2TH 2

Ihz meukz leungz

Kuanz mai keui aez, ehz sawz pehz nahz an Tahz ehz Yesuhz Khris truz boh an ehz cuhz teur kawmz a Hnhz ne, 2 yak rip kuangz yak rip ngaat meuz ihz daz seu ngihz Caoh Phraz a wa phraeoz. Beuk keuh daz lawng an ni naeh an ehz rawz taangz phraz mok, naeh an ehz krai, naeh lik an ehz taemz daz kaw yak yum keuh. 3 Kawp naehz kaw, yak aez ihz kaoz bawnz pehz. Meuz maat phraeoz seu ngihz an diz ne an seuk weur ne ngaz naeh aacz rae Ihz Meukz Leungz an naeh kuanz cih teuk luh kaw ngaz paw truz. 4 Hnhz ngaz seuk mawh toz daehz rae cih khatz klawhz meoz an ihz daz boh naeh phraz meoz an ihz koz kwaai keui hacz aamz rae hnhz ngaz keu dez ti Phraz Pen Caoh tuhz wat, daz daehz naeh Phraz Pen Caoh.

5 Meuz ehz naeh kawmz pehz ne ehz a wa lao lawng keu ni, pehz nam tang leui haz? 6 Pehz a wa mas boh seu ni yeung maang an klatz an kan hnhz, beuk kraao hnhz phraeoz kaw hnhz ngaz paw truz. 7 Kawp daz an meukz unz mok ne yeung penz boh. Meuz Phraz Pen Caoh phreoz thengz ihz an klatz an kan ne an ngaz penz keui penz truz. 8 Waaiz an diz Ihz Meukz Leungz ne ngaz paw truz. Tahz Yesuhz leh phawmz kut phawmz lae Daehz piamz thengz hnhz rae leh bunz aasz Daehz truz ne ya thengz hnhz. 9 Meuz maat naeh ceun diz ne Ihz Meukz Leungz an diz ngaz truz tawiz kaanz Satan rae plaez taanz khoz an plawmz hacz aamz, an naeh an laak laaiz, rak seum sangz boh an pleung pleung keui, 10 truz kaoz meukz ka penz kaai ihz luh sumz keui nahz. Keuh ngaz luh sumz kawp daz keuh thiangz rae nam rak traz an anz an aez reung dengz khyawt. 11 Kawp ceun diz aez keuh yum an kaoz ne Phraz Pen Caoh phuhz aez keuh nahz taanz khoz an kaoz. 12 Keuh ngaz talz taam kawp daz keuh nam yum traz an anz, namz taw khyaw tawiz an meukz.

Tam phawmz klakz klakz

13 Keuiz daz kuanz mai an Caoh Phraz rak keui aez, kawp Phraz Pen Caoh ras pehz thaz meuz seun teungz rae aez pehz bawnz khyawt, kawp Khuanz rae aez pehz seu ngamz, kawp pehz yum tuhz traz an anz rae ehz lo lupz phrawz se se kez cuz Phraz Pen Caoh. 14 Hnhz raak pehz tawiz reung dengz khyawt an ehz krai ne aez pehz bawnz reung dengz khyawt boh aez pehz bawnz bunz Tahz ehz Yesuhz Khris. 15 Kawp ceun diz kuanz mai keui aez, tam phawmz klakz klakz rae tawnz leh traz an anz an ehz sawnz, tang mony reu ma boh lik.

16 Ehz suz tawngz aez Toz Tahz ehz Yesuhz Khris ehz boh Phraz Pen Caoh an naeh Paz ehz an rak ehz, an aez kez cuz, an sa phawmz cen cen boh reung dengz mang an rak ne, 17 aez pehz sa phawmz rae klakz khreumz tuhz mony reu ma boh reung cih an rak klawhz meoz se kamz.