Seu ngihz Tahz
5
Seu ni, kuanz mai keui aez, ehz nam lo taemz aez pehz nahz lawng kraao an diz boh seu ngihz an diz. 2 Kawp pehz mas rak rak seu ngihz Tahz ngaz phraeoz ne naeh ceun peun rah truz teuk bimz. 3 Meuz ihz keui daz, “Katz ngang boh lawt phez boh,” ne an ya teuk luh keui klaez truz luat kaai keuh ceun keun nyah keun meur suhz maang kuanz rae keuh wiar nam lawt. 4 Keuiz daz kuanz mai keui aez, pehz nam naeh tuhz an bimz rae nam lo khranz seu ngihz an diz naeh ceun peun rah truz. 5 Pehz hacz aamz naeh kuanz an thaangz seu ngihz. Ehz nam anz kuanz an bimz teuk bimz. 6 Kawp ceun diz yak yaetz reuk ngeut ceun ihz nam maang seu tih, teur aacz daehz dangz toz pao peun tan mok. 7 Kawp daz ihz yaetz reuk ngeut meuz teuk bimz, ihz cawc kaw kai cawc teuk bimz. 8 Kawp ehz naeh kuanz seuk ngih rae peun tan mok toz daehz, kap kreung kan seu ongz an naeh reung dengz yum boh reung dengz rak, cak makz pao mang reung dengz khyawt. 9 Phraz Pen Caoh khaanz mok aez ehz talz taam nam anz, aez bawnz reung dengz khyawt kawp Tahz ehz Yesuhz Khris. 10 Meuz ehz imz se nam daz, meuz ehz yam se nam daz, ehz imz tawiz Hnhz ne Hnhz a wa yam taangz ehz nahz. 11 Kawp ceun diz teur aez daehz nahz keum rang rae cih peuk klakz aez ceun an pehz yeung cih boh ne.Mony seumz thaz puatz
12 Kuanz mai keui aez, ehz sawz pehz aez pehz nap suamz ihz khatz phawmz cih kaanz Phraz peur lah pehz an naeh ihz peur aacz pehz, an aez seu tih pehz tuhz Caoh Phraz. 13 Nap suamz ro se rak keuh kawp kaanz keuh cih. Moh aez daehz teur maen raez.
14 Kuanz mai keui aez, ehz sawz thaengz pehz nahz, pehz aez seu tih ihz moh maat keui, aez keum rang ihz phawmz kyehz, kawr ihz keum rang kyehz, mok phawmz hanz hanz kaai klawhz ihz. 15 Yak leh an raai tawpz an raai, khatz phawmz cih an rak se se kaai daehz teur deuiz boh kaai ihz hacz aamz raez.
16 Seuz phawmz se se raez, 17 suz tawngz se se raez, 18 lupz phrawz kaai klawhz lawng raez, kawp daz Phraz Pen Caoh sunz aez pehz an imz tawiz Khris Yesuhz keui cih ceun diz.
19 Yak cih teuk pras taanz khoz Khuanz Seu Ngamz Phraz. 20 Yak saangz maehz mony reu ma ihz taangz phraz. 21 Caetz yawt mony reu ma an diz klawhz meoz meoz rae tawnz leh an rak klakz klakz raez. 22 Wiar an nam rak klawhz meoz meoz raez.
23 Aez Phraz Pen Caoh an naeh Tahz an nimz ne cih aez pehz seu ngamz dutz rae yak aez toz, phawmz, khuanz pehz maang ti nae taw phraeoz seu ngihz Tahz ehz Yesuhz Khris mial truz se kamz. 24 Phraz Pen Caoh an raak pehz ne maang saet ca rae ngaz cih ceun diz.
25 Kuanz mai keui aez, suz tawngz aez tang ehz nahz raez.
26 Kuanz mai keui aez, leh reung dengz rak yaw Phraz Pen Caoh rae teur tak daehz raez.
27 Ohz leh a na Caoh Phraz sawz aez pehz nahz, rawz plaez kuanz mai hacz aamz nahz lik an ni raez.
28 Aez kez cuz Tahz ehz Yesuhz Khris naeh kawmz pehz se kamz.
Kyaamz Thessalonika kaai hawkz a wa dutz.