Phraeoz klunz Malta
28
Meuz phraeoz lang pukz ne ehz taamz mas ihz raak klunz Malta.
2 Ihz moh tuhz klunz keui phawmz rak cu ehz baaiz. Cung klaez rae katz baaiz, keuh sapz aez ehz nahz ngal.
3 Meuz Paul pumz khaehz sapz tuhz ngal ne maang heunyz hawkz kawp ngal kawcz rae lak hawiz boh tihz Paul.
4 Meuz ihz klunz keui awlz heunyz hawiz boh tihz Paul ne keuh teur daz daehz nahz, “Hnhz an ni naeh ihz piamz ihz maan maan. A wa lawt boh phez paang laai kaw Naang Phiz ne sunz aez hnhz yam.”
5 Keuiz daz Paul ratz teuk klaez heunyz tuhz ngal rae hnhz kaw nam pleung.
6 Ihz keui pao yawt hnhz, hnhz ngaz asz tang toz, ngaz taz yam. Keuh pao yawt ceu nawhz baaiz kaw awlz nam pleung naehz rae phawmz keuh a wa pleung. Keuh daz, “Hnhz an ni naeh phraz keuiz.”
7 Rim aarz diz maang ti moh Publius, hnhz naeh tahz kaez klunz. Hnhz saanyz rap ehz rae damz ehz ta waiz seu ngihz thapz thapz.
8 Paz keuh Publius reum, yangz klungz kak rae yaetz. Paul kut cu suz tawngz, leh tihz taangz lang kol hnhz rae moh rak truz.
9 Meuz ceun diz ihz nam moh rak tuhz klunz keui teur aacz daehz truz cu Paul rae keuh bawnz moh rak.
10 Keuh aez ehz nahz kreung tawrz heungz baaiz. Meuz ehz ngaz lae mial kaw keuh taangz aez phrihz phrahz an ehz lo kaai ceun luang.
Paul phraeoz weng Rom
11 Meuz a wa peun waiz kiarz ne ehz tumz ceun luang an thangz kiarz katz tuhz klunz an diz. Mus ceun luang ne daz, “Phraz Teuk Praas,” truz thaz prih Alesandria.
12 Ehz lan deukz weng Sirakuse tuhz klunz Sisili, thangz a diz waiz seu ngihz.
13 Lae thaz a diz phraeoz weng Rekium naeh tuhz prih Itali. Thaengz seu seu ngihz kurz seun daalz pat rae lan aarz seu ngihz kaw phraeoz weng Puteoli.
14 A diz, ehz awl kuanz mai yum yam teur ka, cao ehz moh pulz seu ngihz rae ehz kaw moh. Ehz siupz lan thaz weng Rom.
15 Kuanz mai yum yam weng Rom keui ngarz reu oiz ehz truz rae truz saanyz ehz teur ka truz awlz a teur laas Appius, teur ka kaw truz awlz a Saeng Preumz Waiz Saeng. Meuz Paul awlz keuh ne lupz phrawz kez cuz Phraz Pen Caoh rae hnhz bawnz keum rang.
Paul rawz traz tuhz weng Rom
16 Meuz phraeoz weng Rom ne ihz aez Paul moh daehz, keuiz daz maang siukz hawkz pao hnhz.
17 Moh waiz seu ngihz Paul raak ihz peur aacz Yio a diz keui. Meuz keuh phraeoz truz ne Paul daz, “Kuanz mai keui aez, sangz daz ohz nam kawi pleung ihz Yio daehz boh thungz ihz keu daehz keu daepz ehz keui kaw kuanz mai Yio keui mat ohz tuhz weng Yerusalem rae aapz aez ihz Rom keui nahz.
18 Keuh caetz ohz nam awlz naehz seum aez taam yam rae sunz plawiz boh ohz.
19 Keuiz daz ihz Yio keui nam prawm ta plawiz ohz rae ohz bawnz maanyz khunz longz caetz daehz. An ohz bawnz cih ceun diz ne kawp daz maang lawng sunz maap keuh rae nam anz.
20 Kawp ceun diz ohz maanyz aez awlz pehz rae upz pehz. Kawp Israel keui mang Khris rae ohz talz nuarz hirz ceun ni.”
21 Keuh mial daz, “Ehz nam bawnz lik thaz prih Yio an taemz mok lawng mih. Kuanz mai an truz thaz prih Yio keui kheuz reu oiz mih nam rak kaw nam maang hawkz hawkz.
22 Keuiz daz ehz mas ihz upz thiangz cumz an ni klawhz ti. Kawp ceun diz rae ehz sunz ngarz an naeh tuhz phawmz mih.”
23 Keuh teur lao seu ngihz. Kaai seu ngihz teur lao ne ihz truz heungz baaiz a Paul moh. Hnhz rawz traz lawng prih Phraz Pen Caoh teuk ngup taw teuk borz, leh kyaamz Moses boh kyaamz ihz taangz phraz keui khatz phawmz rawz aez keuh yum Yesuhz.
24 Teur ka ngarz an hnhz rawz rae yum, teur ka kaw nam yum.
25 Keuh teur deuiz nam teum prawm daehz rae lae lan. Waaiz Paul rawz ceun diz ne, hnhz daz, “Khuanz Seu Ngamz daz ne tawz baaiz, cao ihz taangz Phraz Isaiah lao daz ihz keu daehz keu daepz pehz nahz,
26 ‘Lan cu keuh rae lao,
Pehz ngarz boh kaw nam loz phawmz,
awlz boh kaw nam leh sapz phawmz.
27 Kawp daz kingz keu nuasz ihz keu ni tanz,
keuh bitz mok keu tiakz daehz,
bitz mok ngaai daehz.
Khanz nam anz ceun diz kaw ngaai keuh kaw awlz,
keu tiakz keuh kaw ngarz,
kingz keu nuasz keuh kaw loz phawmz boh
keuh teur aacz daehz plaak plaai rae
Ohz cih aez keuh moh rak.’”
28 Paul siupz daz thaengz, “Pehz lo mas reung dengz khyawt Phraz Pen Caoh ne aez ihz an nam anz kheuz Yio keui nahz rae keuh kaw teuk ngarz.”
29 Waaiz Paul daz ceun diz ne Yio teur deuiz teur thiangz krang baaiz rae lae lan.
30 Paul moh kaang an daehz khaatz aarz wit neuk neuk. Saanyz rap ihz an truz keulz daehz rae,
31 rawz yaak yaak lawng prih Phraz Pen Caoh boh lawng Tahz Yesuhz Khris ne nam maang ihz kan hnhz.
Kyaamz Teu Maan Caoh a wa dutz.