Lqiyama n Lmasiḥ
15
1 Fa akenniw sfekkareɣ ay ayṯma x Lʼinjil iy zi kenniw beccareɣ, iƹni netta ṯqebȓem-ṯ u mtebṯin xas.
2 Aqa tnejjamem zzayes wami ḏayes teṭṭfem mliḥ ḏeg wawaȓ n ttebcir nni iy zi kenniw beccareɣ. Meȓa lla, zaƹma lʼiman nwem ṯesbeṭṭȓem-ṯ.
3 Cuf, siwḍeɣ-awem-d manayenni iǧan muhim tuɣa qebȓeɣ-ṯ nec s yixef inu, iƹni Lmasiḥ immuṯ ƹlaḥsab ȓmuƹṣiyaṯ nneɣ mammec iqqar Lkitab.
4 Ṯumma itwanḍeȓ, ṯumma itwasnekkar-d ḏeg wass wis ṯeȓtiyyam ƹlaḥsab min iqqar Lkitab.
5 Ṯumma iḍhar-as-d i Buṭrus,a ssenni iḍhar-asen-d i ṯenƹac nni n arrusul.
6 Menbaƹd iḍhar-asen-d ḏeg yijjen n twaȓat i ktar zi xemsmiyya n wawmaṯen. Niṯni ƹaḏ ddaren ƹaȓayen marra iḏsen maca ȓebƹaḍ aqa ṭṭṣen iƹni mmuṯen.
7 Ṯumma iḍhar-as-d i Yaƹqub, menbaƹd i marra arrusul.
8 Ɣar uneggaru qaƹ imeḍhar-ayi-d i nec, axmi nec ƹeḍȓeɣ iƹni war d xȓiqeɣ ca ḏi zman inu nican.
9 Aqa nec ḏ amezyan qaƹ ḏi arrusul. War sḏihiǧeɣ ca aḏayi ȓaɣan arrasul ȓaḥeqqac tuɣa nec tƹeddabeɣ jmaƹeṯ n ȓmuminin.
10 Walakin s arḍa n Arebbi nec tiȓiɣ mammec ǧiɣ ȓexxu. Ṯumma arḍa nnes xafi war iǧi bu s bȓa nfaƹ, lƹaks ccaṯeɣ tamara ktar zzaysen marra. Maci nec zaƹma, lla ḏ arḍa n Arebbi iy kiḏi.
11 Falihaḏa waxxa ḏ nec niɣ ḏ niṯni, ḏ wanita ḏ ttebcir iy zi netbeccar ṯumma kenniw ṯumnem.
Lqiyama n imettinen
12 Fa Lmasiḥ netbeccar xas itwasekkar-d zi ȓmewṯ, mammec ɣa inin ȓebƹaḍ zzaywem qa war ṯeǧi ca lqiyama n imettinen?
13 Meȓa walu lqiyama n imettinen, uȓa ḏ Lmasiḥ war d itwasekkar ca.
14 Maƹlik war d itwasekkar ca Lmasiḥ, iȓi ttebcir nneɣ ḏ ȓbaṭeȓ waha, iȓi lʼiman nwem uȓa ḏ netta ḏ ȓbaṭeȓ.
15 Maƹlik amenni, iȓi nufa ixef nneɣ ncehheḏ ẓẓur x Arebbi. Mayemmi? Liʼanna necheḏ x Arebbi belli isekkar-d Lmasiḥ zi ȓmewṯ. Walakin maƹlik war tiȓi bu lqiyama n imettinen, iȓi Arebbi war d isekkari ca Lmasiḥ zi ȓmewṯ.
16 Cuf, maƹlik imettinen war d twasnekkaren ca, iȓi Lmasiḥ uȓa ḏ netta war d itwasekkar ca.
17 Maƹlik war d itwasekkar ca Lmasiḥ, iȓi lʼiman nwem netta ḏ ȓbaṭeȓ waha, iȓi kenniw ataf ƹaḏ ṯeqqimem ḏi ȓmuƹṣiyaṯ nwem.
18 Maƹlik amenni, iȓi yinni iṭṭṣen iƹni yinni immuṯen ḏi Lmasiḥ ṣafi fnan.
19 Maƹlik negga lʼamal nneɣ ḏi Lmasiḥ ƹlaḥsab ṯuḏarṯ-a ṯanita waha, iȓi s manaya nziǧiz i yiwḏan ktar zeg yiwḏan marra.
20 Fa aqa ȓexxu Lmasiḥ itwasekkar-d zi ȓmewṯ, netta iƹni ḏ ṯafeǧaḥṯ ṯamezwarut iy d ikkaren zeg yinni immuṯen.
21 Cuf, s yij n bnaḏem Adam ṯusa-d ȓmewṯ. Ȓexxu s yij n bnaḏem ƹaweḏ ṯusa-d lqiyama n imettinen.
22 Mammec ɣa nemmeṯ marra s bnaḏem nni Adam, ȓexxu s Lmasiḥ neccin marra aɣarneɣ ṯiȓi ṯuḏarṯ.
23 Walakin kuȓ ijjen nnuba nnes: Lmasiḥ netta ḏ ṯafeǧaḥṯ ṯamezwarut. Menbaƹd, xmi d ɣa iƹqeb, ḏ nnuba n yinni iǧan zzayes zi netta.
24 Ṯumma aḏ yiȓi ȓefna n ddunect. Lmasiḥ aḏ iqḍa x marra ȓeḥkam ḏ ȓmexzen ḏ jjehḏ ig iǧan, ṯumma aḏ ijj ȓeḥkam nni nnes i Arebbi Babas.
25 Aqa itxeṣṣa aḏ iḥkem Lmasiḥ aȓ ɣa igg Arebbi marra ȓƹaḏyan nnes swadday n ssulṭa n iḍaren nnes.
26 Ȓaƹḏu aneggaru iy ɣa ibeṭṭeȓ nettaṯ ḏ ȓmewṯ.
27 Aqa Arebbi igga marra ṯimesȓayin swadday i ssulṭa n iḍaren n Lmasiḥ. Walakin xmi iqqar qa marra ṯimesȓayin twaggent swadday nnes, nfehham belli Arebbi war iǧi bu jar n ṯmesȓayin nni ȓaḥeqqac Arebbi ḏ netta s yixef nnes ig iggin marra ṯimesȓayin nni swadday n ssulṭa n Lmasiḥ.
28 Xmi ɣa iȓint marra ṯimesȓayin-a swadday i ssulṭa n Lmasiḥ, ṯumma Mmis iƹni Lmasiḥ s yixef nnes aḏ iḏweȓ uȓa ḏ netta swadday i ssulṭa n Arebbi ig iggin marra ṯimesȓayin-a swadday i ssulṭa n Lmasiḥ. Ammu aḏ yiȓi Arebbi ḏ marra ḏi min ḏi ma.
29 Cuf, yinni itwaṭehharen s waman ƹlaḥsab yinni immuṯen, man nfaƹ iy rezzun niṯni? Meȓa ḏ ṣṣaḥ zaƹma belli yinni immuṯen war d twasnekkaren ca, mayemmi ttwaṭehharen iwḏan-a s waman ƹlaḥsab yinni immuṯen?
30 Y nec, mayemmi ǧiɣ ḏi lxaṭar kuȓ ṯsaƹat?
31 Ay ayṯma, twajaheɣ ȓmewṯ kuȓ nhar! Qqareɣ-awem manaya s lʼiftixar-a iy ɣari ḏaywem ƹlaḥsab ṯuḏarṯ nneɣ iy ɣarneɣ ḏ icten ak Siḏiṯneɣ Ƹisa Lmasiḥ.
32 Nec meȓa ƹlaḥsab n bnaḏem waha, mayemmi menɣeɣ ak ȓuḥuc ḏi ṯendint n Ufasus? Min ɣa rebḥeɣ? Imettinen meȓa war d tnekkaren ca:
"Yallah a necceṯ a nesweṯ,
aqa ṯiwecca a nemmeṯ."
33 War xeddƹeṯ ca ixef nwem:
"Ṯamƹacareṯ ṯaƹeffant,
tḍeyyaƹ ttarbiya ṯaṣebḥant."
34 Arrem-d ȓbaȓ nwem, war ƹeṣṣaṯ ca. Qqareɣ-awem manaya bac aḏ tseḏḥam liʼanna ȓebƹaḍ zzaywem ḏaysen ȓeqfareṯ x Arebbi.
Ddat nni iy ɣarneɣ ɣa yiȓin ḏi lqiyama
35 Walakin ijjen aḏ yini: Imettinen, mammec d ɣa kkaren? Man ṣṣifeṯ iy zi d ɣa ḏewȓen?
36 A wenni war ifhimen, ṯaḥebbuyṯ nni iy ṯzerrƹeḏ aḏ temmeṯ zaƹma swadday n ucaȓ menbaƹd aḏ teɣmi.
37 U min ṯzerrƹeḏ cek nettaṯ war ṯeǧi bu ḏ ṣṣifeṯ nni iy d ɣa iɣmin. Lla, ṯzerrƹeḏ ɣiȓ ij n ṯḥebbuyṯ waha n zzarriƹeṯ n yirḏan niɣ n ca n zzarriƹeṯ nneɣnit.
38 Ṯumma iticc-as Arebbi ij n ṣṣifeṯ iy ɣa ixḍar netta. I kuȓ nnawƹ n zzarriƹeṯ iticc-as ṣṣifeṯ nnes nniṯ.
39 Aysum ƹaweḏ war iǧi bu marra kif-kif. Iryazen ɣarsen ij n nnawƹ n uysum. Lḥayawanaṯ ɣarsen aysum waḥeḏsen. Ijḍaḍ ɣarsen aysum waḥeḏsen. Iseȓman ɣarsen ijjen nneɣnit waḥeḏsen.
40 Ƹaweḏ ḏinni ṣṣifaṯ n ṯmesȓayin iy iǧan ḏeg ujenna. Ḏinni ƹaweḏ ṣṣifaṯ n ṯmesȓayin iy iǧan ḏi ṯmurṯ. Aceƹceƹ n min iǧan ḏeg ujenna netta ḏ ij n nnawƹ. Aceƹceƹ n min iǧan ḏi ṯmurṯ netta ḏ ij n nnawƹ.
41 Ṯfuct ɣares nnawƹ n uceƹceƹ nnes. Ṯaziri ɣares nnawƹ n uceƹceƹ waḥḏes. Iṯran ɣarsen nnawƹ waḥeḏsen. Ƹaweḏ iṯran kuȓ ijjen aceƹceƹ nnes.
42 Ammu iy ṯeǧa lqiyama n imettinen. Min izerrƹen aḏ ifna, min d itwasnekkaren aḏ idum.
43 Ddat twazerreƹ ḏi ȓefḍiḥeṯ, twasnekkar-d ḏi ccenƹeṯ. Twazerreƹ ḏi ḍḍuƹef, twasnekkar-d ḏi jjehḏ.
44 Twazerreƹ ḏ ij n ddat n bnaḏem, twasnekkar-d ḏ ij n ddat ruḥiya. Meȓa ṯeǧa ddat n bnaḏem, ṯeǧa ƹaweḏ ddat ruḥiya.
45 Ammu iqqar Lkitab: "Bnaḏem amezwaru iƹni ḏ Adam iḏweȓ ḏ buḥbeȓ iddaren." Adam aneggarub netta ḏ buḥbeȓ iseddaren.
46 Min iǧan ruḥiya war d itis ca ḏ amezwaru. Lla, itas-d min iǧan n bnaḏem. Menbaƹd itas-d min iǧan ruḥiya.
47 Bnaḏem amezwaru itwaṣneƹ zeg ucaȓ n ṯmurṯ, bnaḏem wis ṯnayen yusa-d zeg ujenna.
48 Mammec iǧa bnaḏem nni itwaṣenƹen zeg ucaȓ, amenni iy ǧan yiwḏan itwaṣenaƹen zeg ucaȓ. Wa mammec iǧa bnaḏem nni n ujenna, amenni iy ǧan yiwḏan n ujenna.
49 U mammec netcabbah ḏi ṣṣifeṯ n wenni itwaṣenƹen zeg ucaȓ, amenni iy ɣa ncabbah ḏi ṣṣifeṯ n wenni zeg ujenna.
50 Fa qqareɣ-awem ay ayṯma, qa aysum ḏ iḏammen war zemmaren aḏ warṯen ḏi ȓmulk ujenna. Min ifennan war iwarreṯ ca min war ifennin.
51-52 Aqa qqareɣ-awem ij n ṯmesȓayṯ ȓmaƹna nnes inuffar: Qa war netmetti ca marra iḏneɣ. Xmi ɣa iṣuḍ zzammar aneggaru uca a niȓi nbeddeȓ marra ḏi ṣṣifeṯ nneɣnit. Manaya aḏ yiȓi ḏeɣya ḏeg yij n armec n ṯiṭṭ.c Aḏ iṣuḍ zzammar nni ṯumma imettinen aḏ d twasnekkaren iƹni aḏ duman i ȓebda a niȓi nbeddeȓ ḏi ṣṣifeṯ nneɣnit.
53 Cuf, itxeṣṣa i manaya iy ifennan aḏ iɣmes s min war ifennin, ḏ min itmettan aḏ iɣmes s min war itmettin.
54 Min ifennan xmi ɣa iɣmes s min war ifennin, ḏ min itmettan aḏ iɣmes s min war itmettin, ȓexddennit aḏ d iffeɣ min yurin ḏi Lkitab: "Ȓmewṯ iseɣȓey-t arbaḥ."
55 Cem a Ȓmewṯ hiwa, arbaḥ nnem mani iǧa?
Cem a Ȓmewṯ hiwa, ṯiqqest nnem mani ṯeǧa?
56 Aqa ȓmewṯ ṯiqqest nnes tas-d zi ȓmuƹṣiyeṯ. Ȓmuƹṣiyeṯ ṯizemmar nnes tas-d zi Ccariƹa.
57 A neḥmeḏ Arebbi! Iticc-aneɣ netta bac a nerbeḥ s Siḏiṯneɣ Ƹisa Lmasiḥ.
58 X manaya ay ayṯma iƹizzen, beddeṯ nican maci akenniw senhezzen. Ḥawȓeṯ ȓebda ḏi ȓxeḏmeṯ n Siḏiṯneɣ, ṯessnem belli ȓxeḏmeṯ nwem ḏi Siḏiṯneɣ war ṯeǧi bu ḏ ȓbaṭeȓ.