Kaanz pao yawt ihz yum yam
5
Yak nae kyaamz ihz cahz lak daehz, upz wawn keuh naeh ceun paz daehz. Ihz an plung lak mih keui kaw mok naeh ceun kuanz mai, 2 keun nyah an cahz lak mih keui mok naeh ceun mah, keun nyah an plung lak mih keui samz mok phawmz keun ra caet caang naeh ceun seum bohz keun nyah daehz.3 Kawr yah keu maaiz an nam maang ihz yawt keuh. 4 Keuiz daz beuk keuh maang kuanz nam anz kaw maang pliz kaw aez keuh ngaz plaez aacz reung dengz yum daehz tawiz yawt ihz kaang daehz, an cih ceun diz ne naeh an keuh tawpz kung mah paz daehz kawp daz an ni naeh an Phraz Pen Caoh trohz phawmz. 5 Yah keu maaiz mawn an kiutz taw daehz ne mang tawz Phraz Pen Caoh rae suz tawngz seuk ngih teuk bimz, maanyz aez Phraz Pen Caoh kawr. 6 Keuiz daz yah keu maaiz an moh tuhz reung dengz pyaw lawkahz samz yeung imz boh kaw naeh an yam. 7 Yak aez maang ti nae ne seumz keuh nahz lawng an keu ni. 8 Keuiz daz beuk maang ihz nam yawt kuanz mai daehz, neuz lak an diz nam yawt ihz kaang daehz ne naeh ihz thiangz reung dengz yum, na lak ihz nam yum.
9 Beuk yah keu maaiz an a saak hnhz maat neuk tualz kawlz, an nam anz keun nyah leh tahz taw hawkz ne yak aez hnhz kut craangz yah keu maaiz, 10 hnhz lo naeh ihz maang sre kawp hnhz cih rak, naeh ihz yawt kuanz daehz, naeh ihz rak khaekz, khez cawng ihz yum yam teur deuiz, naeh ihz kawr ihz talz peur teuk boh ihz khatz phawmz cih an rak klawhz meoz.
11 Yah keu maaiz plung keui yak sapz craangz kawp meuz phawmz kamesuhz keuh cih aez keuh thengz Khris rae keuh dawhz tahz, 12 Kawp ceun diz rae keuh talz taam kawp keuh nam cih tawiz keu tih an daehz mok aacz tawz Yesuhz. 13 Neuz lak an diz keuh kaw takz lomz laac, khahz keulz tawiz kaang ihz, samz baaiz khahz kheuz ihz rae khahz seuk rah tawiz ti an nam anz kaanz daehz keu diz. 14 Kawp ceun diz ohz sunz aez yah keu maaiz an plung keui tae na kaang, damz kuanz, khriungz na kaang rae yak aez raan su ehz caang saehz ehz. 15 Kawp daz yah keu maaiz plung teur ka keui a wa longz reung dengz rae lan tawiz Satan. 16 Beuk keun nyah yum yam seu hawkz hawkz maang yah keu maaiz tawiz kuanz mai daehz kaw aez keun nyah an diz yawt yah keu maaiz keu diz, yak aez cumz caoh kreuk tawiz, beuk cih ceun diz cumz caoh caang kawr yah keu maaiz mawn.
17 Ihz peur aacz an upz cumz caoh rak rak ne rak seum bawnz kreung lu aarz pun, ihz an khatz phawmz rawz rae sawnz mony reu ma Phraz ne rak seum bawnz ceun diz. 18 Kawp tuhz kyaamz lik daz, “Yak sapz seum supz mony meuk meuz kaetz ngohz. Kawp daz ihz cih kaanz ne theukz bawnz boh langz.” 19 Beuk nam maang ihz lao saak se keu aarz, keu waiz kaw yak leh tawiz mony nae kaai ihz peur aacz cumz caoh. 20 Beuk keuh kawi ne sawnz lao keuh aacz ngaai ihz tuhz cumz caoh, beuk cih ceun diz ihz teur ka keui ngaz maang seu tih.
21 Ohz lao mih aacz ngaai Phraz Pen Caoh boh Khris Yesuhz boh teu maan an ras mok keui, leh mony seumz keu diz cih tawiz yak aez maang plaakz ihz plaakz daehz, yak yawt ngaai kyehz ngaai mawh. 22 Yak rip leh tihz daehz taangz kaai ihz rae khaanz hnhz naeh ihz peur aacz cumz caoh. Yak cih seuk rah tawiz reung dengz kawi ihz. Cih aez daehz caet caang.
23 Yak tiangz maat taw omz pan, tiangz tang omz seu pit teur nyaenz ta klungz mih boh an mih kai penz.