rae cih teuk wa kaanz reung dengz yum pehz se kamz. 12 Beuk naeh ceun diz mus Tahz ehz Yesuhz ne ngaz bunz mawh tuhz pehz, pehz kaw ngaz bunz mawh tuhz Hnhz tawiz kez cuz Phraz Pen Caoh ehz boh Tahz ehz Yesuhz Khris.