1TH 3

Kawp ehz nam nyeun bawnz ceu nawhz rae Silas boh ohz pan thaang rak seum kiutz tuhz weng Athens. 2 Aaiz phuhz seum bohz ehz Timothi, an cih kaanz Phraz teur kawmz rae rawz reu oiz rak Khris. Ta hnhz aez keum rang kawr aez pehz yum klakz. 3 Yak aez pehz keun titz kawp tukz khahz an keu ni. Pehz mas boh reung dengz tukz khahz keu ni naeh an Phraz Pen Caoh khriungz mok. 4 Kawp daz meuz naeh kawmz pehz kaw ehz a wa lao mok teuk aacz daz ehz hacz aamz ngaz talz tukz khahz ne seu ni a wa penz, naeh ceun pehz mas rak rak. 5 Kawp ceun diz meuz ohz nam nyeun bawnz ceu nawhz rae ohz cao Timothi dawmz yawt reung dengz pehz yum. Ohz doz pehz lan tawiz Manaat kyaam ya pehz rae an ehz cih kaw doz naeh an thengz maat.

6 Keuiz daz Timothi weng truz thaz pehz ne krai aez reu oiz rak lawng an pehz yum boh an pehz rak. Hnhz daz pehz tang se se an ehz cih bohz rak rae pehz sunz awlz ehz ceun ehz sunz awlz pehz. 7 Kawp ceun diz kuanz mai keui aez, ehz talz tukz khahz boh an pae suamz kaw ehz bawnz sa phawmz kawp pehz yum. 8 Kawp daz pehz tam phawmz klakz klakz thaz Caoh Phraz kaw seu ni taan boh ehz phawmz imz. 9 Ehz seuz phawmz aacz ngaai Phraz Pen Caoh ehz kawp pehz ne ehz ngaz cih seu naez phrawz bawnz kez cuz Hnhz? 10 Ehz suz tawngz mawn mawn seuk ngih teuk bimz aez toz ehz awlz mial pehz rae kawr aez reung dengz yum an pehz lo.

Mony suz tawngz ta cumz caoh

11 Seu ni aez Phraz Pen Caoh an naeh Paz ehz boh Tahz ehz Yesuhz raenz aez reung dengz ehz lan cu pehz se kamz. 12 Aez Caoh Phraz cih reung dengz teur rak pehz teur deuiz boh rak kaai ihz ne aez keur leung ceun ehz rak pehz se kamz. 13 Aez Caoh Phraz raenz aez phawmz pehz klakz, aez pehz seu ngamz, yak aez maang ti nae aacz ngaai Phraz Pen Caoh an naeh Paz ehz meuz Tahz ehz Yesuhz truz tawiz ihz seu ngamz Daehz hacz aamz se kamz.