Cih an rak
3
Aez seu tih ihz nahz aez keuh nap suamz khunz boh ihz mawh rae teuk ngarz mony reu ma khunz, aez keuh peun tan mok cih an rak klawhz meoz raez, 2 lao keuh, yak saehz yaeh, yak kawi yaeh, keuiz daz aez maang phawmz keu ceum, nyeun yawm cu ihz hacz aamz. 3 Kawp daz ka peun truz ne ehz naeh peur cao kilesa boh ciz cim klawhz meoz. Ehz tomz naeh ihz klukz, ihz nam teuk ngarz, ihz cih pleung. Caat ehz ne neuk taw cih an raai rae seuk ke ihz, ehz teur deuiz kaw teur ceuh mial daehz. 4 Keuiz daz meuz reung dengz yaw boh reung dengz rak yaw Tahz Khyawt ehz Phraz Pen Caoh paw truz ne, 5 Hnhz khyawt ehz, nam anz kawp ehz cih kuz so, naeh kawp reung dengz teur yawng Hnhz. Hnhz haaoz aez ehz keut mial rae aez maang phawmz teun mehz tawiz Khuanz Seu Ngamz. 6 Kawp Yesuhz Khris an naeh Tahz Khyawt ehz rae Phraz Pen Caoh thawkz aez kaai ehz Khuanz heungz baaiz. 7 Kawp ceun diz kez cuz Hnhz cih aez ehz naeh ihz keu sangz rae bawnz a moi phawmz cen cen an ehz mang. 8 An ni naeh mony reu ma an rak seum leh tawiz. Ohz sunz aez mih phawmz takz sawnz an keu diz, aez ihz yum yam Phraz keui maang saet ca cih siupz lan an rak. An keu ni rak rae maang a keoz ta klawhz ihz. 9 Keuiz daz wiar mony reu ma teur thiangz an klukz, craangz ceu kheuz kuanz mai boh lawng teur kawi teur thiangz an nam maang a keoz kawp sinz traz keui. An keu ni nam khra naehz, naeh an thengz maat awh. 10 Aez seu tih kaai ihz cih teur teuk praasz seu laehz, aarz laehz kaw plawiz thengz lah. 11 Mih lo mas ihz keu ni mas boh daehz a kyaangz nam rak, mas boh naeh an pleung kaw yeung cih boh leun. Ihz keu diz naeh ihz wiar traz an anz, reung dengz kawi keuh ne plaez daz daehz eunz pleung leun.Mony seumz thaz puatz
12 Meuz ohz cao Artemas nam anz kaw Tichikus lan cu a mih ne mih khatz phawmz truz phraeoz weng Nikopolis an ohz ngaz thangz ne lah. Kawp daz kiarz katz ne ohz aanz moh tuhz weng an diz. 13 Kawr langz reung dengz sra upz tawiz peungz an naeh Senas boh Apollos rae yawt kaar yak aez kaar lo thaengz naehz. 14 Aez ihz ehz keui sawnz leh a kyaangz caang cih an rak, aez thanz paw mawz kawr an ihz lo mawn ne yak aez keuh naeh ihz moh maat. 15 Ihz an naeh kawmz ohz keui tak seumz mih. Tak tang kuanz mai yum yam an rak ehz. Aez kez cuz Phraz Pen Caoh aez naeh kawmz pehz hacz aamz se kamz.