Kyaamz Titus
Mony tak
1
Ohz naeh Paul, naeh peur cao Phraz Pen Caoh boh teu maan Yesuhz Khris ta kawr reung dengz yum ihz an Phraz ras boh ta keuh mas traz an anz rae cih aez keuh mon tuhz phraz. 2 Phraz Pen Caoh an nam mawz upz kaoz rae maang keu tih aez keuh mang phawmz cen cen, thaz meuz maat seun teungz prih keu tehz ne, 3 meuz kraao a wa phraeoz kaw Hnhz lawk plaez reu oiz rak an ni. Hnhz aapz aez ohz nahz an ni rae ohz kaw krai reu oiz rak an ni tawiz sinz Phraz Pen Caoh an naeh Tahz Khyawt ehz lao. 4 Kuanz mawn ohz Titus tuhz reung dengz yum deuiz ehz ne aez, ohz taemz aez mih nahz lik. Aez Paz Phraz boh Khris Yesuhz an naeh Tahz Khyawt ehz ne aez pehz nahz kez cuz boh reung dengz nimz se kamz.Kaanz Titus kaai klunz Krete
5 Aez mih cih teuk wa an yeung lo cih boh aez mih khaanz ihz mawh cumz caoh tawiz klawhz weng rae ohz aez mih moh kiutz kaai klunz Krete ceun ohz seumz mok. 6 Ihz mawh upz cumz caoh keui yak aez keuh maang ti nae, lo aez maang yah hawkz pan. Kuanz keuh kaw lo naeh ihz yum yam, yak aez ihz bawnz daz naeh ihz keu leungz keu ceungz boh naeh ihz nam teuk ngarz. 7 Ihz peur aacz cumz caoh ne lo naeh ihz nam maang ti nae kawp daz hnhz naeh ihz an Phraz Pen Caoh aapz daehz nahz kaanz an yawt cumz caoh. Nam lo naeh ihz cih tawiz lomz daehz, nam lo naeh ihz yoh ca, nam lo naeh ihz tiangz keu daaoz, nam lo naeh ihz phawmz haao, nam lo naeh ihz khahz ciz pwaz nam yoz. 8 Hnhz lo naeh ihz rak khaekz, ihz song an rak, ihz maang pinya, ihz keu sangz, ihz seu ngamz boh ihz nyeun bawnz. 9 Hnhz lo naeh ihz tawnz khreumz khreumz mony reu ma rak seum yum an daehz sawnz leh ne aez daehz caang sawnz aez ihz nahz traz an anz boh aez daehz thanz paw caang lao plaez ihz khatz traz an anz an keuh pleung. 10 Kawp daz ihz nam teuk ngarz, ihz upz nam laai lawng boh ihz kaoz suamz ihz keui maang heungz baaiz. An raai leuz ne naeh ihz sawnz aez ihz yum yam daz, bawnz saetz cawkz hurz. 11 Yak aez keuh rawhz naehz, kawp daz keuh sunz kaoz paekz ihz rae sawnz aez ihz nahz an nam rak seum sawnz, cih seuk ya na kaang ihz. 12 Ihz klunz Krete hawkz an keuh mok hnhz naeh ihz taangz phraz kaw tomz daz mial ihz daehz nahz, “Kheuz Krete keui naeh ihz an upz suamz se se naeh ceun toz ruk raai, naeh ihz laac suamz peun.” 13 An keuh daz ceun ni ne tawz baaiz. Kawp ceun diz sawnz lao mawn mawn keuh aez keuh klakz khreumz tuhz reung dengz yum, 14 yak aez keuh kut phawmz mony reu ma Yio meuz neungz an ihz krai, yak aez keuh teuk ngarz sinz traz ihz an khatz traz an anz. 15 Ta ihz seu ngamz keui nahz seu ngamz klawhz meoz. Keuiz daz ta ihz meukz boh ihz nam yum keui nahz samz nam maang naehz seu ngamz, kingz keu nuasz keuh boh phawmz an mas toz daehz kaw woi. 16 Sangz keuh daz daehz mas boh Phraz Pen Caoh kaw leh reung cih daehz ne thiangz Phraz Pen Caoh. Keuh naeh ihz peuk ceuh, naeh ihz nam teuk ngarz Phraz, keuh naeh ihz nam laai lawng rae nam krang cih an rak naehz.