Rawz reu oiz rak
4
Ohz seumz mawn mih aacz ngaai Phraz Pen Caoh boh aacz ngaai Khris Yesuhz an ngaz tatz traz ihz imz boh ihz yam kawp daz Hnhz ngaz truz upz peung ceun khunz. 2 Rawz reu oiz rak raez. Kraao saang trohz nam saang trohz kaw khatz phawmz lah. Lao plaez aez seu tih ihz maang reung dengz kawi keui nahz, aez tang keum rang meuz mih sawnz aez traz ne mok phawmz hanz teuk. 3 Kawp daz kraao an ihz keui nam teuk ngarz bawnz traz an caet ne ngaz phraeoz. Keuh ngaz tawiz lomz daehz rae khahz sra an ngaz lao plaez keuh rawz an keuh sunz ngarz tawiz keu tiakz ngah keuh sunz teuk ngarz. 4 Keuh waaiz thengz thaz an teuk ngarz traz an anz rae seuk weur lan tawiz a pum an upz suamz. 5 Keuiz daz mih samz mok seu tih toz daehz klawhz meoz raez. Khaam nyaapz, cih kaanz an rawz reu oiz rak. Cih kaanz aez thonz thonz an Phraz Pen Caoh aapz aez daehz nahz. 6 Ohz samz a wa phraeoz kraao lu phawmz daehz. A wa thatz kraao lae thaz prih keu tehz. 7 Ohz a wa tiukz plaakz tiukz an rak. Ohz a wa wang dutz reung dengz. Ohz a wa pao kam tawiz traz reung dengz yum. 8 Seu ni paanz kumz an keu sangz ne ngawm boh ohz. Kaai seu ngihz an diz, Tahz, an naeh tahz tatz traz phrengz phrengz ne ngaz aapz aez ohz nahz paanz kumz an diz. Nam anz taw ohz nahz, kaai klawhz ihz an mang Tahz an diz mial truz kaw Hnhz ngaz aapz aez boh.Mony seumz ta Timothi
9 Khatz phawmz truz cu ohz raamz rip naz. 10 Kawp daz Demas takz phawmz tuhz prih keu tehz an ni rae a wa praasz ohz lan prih Thessalonika, Kressens samz a wa lan prih Kalati, Titus samz a wa lan prih Dalmatia. 11 Taw Lukas pan naeh kawmz ohz. Raak truz tang Markus raez, kawp daz hnhz mawz kawr ohz cih kaanz Phraz rak baaiz. 12 Ohz cao Tichikus lan weng Ephesus. 13 Meuz mih truz ne leh truz cung cui ohz mok tawz Karpus a weng Troas boh, leh truz tang mar lik ohz keui, leuz lak an diz mar lik hurz ohz keui. 14 Sra mawz tawng Alesander cih phez mawh sapz ohz. Tahz ngaz phrawz aez an hnhz cih. 15 Mih kaw seu tih hnhz rak rak, kawp daz hnhz a wa cih khatz baaiz mony reu ma an ehz rawz. 16 Meuz ohz upz khraez toz daehz laehz aacz ihz ne yaeh nam moh plaakz ohz, plawiz thengz ohz hacz aamz. Yak aez Caoh Phraz maaiz reung dengz kawi keuh se kamz. 17 Keuiz daz Tahz moh plaakz ohz, aez ohz neuk tang keum rang, aez ohz rawz traz thonz thonz rae aez ihz an nam anz kheuz Yio hacz aamz keui thanz paw bawnz ngarz traz an diz. Hnhz cih aez tang ohz lawt thaz mony saang si. 18 Tahz ngaz khyawt ohz thaz an nam rak klawhz ceu klawhz meoz rae phuhz ohz rak rak tuhz prih kaang raaoz Daehz. Aez bunz Hnhz mawh cen cen se kamz. Amen.
Mony seumz thaz puatz
19 Tak Prissilla boh Akuila, boh ihz kaang keuh Onesiphorus naz. 20 Erastus kiutz moh a weng Korin, Trophimus samz reum rae ohz cao hnhz kiutz ngawm tuhz weng Miletus. 21 Khatz phawmz truz meuz maat kut kiarz katz naz. Eubulus, Pudens, Linus, Klaudia boh kuanz mai yum yam klawhz ihz keui tak seumz mih. 22 Aez Tahz naeh kawmz khuanz mih naz. Aez kez cuz Phraz naeh kawmz pehz hacz aamz se kamz.
Kyaamz Timothi kaai keu aarz a wa dutz.