An rak seum leh
2
Mih samz, sawnz aez an tawiz traz an mawn an maan. 2 Sawnz aez keur meh cahz keui nahz aez keuh maang seu tih, aez keuh naeh ihz tawz ti, aez keuh maang sre, aez keuh maang reung dengz yum an klakz khreumz, reung dengz rak boh reung dengz nyeun keui. 3 Naeh ceun diz laai, sawnz aez tang keun nyah cahz keui nahz reung cih keuh aez nap suamz Phraz, yak aez naeh ihz phyaakz sre, yak aez naeh ihz makz keu daaoz rae aez keuh naeh ihz mawz sawnz aez ihz nahz an rak keui. 4 Waaiz an diz keuh caang naeh truz ihz sawnz aez keun nyah plung keui nahz, aez keuh rak tahz daehz kuanz daehz, 5 aez keuh naeh yah kaang mawz seu tih toz daehz, aez keuh naeh ihz phawmz keun ra, aez keuh naeh ihz yawt na kaang daehz, aez keuh naeh ihz phawmz rak, aez keuh naeh ihz teuk ngarz mony reu ma tahz daehz keu ni rae yak aez ihz caang saehz mony reu ma Phraz Pen Caoh. 6 Ceun khuz an diz lao sawz keur meh plung keui nahz aez keuh mawz seu tih toz daehz. 7 Mih bawnz naeh pung taek ta keuh yeung tawiz a kyaangz an rak klawhz meoz. Tawiz klawhz lawng ne toz mih bawnz naeh pung taek an rak. Meuz sawnz aez ihz ne aez phawmz daehz yoz rae aez naeh seu taeh seu wah, 8 upz mony reu ma an anz an yaeh nam caang nae daehz nahz naehz. Beuk cih ceun diz ihz khatz daehz keui nam caang daz ehz nahz an raai rae keuh ngaz bawnz klez. 9 Sawnz aez ihz an naeh kuanz leng keui nahz aez keuh teuk ngarz tahz paz leng daehz klawhz meoz, aez keuh khatz phawmz cih aez maen phawmz tahz daehz klawhz meoz, yak aez keuh naeh ihz tawpz thiangz tahz daehz, 10 yak aez keuh rah khangz tahz daehz, aez keuh cih rak se se rae aez tahz keuh thanz paw yum phawmz daehz. Beuk naeh ceun diz tawiz an keuh cih klawhz lawng ne aez ihz ro se mony sawnz Phraz Pen Caoh an naeh Tahz Khyawt ehz. 11 Kawp daz kez cuz Phraz Pen Caoh an aez ihz hacz aamz nahz reung dengz khyawt ne a wa paw truz. 12 Kez cuz Phraz Pen Caoh an diz sawnz aez ehz nahz, aez ehz wiar thengz an pleung phraz traz, wiar thengz an takz phawmz ciz cim tuhz prih keu tehz rae aez mawz seu tih toz daehz, aez cih ihz rak ihz yoz, aez mon tuhz phraz caat an ni boh, 13 meuz ehz pao reung dengz mang an rak an naeh seu ngihz Phraz Pen Caoh an mawh myaat ehz an naeh Tahz Khyawt ehz Yesuhz Khris paw tawiz bunz Daehz. 14 Hnhz cunz toz Daehz taangz ehz, leh plaez thaz an nam tawiz traz klawhz meoz, cih aez phawmz ehz keun ra, aez ehz sunz cih an rak rae aez naeh ihz Hnhz. 15 Sawnz traz an keu ni raez, cao a na ka daehz maang ne aez ihz nahz keum rang rae lao plaez an ihz cih kawi. Yak aez ihz nam nap suamz daehz.