Sra tuh
4
Seu ni Khuanz lao plakz plakz daz kraao thaz puatz ne ihz teur ka keui ngaz thengz reung dengz yum daehz, teuk ngarz khuanz an caang kaoz boh ngaz cih tawiz mony phiz sawnz keui. 2 Mony sawnz keu diz truz thaz ihz kaoz an seuk cih daehz naeh ihz rak, phawmz an mas toz keuh ne a wa ahz naeh ceun hirz bungz daatz mok. 3 Keuh ngaz sawnz aez ihz nahz, an kopz ku ne naeh an pleung, keuh ngaz lao seumz ihz kaerz tang seum suamz an Phraz Pen Caoh phaan cih mok an ihz yum yam an mas traz an anz keui lupz phrawz kez cuz rae suamz. 4 Kawp daz an Phraz Pen Caoh phaan cih mok ne rak hacz aamz. Beuk ehz lupz phrawz kez cuz, rap leh an diz ne nam bawnz kaerz naehz. 5 Kawp mony reu ma Phraz Pen Caoh boh mony suz tawngz rae cih aez seu ngamz an keu diz.Peur cao an rak Khris Yesuhz
6 Beuk mih sawnz aez kuanz mai keui nahz lawng an keu diz ne mih ngaz naeh peur cao an rak Khris Yesuhz an damz khuanz phawmz daehz tawiz mony reu ma reung dengz yum boh traz an anz an mih cih tawiz. 7 Wiar a pum an nam tawiz traz boh an nam loz naehz rae seum rih cih aez daehz mon tuhz phraz lah. 8 Seum rih plaakz toz ne maang boh a keoz teur nyaenz, aez khuanz mon tuhz phraz samz bawnz a keoz thonz thonz klawhz meoz kawp daz pehz ngaz bawnz mawn phawmz an Phraz Pen Caoh aez mok keu tih ta caat ni boh caat te truz. 9 Mony reu ma an ni naeh mony an anz rae rak seum leh tawiz hacz aamz. 10 Kawp ceun diz ehz khaam nyaapz rae khatz phawmz, kawp daz ehz mang tuhz Phraz Pen Caoh phawmz imz, an naeh Tahz khyawt ihz hacz aamz, leuz lak diz Hnhz naeh Tahz khyawt ihz yum Daehz.
11 Seumz aez sawnz aez ihz nahz lawng an ni lah. 12 Yak cih aez ihz nam saangz suamz daehz kawp daz mih naeh ihz plung. Reung moh, reung dengz rak yaw, reung dengz yum boh reung dengz caet caang daehz keui aez naeh pung taek ta ihz yum yam keui nahz. 13 Thonz taw ohz truz ne khatz phawmz rawz plaez ihz cumz caoh nahz kyaamz lik, rawz traz boh sawnz aez traz ihz keui nahz raez. 14 Yak mok nyawngz reung kyahz mih an aapz aez mih nahz tawiz ihz taangz phraz tak mok lawng mih meuz ihz mawh cumz caoh keui leh tihz taangz kaai mih. 15 Phawmz takz khatz phawmz cih an keu diz aez ihz thanz paw awlz reung dengz mih raw trawng. 16 Seu tih toz daehz boh mony reu ma an sawnz aez ihz nahz. Khatz phawmz siupz cih lan an keu diz beuk cih ceun diz mih ngaz khyawt tang toz daehz tang ihz an teuk ngarz mony mih.