Lxilaf ḏi Jmaƹeṯ n ȓmuminin
3
1 Ay ayṯma, tuɣa nec war zemmareɣ ca akiḏwem ssiwȓeɣ am yiwḏan iteggen array i Arruḥ n Arebbi. Lla, walakin am yiwḏan iteggen array i nnefs nsen, iƹni am iseyman waha d ixeȓqen ḏi Lmasiḥ.
2 Uciɣ-awem aḏ tḥeȓwem aɣia waha maci lmakla ḏ ṣṣaḥ, liʼanna lmakla ḏ ṣṣaḥ tuɣa war ḏas ṯzemmarem ca. Aqa ƹaḏ ȓexxu war ḏas ṯzemmarem ca,
3 liʼanna kenniw ƹaḏ teggem array i nnefs nwem. Meȓa itiȓi ȓeḥseḏ jarawem ḏ umenɣi, ataf teggem array i nnefs nwem tƹicem am yiwḏan n ddunect waha, niɣ lla?
4 Cuf, meȓa ijjen iqqar nec ḏeffareɣ Bulus ijjen iqqar nec ḏeffareɣ Apullus, ataf kenniw tiȓim am yiwḏan n ddunect, niɣ lla?
5 Iwa min iƹna Apullus? Min iƹna Bulus? Neccin ḏ ixeddamen waha, ṯumnem x ufus nneɣ mammec ḏaneɣ yuca Siḏi Arebbi a nexḏem.
6 Nec ẓẓuɣ, Apullus isessew, u ḏ Arebbi iy kenniw isɣemiyen.
7 Wenni iteẓẓun ḏ wenni isessawen niṯni war ǧin ḏ walu. Wenni iǧan netta ḏ Arebbi iƹni wenni iseɣmayen.
8 Fa wenni iteẓẓun ḏ wenni isessawen niṯni ḏ ijjen, kuȓ ijjen aṯ ijaza ƹlaḥsab ȓxeḏmeṯ nnes.
9 Liʼanna neccin ncarrec ak Arebbi ḏi ȓxeḏmeṯ-a. Kenniw ḏ amarjeƹ n Arebbi, ḏ ij n ȓebni nnes.
10 Nec ƹlaḥsab arḍa n Arebbi iy ḏayi yucin ggiɣ ij n dsas am yij n lemƹallem ifsus netta. Yusa-d ijjen nneɣni ibenna x dsas-a. Walakin labud kuȓ ijjen aḏ yarr ȓbaȓ mammec xas ɣa ibna.
11 War ḏinni ḥadd izemmar aḏ igg ij n dsas nneɣni x wenni ḏinni itwaggen, u ḏsas-a netta ḏ Ƹisa Lmasiḥ.
12-13 Ijjen, meȓa ibna x dsas-a s dheb niɣ s nnuqarṯ niɣ s ṯizra ṯiṣebḥanin niɣ s ukeccuḍ niɣ s arbiƹ niɣ s urum, ataf ȓxeḏmeṯ nnes aḏ tban, iƹni manaya Yewm Lḥisab ḏ Lƹiqab aṯid iseḍhar. Ƹaweḏ aṯ ṯseḍhar ij n ṯmessi u ṯimessi-ya aḏ tṣaḥḥeḥ nnawƹ n ȓxeḏmet iy igga mkuȓ ijjen.
14 Wenni ibnan x dsas-a ȓxeḏmeṯ nnes nican war t tett ca ṯmessi, ataf aṯ ijaza.
15 Wenni umi ɣar ṯeḥreq ȓxeḏmeṯ nnes, ataf aḏ ixser ljaʼiza nni. Netta s yixef nnes aḏ injem walakin am wenni yallah d iffɣen zi ṯmessi.
16 Ma war ṯessinem ca belli ḏ kenniw ig iǧan ḏ ṯamziḏa n Arebbi, iƹni izeddeɣ ḏaywem Arruḥ n Arebbi?
17 Wenni ɣa iheḏmen ṯamziḏa-ya n Arebbi, aṯ ihḏem Arebbi. Liʼanna ṯamziḏa n Arebbi nettaṯ muqeddes u kenniw ig iǧan ḏ ṯamziḏa nni.
18 Itxeṣṣa war ḏinni itiȓi ḥadd ixeddeƹ ixef nnes. Meȓa ḏinni jarawem wenni iḥessben ixef nnes ḏ amiɣis ḏi zman-a, itxeṣṣa aḏ iḏweȓ ḏ abuhaȓi zaƹma bac aḏ yiȓi ḏ amiɣis.
19 Cuf, ȓefhameṯ n ddunect-a nettaṯ ḏ ṯubbuhȓiya waha ɣar Arebbi. Liʼanna iqqar Lkitab: "Netta iṭṭef imiɣisen ḏeg ixarwiḍen nsen."
20 Iqqar ƹaweḏ: "Siḏi Arebbi issen lʼafkar n imiɣisen belli war neffƹent ca."