2
1 Cuf, ggiɣ ḏi ȓbaȓ inu war teggeɣ ca zziyara nneɣnit bac war kenniw sxeyyiqeɣ ca.
2 Liʼanna meȓa sxeyyqeɣ-ikenniw nec, wi ɣa iqqimen bac aḏayi isfareḥ illa kenniw iy ɣa sxeyyqeɣ nec?
3 Tuɣa uriɣ ṯabrat nni bac war ḏayi tesxeyyiqem ca, rezzuɣ axmi d ɣa aseɣ ɣarwem labud aḏayi tesfarḥem. Meȓa farḥeɣ ataf nec metʼakked aḏ tfarḥem uȓa ḏ kenniw.
4 Liʼanna uriɣ-awem-t-id s yijjen n uziyyar ḏ yij n uxiyyeq n wuȓ inu ḏ waṭṭas n imeṭṭawen. War iǧi bu ḥima akenniw sxeyyqeɣ lla, ḥima aḏ tessnem mecḥaȓ ṯemɣar ȓemḥibbeṯ inu ɣarwem.
Semḥem-as i wenni iƹeṣṣan
5 Fa meȓa ijjen tuɣa isxeyyaq-ikenniw, war iǧi bu ḏ nec ig isxeyyeq lla. Imken isxeyyeq-ikenniw marra niɣ ȓebƹaḍ zzaywem (war xseɣ ca aḏ semɣareɣ lqaḍiya-ya).
6 Bnaḏem-a, lƹiqab nni iy ḏas ṯeggim teqȓiban marra iḏwem, baraka xas.
7 Ȓexxu aḏas ṯsemḥem ƹawnem-ṯ bac war iɣerreq ca s uxeyyeq aṭṭas.
8 X manaya tettareɣ zzaywem aḏas ṯesbeyynem ƹaweḏ ȓemḥibbeṯ nwem.
9 Uriɣ-awem-d manayenni bac akenniw jarrbeɣ aḏ ssneɣ ma tṭaƹam ḏi marra niɣ lla.
10 Wenni umi ɣa ṯsemḥem uȓa ḏ nec aḏas semḥeɣ. Semḥeɣ, meȓa ḏinni can ȓḥajeṯ umi ɣa semḥeɣ. Semḥeɣ-as nec ƹlaḥsab kenniw, icheḏ xas Lmasiḥ.
11 Manaya ḥima Cciṭan war ḏaneɣ ixeddeƹ ca, aqa war nɣeffeȓ ca x min itciṭin netta.
A nerbeḥ s Lmasiḥ
12 Fa wami d uwḍeɣ ɣar ṯendint n Tarwas bac aḏ beccareɣ s Lʼinjil n Lmasiḥ, ufiɣ ij n ṯewwarṯ ṯnurzem-ayi-d ḏi Siḏiṯneɣ.
13 Walakin uȓ inu war iǧi bu mertaḥ wami war ufiɣ ca ḏinni uma Titus, mṣafaḍeɣ xasen uyureɣ ɣar Masidunya.
14 Maca a neḥmeḏ Arebbi. Netta ȓebda isuggur-aneɣ ḏeg ubriḏ n arbaḥ s Lmasiḥ u zzayneɣ zi neccin itentacar ȓefwaḥ n ṯusna x Lmasiḥ.
15 Liʼanna ɣar Arebbi neccin ḏ ij n ȓefwaḥ n Lmasiḥ jar n yinni inejjmen ḏ yinni ifennan.
16 Neccin am ccum n ȓmewṯ ɣar yinni ifennan, ɣar yinni inejjmen neccin am ccum n ṯuḏarṯ. Iwa war ḏinni ḥadd iy ɣa izemmaren i ȓxeḏmeṯ-a!
17 Aqa neccin maci am xarebbi n yiwḏan iteggen ttijara s wawaȓ n Arebbi, neccin nessawaȓ ḏi Lmasiḥ s wuȓ iṣfan zi Arebbi u zzaṯ i Arebbi.