2 Ayṯ-Kurinṯ
Ṯabrat wis ṯnayen n arrasul Bulus
ɣar ȓmuminin zi Ayṯ-Kurinṯ
1
1 Ṯabrat-a zzayi Bulus iy ǧiɣ nec ḏ arrasul n Ƹisa Lmasiḥ s ȓxaḍar n Arebbi, akiḏi umaṯneɣ Timuṯawus. Tariɣ i jmaƹeṯ n ȓmuminin n Arebbi ḏi ṯendint n Kurinṯ u ƹaweḏ i marra ȓmuminin ṣṣaliḥin ig iǧan ḏi lʼiqlim n Uxaya amen-ṯekmeȓ.
2 Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.
Ṣbar ḏi tamara
3 Aḏ itwabarek Arebbi, Babas n Siḏiṯneɣ Ƹisa Lmasiḥ. Netta ƹaweḏ ḏ Babas n arraḥmeṯ ḏ netta ḏ Arebbi itƹawan marra iwḏan.
4 Itƹawan-aneɣ ḏi marra tamara nneɣ ḥima neccin s umƹawan-a iy zi ḏaneɣ itƹawan Arebbi nzemmar a nƹawen yinni iǧan ḏi mkuȓ tamara.
5 Liʼanna mammec aƹeddeb n Lmasiḥ itenfeyyaḍ-d itaḏaf ḏi ṯuḏarṯ nneɣ amenni s Lmasiḥ itenfeyyaḍ-d umƹawan nneɣ.
6 Meȓa netwazeyyar neccin aqa manayenni bac kenniw aḏ twaƹawnem bac aḏ tnejjmem. Meȓa netwaƹawen neccin aqa manayenni bac aḏ twaƹawnem kenniw. Aqa amƹawan-a itarew ḏaywem ij n ṣbar xmi tƹeddabem s min netƹeddab neccin.
7 Lʼamal nneɣ ƹlaḥsab kenniw ijheḏ. Aqa nessen mammec ṯcarrcem ḏi tamara nneɣ, ƹaweḏ ṯcarrcem ḏeg umƹawan nneɣ.
8 Ay ayṯma, nexs aḏ tessnem tamara iy xaneɣ ikkin ḏi lʼiqlim n Asya. Tuɣa netwazeyyar aṭṭas neccin, azeyyar nni ktar zi jjehḏ nneɣ war nzemmar azzayes neṣbar ḥetta wami nefqeḏ lʼamal bac a neddar.
9 Wah, nesḥessa ḏeg yixef nneɣ belli netwaḥkam s ȓmewṯ. Iwqeƹ manayenni bac war netƹewwiȓ ca x yixef nneɣ, a nƹewweȓ x Arebbi wenni d isnekkaren yinni immuṯen.
10-11 Isenjem-aneɣ-d zeg yij n ȓmewṯ ḏ ṯaƹeffant u netta ƹaḏ aqa isenjam-aneɣ. Ntegg ḏayes lʼamal nneɣ belli ƹaḏ aḏaneɣ isenjem wami kenniw ḏaneɣ tƹawanem s ṯẓaǧiṯ nwem. Ṯumma aṭṭas n yiwḏan aḏ sgaƹƹḏen ṣṣut nsen ɣar Arebbi aṯ ckaren x lbaraka iy ḏaneɣ ɣa yuc xmi iy ɣa ṯestajeb aṭṭas n ṯẓaǧiṯ nsen xaneɣ.
Arrasul Bulus iʼejjel zziyara nnes ɣar Kurinṯ
12 Aqa neccin nteftaxar zi ḍḍamir nneɣ iƹni icehheḏ belli nuyur mliḥ ḏi ddunect-a xaṣṣatan akiḏwem s yij n nniyyeṯ ḏ wuȓ iṣfan zi Arebbi. War iǧi bu s yij n ȓefhameṯ n ddunect-a lla, s yij n arḍa n Arebbi.
13-14 Cuf, kuȓ ṯamesȓayṯ iy ḏawem d ntari ḏi ṯebrat-a ṯzemmarem at tɣarem aḏas tfehmem. U waxxa war ḏaneɣ tefhimem ca ȓexxu ḏi marra ṯimesȓayin, nec tmenniɣ aḏaneɣ ṯfehmem mliḥ bac azzayneɣ teftaxarem ḏi nhar nni n Siḏiṯneɣ Ƹisa mammec azzaywem nteftaxar neccin.
15 U s lʼiftixar-a tuɣa rezzuɣ ḏ amezwaru aɣarwem d ggeɣ ij n zziyara ḥima aḏawem dubliɣ lbaraka.
16 Iƹni tuɣa rezzuɣ axawem d kkeɣ xmi ɣa raḥeɣ ɣar lʼiqlim n Masidunya, menbaƹd aɣarwem d ƹeqbeɣ zi Masidunya bac aḏayi ṯƹawnem aḏ safareɣ ɣar ṯmurṯ n Yahuḏiya.
17 Wami tuɣa txeṭṭaṭeɣ aḏ ggeɣ manayenni, ma nec ḏewwȓeɣ ḏeg wawaȓ waha? Niɣ ma txeṭṭaṭeɣ am yij n bnaḏem n ddunect-a waha, iƹni aḏ iniɣ wah-wah niɣ lla-lla ḏi nnefs n ȓweqṯ?
18 Am Arebbi ḏayes ttiqeṯ netta, neccin ƹaweḏ qa awaȓ nneɣ i kenniw war iǧi bu ḏ wah akeḏ lla.
19 Liʼanna Mmis n Arebbi iƹni Ƹisa Lmasiḥ nbeccar-iṯ jarawem nec uȓa ḏ Sila uȓa ḏ Timuṯawus. Lmasiḥ war iǧi bu ḏ wah akeḏ lla, walakin netta ȓebda ḏ <Wah> u ṣafi.
20 Liʼanna ḏayes ḏi netta iy iqqar Arebbi <Wah> i marra ṯimesȓayin iy iƹaheḏ Arebbi. S manaya zzayes zi Ƹisa neqqar <Amin> i lƹaḍama n Arebbi.
21-22 Arebbi netta iy ḏaneɣ isbedden akiḏwem mliḥ ḏi Lmasiḥ. Ixḍar-aneɣ iḍbeƹ-aneɣ s ṭṭabaƹ nnes yuca-aneɣ Arruḥ nnes iggi-ṯ ḏeg wuȓawen nneɣ ḏ ij n ttesbiq.