Ayṯ-Ruma
Ṯabrat n arrasul Bulus
ɣar ȓmuminin iǧan ḏi ṯendint n Ruma
Bulus issekk-asen sȓam i ȓmuminin ḏi Ruma
1
1 Nec ḏ Bulus axeddam n Ƹisa Lmasiḥ, igg-ayi Arebbi aḏ iȓiɣ ḏ arrasul. Twaxḍareɣ ḥima aḏ xbareɣ s Lʼinjil n Arebbi,
2 Lʼinjil-a iy zi iwƹeḏ Arebbi s yiȓes n lʼanbiya nnes zi zman ḏi Lkitab lmuqeddes.
3-4 U manaya x Mmis, Siḏna Ƹisa Lmasiḥ. Ƹlaḥsab ddat nnes ḏ bnaḏem netta zi ddurriṯ n siḏna Dawed. Walakin ƹlaḥsab Arruḥ nnes iṣfan iḍhar-d s yij n jjehḏ imɣar netta ḏ Mmis n Arebbi wami iy d ikkar zi ȓmewṯ.
5 Aqa zi Ƹisa u x ssabab n yisem nnes igga ḏayi Arebbi lbaraka ḥima aḏ iȓiɣ ḏ arrasul, aḏ beccareɣ iwḏan zi marra ȓegnus azzayes amnen aḏas ṭaƹen.
6 Uȓa ḏ kenniw tiȓim zeg yinni itwaxḍaren aḏ teḏfarem Ƹisa Lmasiḥ.
7 Tariɣ i marra iḥbiben n Arebbi ḏi ṯendint n Ruma ixḍar-ikenniw aḏ tiȓim ḏ ȓmuminin ṣaliḥin. Akiḏwem yiȓi ȓehna ḏ arḍa n Arebbi Babaṯneɣ ḏ Ƹisa Lmasiḥ Siḏiṯneɣ.
Bulus irezzu aḏ iẓer ȓmuminin ḏi Ruma
8 Ḏ amezwaru, tcekkareɣ Arebbi xawem marra iḏwem s yisem n Ƹisa Lmasiḥ, ȓaḥeqqac lʼiman nwem arrin-as-d ȓexbar ḏi ddunect amen-tekmeȓ.
9-10 Liʼanna Arebbi iy ƹebbḏeɣ s marra uȓ inu tbeccareɣ s Lʼinjil n Mmis, netta qa issen tfekkareɣ ḏaywem ȓebda ḏi ṯẓaǧiṯ inu. Tettareɣ, meȓa ixes Arebbi aȓ uneggaru aḏ afeɣ abriḏ aɣarwem d aseɣ.
11 Nec rezzuɣ aṭṭas akenniw ẓreɣ ḥima aḏawem uceɣ ij n lqudra ruḥiya iy ḏawem ɣa yucen jjehḏ.
12 Iƹni a ncejjeƹ ayawya s lʼiman iy ḏaneɣ icarrcen.
13 Ay ayṯma, xseɣ aḏ tessnem belli aṭṭas n ṯwaȓaṯin ggiɣ aɣarwem d aseɣ, maca ȓexxu ƹaḏ war ɣarwem d uwiḍeɣ. Nec xseɣ ȓxeḏmeṯ inu aḏ tenjeḥ ḏaywem mammec ṯenjeḥ jar ȓegnus nneɣnit.
14 Liʼanna u labud aḏ ggeɣ lwajib akeḏ iyunaniyen ḏ yinni war iǧin ḏ iyunaniyen, akeḏ yinni iɣrin ḏ yinni war iɣrin ca.
15 X manaya nec rezzuɣ aṭṭas akenniw beccareɣ s Lʼinjil uȓa ḏ kenniw iǧan ḏi ṯendint n Ruma.
Jjehḏ n Lʼinjil
16 Aqa nec maci tseḏḥiɣ zi Lʼinjil, liʼanna Lʼinjil ḏ jjehḏ isxeddam-iṯ Arebbi bac aḏ isenjem marra wi ɣa yamnen qa Ayṯ-Israʼil ḏ imezwura uca yinni war iǧin ca zi Ayṯ-Israʼil.
17 Arebbi ḏi Lʼinjil isbeyyen-aneɣ-d mammec ɣa niȓi nican akiḏes, manaya s lʼiman waḥḏes. Mammec iqqar Lkitab: Wen iǧan nican, s lʼiman aḏ iddar.
Aɣḍab n Arebbi x ccer n yiwḏan
18 Fa iḍhar-d uɣḍab n Arebbi zeg ujenna x marra ȓbaṭeȓ ḏ ccerr iy teggen yiwḏan, yinni itbeṭṭaȓen lḥaqiqa s ccerr nsen.
19 Aqa min zemmaren yiwḏan aṯ ssnen x Arebbi itwaḍhar-asen-d, liʼanna ḏ Arebbi netta s yixef nnes iy ḏasen-t-id iseḍharen.
20 Zeg wami ṯeǧa ddunect, min war itwaẓerren n Arebbi, iƹni jjehḏ nnes itduman ḏ ṭṭabiƹa nnes yuƹȓan, nfehhem-iṯent nẓerr-iṯent mliḥ ḏi ṯmesȓayin itwaxeȓqen. Ƹlaḥsab manaya iwḏan war ɣarsen bu lƹuder.
21 Niṯni waxxa ssnen Arebbi, walakin war ṯ ḥemmḏen war ṯ ṯcekkaren mammec itxeṣṣa aḏ ggen ak Arebbi. Lʼafkar nsen ḏewȓent xwant, uȓawen nsen ḏewȓen ḏ ṯaǧest wami ṯen ccin.
22 Ḥessben x yixef nsen ḏ imiɣisen, niṯni ḏewȓen ḏ ibuhaȓiyen.
23 Beddȓen lƹaḍama n Arebbi iddaren i ȓebda s lʼaṣnam itcabbahen ḏi bnaḏem iy ɣa ifnan, ḏ lʼaṣnam itcabbahen ḏeg yijḍaḍ ḏ lḥayawanaṯ ḏ min itenḥuruḏen.
24 X manayenni isellem-iṯen Arebbi i min tcehhan wuȓawen nsen bac aḏ ggen lfasad bac aḏ sbehdȓen ayawya.
25 Kkaren beddȓen lḥaqiqa n Arebbi s ixarriqen. Ƹebbḏen u xeddmen i min itwaxeȓqen maci i Arebbi Lxaliq, wenni iy ḏi ṯeǧa lbaraka i ȓebda. Amin.
26 Ṯumma isellem-iṯen Arebbi i ccehweṯ iy ṯen ifeḍḥen. Kkarent ṯemɣarin beddȓent iryazen s ṯemɣarin.
27 Uȓa ḏ iryazen kkaren jjin ṯimɣarin, ṯekkar ḏaysen ṯmessi ijjen x unneɣnit, ifesseḏ uryaz ak uryaz. S manaya jebḏen-d i yixef nsen lƹiqab iy sḏaheǧen x ȓmunkar iy teggen.
28 Ṯumma wami niṯni ugin aḏ ssnen Arebbi, isellem-iṯen i ȓaƹquȓ nsen infeḍḥen aḏ ggen min war iḥȓin.
29 Niṯni ccuren zi kuȓ nnuƹ n ȓmuƹṣiyaṯ ḏ ccerr ḏ ṭmaƹ ḏ ȓeqbaḥeṯ ḏ ȓeḥseḏ. Neqqen iwḏan u tmenɣan. Ccuren s uɣḏar ḏ min war iḥȓin, tƹawaḏen nnamima.
30 Qqaren ȓbaṭeȓ, tƹiffan Arebbi, tukkaren, semɣaren ixef nsen, ḏaysen ttakebbur. Teggen nniṯ ccerr ḏ jḏiḏ, ƹeṣṣan lwalidin.
31 War fehhmen, war teṭṭfen ḏeg wawaȓ nsen, war ḏaysen ca lḥanana uȓa ḏ arraḥmeṯ.
32 Waxxa ssnen Arebbi iḥekkem xasen s ȓmewṯ x yinni iteggen ṯimesȓayin-a, kkaren teggen-ṯent. U ktar zi manaya, reṭṭan x yinni iy ṯent iteggen.