Arrasul Bulus itbeccar s Lmasiḥ itwaṣellben
2
1 Ay ayṯma, nec wami d usiɣ ɣarwem, usiɣ-d aḏ beccareɣ s ȓmaƹna inuffaren n Arebbi walakin maci s wawaȓen izewwqen niɣ s ȓefhameṯ ig iqqar bnaḏem.
2 Wami tuɣa aqayi akiḏwem, ggiɣ aḏ scenƹeɣ ɣir Ƹisa Lmasiḥ u ḏ netta itwaṣellben ḏi ṣṣalib.
3 Tuɣa aqayi akiḏwem s yij n ḍḍuƹef ḏ ṯiggwḏi, terjijiɣ aṭṭas.
4 Min qqareɣ ḏ min tḥeddaṯeɣ war iǧi ca s wawaȓen n ȓefhameṯ bac ḏeɣya akenniw sqenƹen. Lla, sxeddameɣ jjehḏ n Arruḥ n Arebbi
5 ḥima lʼiman nwem war itɣimi ca s ȓefhameṯ n bnaḏem, aḏ iqqim s jjehḏ n Arebbi.
Ȓefhameṯ iy d itasen zi Arruḥ n Arebbi
6 Innama, neccin nsawaḍ ij n wawaȓ n ȓefhameṯ ɣar yinni war iqqimen ca ḏ imezyanen ḏi lʼiman nsen. Walakin ȓefhameṯ-a war d tis ca zi ȓweqṯ-a niɣ zi lḥukkam n ȓweqṯ-a ig igguren aḏ fnan.
7 Lla, neccin nsawaḍ ij n ȓefhameṯ ḏayes ȓmaƹna inuffaren n Arebbi ḏ min itwasnuffaren. Izemmem-it Arebbi qbeȓ ȓweqṯ ma d ṯexȓeq qaƹ ḥima neccin a netwasemɣar.
8 Ȓefhameṯ-a war t ifhim uȓa ḏ ijjen zi lḥukkam n ȓweqṯ-a. Liʼanna maƹlik iy t fehmen, iȓi war ṣellben ca Siḏiṯneɣ umi ɣar ṯeǧa lƹaḍama.
9 Mamc iqqar Lkitab:
Manayenni war ḏinni ṯiṭṭ iy ṯ itwaȓan,
uȓa ḏ amejjun iy ḏas itsȓan,
uȓa ḏ ȓaƹqeȓ iy ṯ itxayaȓen,
iƹni min isewjeḏ Arebbi i yinni iy ṯ itḥibban.
10 Ṯimesȓayin nni iseḍhar-aneɣ-ṯent-id Arebbi s Arruḥ nnes. Liʼanna Arruḥ n Arebbi ixezzar ḏi ṯmesȓayin marra, waxxa ḏ min yuǧɣen n Arebbi.
11 Cuf, min iƹna wenni ig issnen lʼafkar n bnaḏem ɣar ḏaxeȓ? Issen-iṯent arruḥ n bnaḏem s yixef nnes. Kif-kif Arebbi, war ḏinni ḥadd issen lʼafkar n Arebbi illa Arruḥ n Arebbi waḥḏes.
12 War ḏaneɣ yuci ca arruḥ n ddunect-a, yuca-aneɣ Arruḥ iy d yusin zi Arebbi ḥima a nefhem ṯimesȓayin nni iy ḏaneɣ yuca Arebbi baṭeȓ.
13 Nsawaḍ manaya s wawaȓen iy war ṯen ṯseȓmiḏ ca ȓefhameṯ n bnaḏem, iƹni nsawaḍ-iṯ s wawaȓen ig iseȓmaḏ Arruḥ n Arebbi. Awaȓen-a tcarraḥen lḥaqiqaṯ ruḥiyaṯ i yinni umi ɣar iǧa Arruḥ n Arebbi.
14 Bnaḏem ƹadi itagi aḏ iqbeȓ ṯimesȓayin n Arruḥ n Arebbi, ɣares manaya ḏ ṯubbuhȓiya waha. War izemmar ca aṯent ifhem, liʼanna s Arruḥ n Arebbi waḥḏes aṯent imeyyez.
15 Amma bnaḏem umi ɣar iǧa Arruḥ n Arebbi, ixezzar ḏi marra ṯimesȓayin walakin netta war ḏayes ixezzar ḥadd.
16 Liʼanna mamc iqqar Lkitab: "Ug izemmaren aḏ iseȓmeḏ Siḏi Arebbi? Ug ifehmen ȓaƹqeȓ nnes?" U neccin ɣarneɣ ȓaƹqeȓ n Lmasiḥ.