Reung moh aez trohz phawmz Phraz Pen Caoh
4
Mony an kiutz ne kuanz mai keui aez, an pehz rak seum moh rae aez Phraz Pen Caoh trohz phawmz ne pehz a wa sawnz leh kaai ehz, aez keunyz lak ceun pehz cih tawiz ne ehz sawz pehz nahz rae aez pehz nahz keum rang kaai mus Tahz Yesuhz. 2 Pehz mas boh ehz seumz pehz taangz Tahz Yesuhz ceun nae ne. 3 Phraz Pen Caoh sunz aez pehz moh seu ngamz rae aez wiar kamesuhz. 4 Pehz klawhz ihz bawnz khraenz mial toz daehz, aez seu ngamz boh aez maang sre. 5 Yak khawtz keun nyah ceun ihz tuhz prih keu tehz setz an nam mas Phraz. 6 Kaai an keu ni yak cih pleung rae peun pae na kaang kaai kuanz mai yum yam daehz. Caoh Phraz ngaz aez taam kaai ihz cih pleung keu ni, ceun ehz a wa lao mok aez pehz nahz seu tih. 7 Phraz Pen Caoh raak ehz cih meukz cih woi nam anz, raak ehz aez seu ngamz. 8 Kawp ceun diz ihz nam leh mony seumz an ni ne nam anz thiangz ihz, naeh thiangz Phraz Pen Caoh an aez pehz nahz Khuanz Seu Ngamz.9 Lawng teur rak daehz kuanz mai ne ehz nam lo taemz aez pehz nahz lik, kawp daz Phraz Pen Caoh a wa sawnz aez pehz klawhz ihz lawng teur rak daehz. 10 An anz mawn tae, pehz a wa rak kuanz mai ihz prih Makedoni. Kuanz mai keui aez, ehz sawz pehz aez rak leuz lak an diz boh. 11 Ceun ehz seumz mok pehz ne pehz trohz moh katz moh ngang, nam sukz tawiz kaanz ihz pan rae trohz leh tihz daehz cih kaanz damz kokz daehz. 12 Beuk cih ceun diz, an pehz moh suamz klawhz seu ngihz ne aez pehz maang sre aacz ngaai ihz nawk rae nam lo pao suamz ihz.
Tahz ngaz mial truz
13 Kuanz mai keui aez, ehz nam sunz aez pehz nam mas traz an anz, lawng ihz a wa yam peun, yak aez pehz phawmz kyehz ceun ihz nam maang reung dengz mang. 14 Kawp daz ehz yum Yesuhz yam rae meu rae imz ne ehz yum tang Phraz Pen Caoh ngaz raak leh ihz yum yam an a wa yam peun keui truz tawiz Yesuhz.
15 Mony reu ma toz Tahz ehz lao mok daz, taw Hnhz mial truz ne ehz yeung imz keu ni awlz Yesuhz nam tan aacz ihz yum yam an a wa yam peun. 16 Kawp daz toz Tahz cur truz thaz kaang raaoz lao tang reus usz, tang reus khunz teu maan kaang raaoz putz piz ne ihz yum tuhz Khris rae yam keui bawnz rawi aacz. 17 Waaiz an diz, ehz yeung kiutz phawmz imz keu ni samz Phraz Pen Caoh ngaz leh phrawz ehz boh keuh tawiz peu eumz rae bawnz awlz Tahz lang plengz. Ehz samz bawnz moh kawmz Tahz se se. 18 Kawp ceun diz leh mony reu ma an keu ni teur aez daehz nahz keum rang.