Ihz peur aacz cumz caoh
3
Mony an ni naeh mony rak seum yum an daz, beuk ihz seu hawkz hawkz sunz cih kaanz peur aacz cumz caoh ne naeh hnhz sunz cih kaanz an myaat. 2 Kawp ceun diz ihz peur aacz cumz caoh ne yak aez maang ti nae, lo naeh ihz maang yah hawkz, ihz maang seu tih, ihz mawz seu tih, ihz maang sre, ihz rak khaekz, ihz mawz sawnz aez ihz nahz. 3 Yak aez naeh ihz suamz ihz cawc, nam lo naeh ihz leungz, lo naeh ihz keu ceum, lo naeh ihz nam mawz kawi ihz, ihz nam song paekz. 4 Hnhz lo mawz khriungz rak rak ihz kaang daehz, boh kuanz hnhz kaw teuk ngarz hnhz nap suamz hnhz rak rak. 5 Beuk naeh ihz nam mawz khriungz rak rak ihz kaang daehz ne ngaz cih seu naez yawt cumz Phraz Pen Caoh? 6 Hnhz nam lo naeh ihz taamz yum, beuk naeh ceun diz kingz keu nuasz hnhz caang trawng rae doz talz taam ceun Manaat. 7 Neuz lak an diz hnhz lo naeh ihz nam yum yam keui nap suamz beuk nam anz ceun diz doz hnhz naeh ti ihz saehz nae rae khamz tuhz dakz Manaat.Ihz paamz cumz Caoh
8 Ihz paamz cumz caoh keui kaw naeh ceun diz laai, lo aez naeh ihz nap suamz hnhz, nam lo naeh ihz taakz kaakz, nam lo makz keu daaoz, nam lo naeh ihz lawphahz paekz. 9 Keuh lo takz phawmz an truh an trawng traz an anz reung dengz yum ehz tawiz an mok phawmz mas toz daehz rak rak. 10 Aez keuh caet mial aacz toz daehz, beuk keuh nam maang ti nae kaw caang kai aez cih ihz paamz cumz Caoh raez. 11 Keun nyah keui kaw naeh ceun diz, lo naeh ihz nap suamz daehz, nam lo naeh ihz kheuz ihz, keuiz daz lo naeh ihz maang seu tih, aez maang saet ca tuhz klawhz lawng. 12 Ihz paamz cumz Caoh ne lo maang yah hawkz pan rae lo mawz khriungz rak rak ihz kaang daehz boh kuanz daehz. 13 Ihz paamz cumz Caoh an cih rak rak kaanz daehz keui bawnz daehz nahz sre an rak boh caang lao yaak yaak lawng daehz yum tuhz Khris Yesuhz.
An truh an trawng mawn
14 Sangz daz ohz mang lan cu mih raamz rip daz kaw ohz taemz aez mih nahz lik, 15 beuk hinz tan ne lik an diz aez mih mas ngaz bawnz kam kyaangz ceun nae tuhz kaang Phraz Pen Caoh an diz naeh cumz caoh Phraz Pen Caoh phawmz imz. Cumz caoh an diz naeh teungz keun rang boh ti tam traz. 16 An truh an trawng reung dengz yum ehz ne myaat baaiz rae yaeh thanz paw nam caang thiangz.
Khris a wa paw truz ceun toz ihz,
Khuanz kaw a wa plaez Hnhz naeh an anz mawn.
Teu maan kaang raaoz keui a wa bawnz awlz Hnhz.
Reu oiz Hnhz kaw a wa bawnz rawz peur lah ihz an nam anz kheuz Yio.
Ihz tuhz prih keu tehz keui a wa bawnz yum Hnhz rae
Hnhz talz leh phrawz lang kaang raaoz tuhz bunz.