Nap suamz tahz paz leng daehz
6
Aez kuanz leng keui maatz tahz paz leng daehz naeh ihz an rak seum nap suamz mawn beuk cih ceun diz nam maang ti saehz mus Phraz boh traz Phraz.2 Beuk tahz paz leng daehz naeh ihz yum yam kaw yak cih meoz nam saangz suamz kawp daz naeh kuanz mai tuhz Phraz. Kuanz leng baaiz lo cih rak rak kaanz kawp daz ihz an bawnz a keoz thaz kaanz an kuanz leng keui cih ne naeh kuanz mai yum yam an keuh rak. Mih sawnz lao aez keuh nahz lawng keu ni raez.
Ihz sawnz an nam tawiz traz
3 Beuk maang ihz sawnz aez tang meoz boh ihz an nam tawiz traz an anz Tahz ehz Yesuhz Khris boh mony sawnz phraz traz kaw, 4 ihz an diz kumz lomz trawng rae nam mas naehz. Hnhz maang lomz raai kawi ihz thiangz ihz lawng mony reu ma, aez naeh an teur seuk ke, an teur teuk praasz, an phyaakz sre ihz, an thaang pleung raai, 5 boh an teur kawi teur thiangz daehz se se. Phawmz keuh meukz, tuhz keuh nam maang traz an anz rae keuh thaang an mon tuhz phraz ne laai penz ihz maang.
6 Keuiz daz mon mawn tuhz phraz tang pae phawmz daehz ne penz a keoz an mawh. 7 Kawp daz meuz ehz kut truz tuhz prih keu tehz ne nam khaenz truz naehz, lae lan kaw nam caang leh lae naehz. 8 Kawp ceun diz beuk ehz kumz ta suamz ta kap kaw ehz lo pae phawmz. 9 Ihz sunz maang keui samz klaez tuhz reung dengz kyaam ya boh khamz dakz phawmz kilesa an heungz an caang penz phez boh an raai meukz, an diz naeh an tiut mok ihz keui khamz tuhz reung dengz luh sumz. 10 Kawp daz reung dengz khawtz paekz ne naeh rias meoz nam rak klawhz meoz. Ihz teur ka keui takz phawmz paekz baaiz rae a wa longz reung dengz yum, cih teuk suhz daehz tang khiz phawmz kreuk phawmz cih klawhz meoz.
Tiukz rak rak
11 Keuiz daz, mih an naeh ihz Phraz Pen Caoh aez! Mih wiar thengz an nam rak keu diz raez. Samz khatz phawmz aez bawnz an keu sangz, an mon tuhz phraz, an yum, an rak, an nyeun boh an keu ceum keui. 12 Tiukz rak rak kaai reung dengz yum raez. Tawnz leh khreumz khreumz phawmz cen cen an Phraz Pen Caoh raak ta saayz leh meuz mih a wa wun khaam rak rak reung dengz yum mih aacz ngaai ihz heungz ne aez penz saak se raez. 13 Aacz ngaai Phraz Pen Caoh an aez phawmz klawhz ceu klawhz meoz boh aacz ngaai Khris Yesuhz an wun khaam rak rak aacz ngaai khunz Pontius Pilat ne ohz lao mih nahz, 14 cih tawiz sinz keu ni yak aez maang ti kawi ti pleung, thonz taw Tahz Yesuhz Khris ehz mial truz. 15 Meuz kraao a wa saang trohz ne Phraz Pen Caoh ngaz aez Khris paw truz. Phraz Pen Caoh naeh Phraz an maang reung dengz rak, naeh Tahz Upz Peung taw Daehz, naeh Khunz lang kol khunz, naeh Tahz lang kol tahz, 16 naeh taw Hnhz pan lawt yam, moh tuhz an aasz thanz paw yaeh nam thatz bawnz, yaeh kaw nam ti awlz, nam caang awlz, Aez Tahz an diz bunz mawh cen cen se kamz. Amen.
Mony seumz ta ihz maang
17 Aez seu tih ihz maang caat ni keui nahz yak aez keuh lomz trawng, lao keuh yak aez keuh mang reung dengz maang daehz an nam se, aez keuh mang kaai Phraz Pen Caoh an aez ehz nahz leung leuz klawhz meoz ta ehz bawnz caam mon pyaw, 18 lao seumz keuh cih an rak, aez keuh cih kaanz an rak heungz heungz, maang phawmz ceum aez keuh mawz aez ihz nahz. 19 Beuk cih ceun diz keuh ngaz rawmz ciz cim an penz rias penz teungz an rak ta toz daehz caat te truz rae keuh ngaz bawnz phawmz an caet mawn. 20 Timothi aez, pao yawt kaanz an aapz aez mih nahz. Wiar thengz upz an nam tawiz traz boh teur thiangz an nam maang lawng naehz an ihz keui raak pleung daz naeh pinya. 21 Ihz teur ka daz daehz bawnz pinya kawp ceun diz rae keuh longz reung dengz yum. Kez cuz Phraz Pen Caoh aez naeh kawmz mih se kamz.
Kyaamz Timothi kaai hawkz a wa dutz.