1 Ayṯ-Kurinṯ
Ṯabrat wis waḥit n arrasul Bulus
ɣar ȓmuminin zi Ayṯ-Kurinṯ
Arrasul Bulus itseǧam x jmaƹeṯ n ȓmuminin ḏi Kurinṯ
1
1 Ṯabrat-a zzayi Bulus akiḏi umaṯneɣ Sustanis. Iȓaɣa-ayi-d Arebbi s ȓxaḍar nnes bac aḏ iȓiɣ ḏ arrasul n Ƹisa Lmasiḥ.
2 Netseǧam xawem kenniw iy iǧan ḏ jmaƹeṯ n ȓmuminin n Arebbi ḏi ṯendint n Kurinṯ. Twaṣeffam ḏi Ƹisa Lmasiḥ, twaxḍarem aḏ tiȓim ḏ ṣṣaliḥin akeḏ marra yinni itȓaɣan x yisem n Siḏiṯneɣ Ƹisa Lmasiḥ ḏi marra imucan. Netta ḏ Siḏiṯneɣ ḏ Siḏiṯsen.
3 Aɣarwem yiȓi arḍa ḏ ȓehna zi Arebbi Babaṯneɣ u zi Siḏiṯneɣ Ƹisa Lmasiḥ.
4 Tcekkareɣ Arebbi xawem ȓebda x arḍa iy ḏawem yuca ḏi Ƹisa Lmasiḥ.
5 Zi netta, itwarni-yawem ȓxir ḏi kuȓci, iƹni ḏi marra awaȓen ḏ ṯusna.a
6 Ḏaywem kenniw iy d iseḍhar Arebbi lḥaqiqa x chaḏeṯ nneɣ x Lmasiḥ.
7 S manaya war ḏawem ṯneqqeṣ uȓa ḏ ij n lqudra ruḥiya xmi trajam aḏ d itwaḍhar Siḏiṯneɣ Ƹisa Lmasiḥ.
8 Ḏ netta iy kenniw ɣa isbedden ɣar uneggaru war ḏaywem itiȓi bu ȓƹib ḏi Nhar nni n Siḏiṯneɣ Ƹisa Lmasiḥ.
9 Arebbi netta ḏayes ttiqeṯ, zi netta iy ḏaneɣ d yusa uȓaɣi a nƹacar Memmis, iƹni Siḏiṯneɣ Ƹisa Lmasiḥ.
Ȓmuminin ḏi Kurinṯ ɣarsen lxilaf jarasen
10 Fa tettareɣ zzaywem ay ayṯma s yisem n Siḏiṯneɣ Ƹisa Lmasiḥ, msefhameṯ ak wayawya ḥima war itiȓi bu lxilaf jarawem. Itxeṣṣa kenniw aḏ tiȓim kif-kif ḏi ȓaƹqeȓ nwem ḏ array nwem.
11 Ay ayṯma, arriɣ-d ȓexbar zi ṯeddarṯ n Kluwi belli tmenɣam jarawem.
12 Iƹni, ijjen iqqar nec ḏeffareɣ Bulus. Ijjen iqqar nec ḏeffareɣ Apullus. Ijjen iqqar nec ḏeffareɣ Buṭrus. Ijjen iqqar nec ḏeffareɣ Lmasiḥ.
13 Lmasiḥ ma ḏayes lfirqaṯ? Lla! Ma ḏ Bulus itwaṣellben ḏi ṣṣalib ƹlaḥsab kenniw? Lla! Ma ṭehharem s waman s yisem inu Bulus? Lla!
14-15 Tcekkareɣ Arebbi liʼanna nec war ṭehhireɣ ca s waman uȓa ḏ ijjen zzaywem illa Krisbus ḏ Ɣayus ḥima war iqqar ḥadd belli itwaṭehhar s waman s yisem inu.
16 (Wah, nec ṭehhareɣ s waman ȓeḥbab n Stifanus. Walakin war ƹqiȓeɣ ca ma ṭehhareɣ s waman ḥadd nneɣni ktar zeg yina.)
17 Liʼanna Lmasiḥ war ḏayi d issekk ca ḥima aḏ ṭehhareɣ iwḏan s waman. Lla, nec issekk-ayi-d aḏ beccareɣ s Lʼinjil walakin maci s ȓefhameṯ nni n wawaȓen izewwqen. Mayemmi? Bac jjehḏ iǧan ḏi ṣṣalib n Lmasiḥ war itbeṭṭiȓ ca.
Lmasiḥ netta ḏ ȓefhameṯ ḏ jjehḏ n Arebbi
18 Cuf, awaȓ x ṣṣalib netta ḏ ṯubbuhȓiya ɣar yinni war inejjmen ca, walakin ṣṣalib netta ḏ jjehḏ n Arebbi ɣar neccin inejjmen.
19 Liʼanna iqqar Lkitab:
Ȓefhameṯ n yinni itefhamen at heḏmeɣ.
Ȓefṭaneṯ n yinni ifeṭṭnen at sfecȓeɣ.
20 Wenni itefhamen zaƹma, y ȓexxu mani iǧa? Amseȓmaḏ n Ccariƹa zaƹma, y ȓexxu mani iǧa? Lfilasuf n ȓweqṯ-a zaƹma, y ȓexxu mani iǧa? Yak Arebbi isbuheȓi ȓefhameṯ n yiwḏan n ddunect-a ṯanita?
21 Isbuheȓi-t s ȓefhameṯ n min netbeccar neccin. Mammec? S ȓefhameṯ-a n Arebbi iƹjeb-as aḏ isenjem yinni itamnen, iwḏan n ddunect-a war zemmaren aṯ ssnen s ȓefhameṯ nsen.
22 Niṯni iʼisraʼiliyen tettaren lmuƹjizaṯ, u ḏ yinni war iǧin zi Ayṯ-Israʼil rezzun ȓefhameṯ,
23 walakin neccin netbeccar s Lmasiḥ itwaṣellben. Iʼiʼsraʼiliyen tneqȓaḍen ḏi manaya, u ḏ yinni war iǧin zi Ayṯ-Israʼil qqaren qa manaya ḏ ṯubbuhȓiya.
24 Walakin i yinni umi d iȓaɣa Arebbi, iƹni iʼisraʼiliyen ḏ yinni war iǧin zi Ayṯ-Israʼil, Lmasiḥ netta ḏ jjehḏ n Arebbi ḏ ȓefhameṯ nnes.
25 Mayemmi? Liʼanna zaƹma ṯubbuhȓiya n Arebbi nettaṯ ṯsefham ktar zi ȓefhameṯ n bnaḏem, u ḍḍuƹef zaƹma n Arebbi netta ijheḏ ktar zi min ijheḏ bnaḏem.
26 Ay ayṯma, fekkareṯ ḏi min tuɣa ṯeǧam qbeȓ wami ḏawem d iȓaɣa i kenniw Arebbi. War ṯeǧim bu ḏ aṭṭas iy tuɣa ɣarwem ȓefhameṯ ƹlaḥsab min qqaren yiwḏan. War ṯeǧim bu ḏ aṭṭas kenniw umi tuɣa ɣar ṯeǧa lmartaba. War ṯeǧim bu ḏ aṭṭas iy tuɣa lʼaṣel nwem zeg imeqqranen.
27 Walakin Arebbi ixḍar min qqaren iwḏan n ddunect-a ḏ ṯubbuhȓiya ḥima aḏ ifḍeḥ yinni itefhamen zaƹma. Ixḍar Arebbi min iḍeƹfen ḏi ddunect ḥima aḏ ifḍeḥ yinni ijehḏen.
28 Ixḍar Arebbi wenni umi ɣar iǧa lʼaṣel nnes ḏ amezyan, ḏ min itwaƹiffan, u ḥetta ḏ ṯimesȓayin war d ixȓiqen ca bac aḏ isbeṭṭeȓ ṯimesȓayin iy d ixeȓqen.
29 Mayemmi? Ḥima uȓa ḏ ij n bnaḏem war iftaxar ca zzaṯ i Arebbi.
30 U netta ḏ ssabab iy zi ṯeǧam kenniw ḏi Ƹisa Lmasiḥ. Iggi-ṯ Arebbi netta ḏ ȓefhameṯ nneɣ, iƹni ḏayes ḏi netta ṣṣulḥ nneɣ ḏ uṣeffi nneɣ ḏ ufekki nneɣ.
31 Falihaḏa, mamc iqqar Lkitab: "Wenni irezzun aḏ iftaxar, aḏ iftaxar netta zi Siḏi Arebbi."